លោក​ «Elmer Funke Kupper» ដែលជានាយកប្រតិបត្តិ​ក្រុមហ៊ុន «Australian Securities Exchange» ឬ «ASX» ជំនាញខាងផ្សារភាគហ៊ុន ប្រចាំក្នុងក្រុង ស៊ីដនី ប្រទេសអូស្ត្រាលី បាន​ចុះចេញ​ពី​តំណែង យ៉ាង​តក់​ក្រហល់ កាលពីថ្ងៃចន្ទទី២១ ខែមីនា ឆ្នាំ២០១៦នេះ បន្ទាប់ពីការស៊ើបអង្កេត​មួយ បាន​ផ្ទុះ​ធ្វើ​ឡើង ទាក់ទង​នឹង​សហគ្រាស​មួយ ដែលលោកបានដឹកនាំ នៅមុនលោកមកកាន់តំណែង ជា​នាយកប្រតិបត្តិ​​ក្រុមហ៊ុន «ASX» កាល​ពី​ខែ​តុលា ឆ្នាំ២០១១។

សហគ្រាស ដែលលោកធ្លាប់បានដឹកនាំ ក្នុងកៅអីជានាយកប្រតិបត្តិ រវាងពីឆ្នាំ២០០៧ មកទល់នឹងឆ្នាំ២០១១ មានឈ្មោះថា «Tabcorp» ជំនាញខាងល្បែងស៊ីសង ឬល្បែងភ្នាល់ដាក់ប្រាក់។ សហគ្រាសនេះ ត្រូវ​បាន​រក​ឃើញ​មានជាប់សង្ស័យ តាមរយៈការអង្កេតមួយ ពាក់ព័ន្ធនឹងទឹកប្រាក់ចំនួន ២សែនដុល្លារអូស្ត្រាលី (ប្រមាណ​ជា ១៣៥ ពាន់​អ៊ឺរ៉ូ ឬ១៤៥ ពាន់ដុល្លារអាមេរិក)។ ទឹកប្រាក់នេះ ទំនងជាត្រូវបានផ្ទេរ​ទៅឲ្យ​ក្រុមហ៊ុន​មួយ ដែល​​គ្រប់​គ្រង​ដោយអ្នកជិតដិត របស់នាយករដ្ឋមន្ត្រីកម្ពុជា លោក ហ៊ុន សែន។ សហគ្រាស «Tabcorp» មាន​បំណង​​ចង់​ដាក់ទុន ជាមួយនឹងក្រុមហ៊ុននោះ នៅក្នុងប្រទេសកម្ពុជា សម្រាប់គម្រោង​ធ្វើការ​​«ភ្នាល់បាល់» ក្នុង​ព្រឹត្តិការណ៍​ប្រកួតបាល់ទាត់ ពិភពលោក ឆ្នាំ២០១០ នាប្រទេសអាហ្វ្រិក​ខាង​ត្បូង។

តើការផ្ទេរប្រាក់នោះ មានលក្ខណៈបែបណា? សូមទស្សនារូបភាពខាងក្រោម ដែលជារបាយការណ៍មួយ ធ្វើ​ឡើង​ដោយសារព័ត៌មាន «The Sydney Morning Herald» របស់អូស្ត្រាលី៖

កាលពីសប្ដាហ៍មុន សហគ្រាស «Tabcorp» បានទទួលស្គាល់ថា បានរកស៊ីមានបាន នៅក្នុងប្រទេសកម្ពុជា នាឆ្នាំ២០០៩នោះពិតមែន ប៉ុន្តែថាបានសម្រេចបោះបង់ចោល ការរកស៊ីនេះវិញ ក្នុងឆ្នាំបន្ទាប់មក។

ថ្លែងទៅកាន់សារព័ត៌មានអូស្ត្រាលី «Fairfax Media» លោក «Elmer Funke Kupper» បានពន្យល់​ជុំវិញ​ការ​លាលែង ពីតំណែង​របស់លោកថា៖ «ខ្ញុំបានជ្រើសរើស យកការសម្រេចចិត្តនេះ ដើម្បីជាប្រយោជន៍ ដល់​អភិបាល​កិច្ចដ៏ល្អ។ ឈ្មោះរបស់ខ្ញុំ មិនមាននៅក្នុងសំនុំរឿងនេះទេ។ គេមិនបាននិយាយប្រាប់ខ្ញុំថា ខ្ញុំត្រូវ​រង​​នូវ​ការ​ស៊ើប​អង្កេត​នេះ ក៏ទេដែរ។ ប៉ុន្តែខ្ញុំត្រូវត្រួតពិនិត្យ ពីស្ថានការណ៍នេះឲ្យច្បាស់ នៅក្នុងដៃ។»

បើទោះជាលោកបានចាកចេញពីសហគ្រាស «Tabcorp» តាំងពីឆ្នាំ២០១១មកនោះក៏ដោយ តែលោក​នៅ​តែ​មាន​​ទំនាក់ទំនងយ៉ាងជិតស្និត ជាមួយអតីតសហគ្រាស ដែលលោកធ្លាប់ដឹកនាំដដែលដែរ។ ជាពិសេស​នៅ​ចាប់ពី​ឆ្នាំ២០១២ មកទល់នឹងពេលនេះ លោកនៅតែជាសមាជិកមួយរូប នៃក្រុមប្រឹក្សាភិបាល របស់​ក្រុមហ៊ុន​នេះ​ដដែល ដោយ​គ្រាន់​តែ​លោក មិនមានសកម្មភាព ជាសមាជិកប្រតិបត្តិអ្វីឡើយ។

ទីផ្សារភាគហ៊ុន របស់ប្រទេសអូស្ត្រាលីវិញ បានឲ្យដឹងថា បន្ទាប់ពីការលាលែង របស់លោក «Elmer Funke Kupper» ប្រធានក្រុមហ៊ុន «ASX» លោក «Rick Holliday-Smith» បានទទួលធ្វើការងារ ជានាយក​ប្រតិបត្តិ​នេះ ជា​បណ្ដោះអាសន្នសិន ទម្រាំនាយកប្រតិបត្តិថ្មី របស់ក្រុមហ៊ុន នឹងត្រូវជ្រើសតាំងឡើង៕