ហ៊ុន ម៉ាណែត លើកពីទស្សនៈ«ទឹកកន្លះកែវ»
- ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី១៧ តុលា ២០១៥
- កែប្រែចុងក្រោយ: October 18, 2015
- ប្រធានបទ: នយោបាយ
- អត្ថបទ: មានបញ្ហា?
- មតិ-យោបល់
-
ប្រសិនបើលោក ហ៊ុន សែន នាយករដ្ឋមន្ត្រីបីទសវត្សន៍របស់កម្ពុជា ពូកែវោហា និយាយនៅជាប់នឹងមេក្រូ អាចរហូតបានដល់ទៅ៥ម៉ោង តែម្នាក់ឯងនោះ មើលទៅលោក ហ៊ុន ម៉ាណែត ដែលជាកូនប្រុសរបស់លោក ក៏ពូកែវោហា មិនចាញ់ឪពុករបស់លោកដែរ។ ជាពិសេស ទស្សនៈដែលលោកលើកឡើង ទាក់ទងនឹង«ទឹកកន្លះកែវ» នៅក្នុងកិច្ចសម្ភាសមួយ ទៅឲ្យកម្មវិធីមួយ របស់ទូរទស្សន៍អូស្ត្រាលី «ABC» កាលពីថ្ងៃទី១៦ ខែតុលា ឆ្នាំ២០១៥កន្លងមក។
តបនឹងសំនួរ របស់អ្នកសារព័ត៌មាន អ្នកស្រី «Beverley O’Connor» ដែលសួរថា «ឪពុករបស់លោកដឹកនាំប្រទេស អស់រយៈពេល៣០ឆ្នាំ បានរងការរិះគន់ថា មានការជិះជាន់ អំពើពុករលួយ និងបក្សពួកនិយម តើលោកគិតថា គួរមានទស្សនៈផ្សេង ពីឪពុកលោក ឬយ៉ាងណា?»នោះ លោក ហ៊ុន ម៉ាណែត ដំបូងឡើយ បានជ្រើសរើសយក ការពង្វាងសំនួរ ដោយលើកយកឧទាហរណ៍ ទាក់ទងនឹង«វិទ្យាសាស្ត្រពិត»មួយមកនិយាយ។
លោកបានឆ្លើយនូវឃ្លាដំបូងថា៖ «គ្មានផ្លូវណា ដែលយើងអាចបំពេញ និងតម្រូវមនុស្សគ្រប់គ្នា បាននោះទេ»។ បន្ទាប់មក ទើបលោកបានយកទស្សនៈ«ទឹកកន្លះកែវ» មករៀបរាប់ថា៖ «អ្នកខ្លះមើលឃើញថា ទឹកកន្លះកែវ អ្នកខ្លះថាគ្មានទឹក ហើយអ្នកខ្លះ មើលឃើញទឹកកន្លះកែវ ថាទឹកពេញ។ នេះជាទស្សនះរបស់ពួកគេ ហើយការសម្រេចចិត្តរបស់ពួកគេ យើងគោរពការសម្រេចរបស់ពួកគេ។»។
ការអះអាងរបស់ អតីតនិស្សិត នៃសាលាបណ្ឌិតសភាយោធា សហរដ្ឋអាមេរិក (ហៅជាភាសាអង់គ្លេស «West Point Academy») រូបនេះ បានទាក់ទាញចំណាប់អារម្មណ៍ របស់លោក ព្រហ្ម គិត អតីតមន្ត្រីច្បាប់ខ្មែរមួយរូប ដែលបានចូលនិវត្តន៍ នៅប្រទេសបារាំង ឲ្យធ្វើការពន្យល់តបវិញ។ ថ្លែងតាមទូរស័ព្ទ ប្រាប់ទស្សនាវដ្ដីមនោរម្យ.អាំងហ្វូ លោក ព្រហ្ម គិត បានយល់ឃើញថា ការលើកឡើងរបស់លោក ហ៊ុន ម៉ាណែត ពោរពេញដោយភាពអាថ៌កំបាំង ដោយសារតែការដឹកនាំនៅក្នុងប្រទេសមួយ មិនអាចប្រៀបផ្ទឹម មកត្រឹមតែ«ទឹកកន្លះកែវ»នោះឡើយ។
អតីតមន្ត្រីច្បាប់ បានថ្លែងឡើងថា៖ «សម្ដីរបស់លោក ហ៊ុន ម៉ាណែត ចង់បង្ហាញថា នៅកម្ពុជា មានមនុស្សឃើញអញ្ចេះ ទៅថាអញ្ចុះ ឬមនុស្សនិយាយខុសពីការពិត ដល់ទៅពីរភាគបីហើយ។ តែលោក ហ៊ុន ម៉ាណែត មិនបានពន្យល់តទៅទៀតទេ ថាតើកែវនោះ មានលក្ខណៈយ៉ាងដូចម្ដេច ថ្លាឈ្វង់ ឬស្រអាប់? ហើយទឹកនោះ ជាទឹកមែនទែន ឬគ្រាន់ជាគំនូសបន្លំធ្វើទឹក?»។ លោក ព្រហ្ម គិត បានពន្យល់ពីឧទាហរណ៍ បែប«វិទ្យាសាស្ត្រពិត» របស់លោក ហ៊ុន ម៉ាណែត ថាបើកែវស្រអាប់ ធ្វើម៉េចគេមើលឃើញទឹក? ហើយបើគ្រាន់តែគូស ជាគំនូសថាមានទឹក នោះលោក ហ៊ុន ម៉ាណែត គួរអរគុណអ្នកដែលមើលឃើញ ខាងក្នុងកែវ ហើយហ៊ាននិយាយថា កែវនេះគ្មានទឹកទេ៕
» កិច្ចសម្ភាសទាំងស្រុង របស់លោក ហ៊ុន ម៉ាណែត ក្នុងកម្មវិធីទូរទស្សន៍អូស្ត្រាលីដូចតទៅ៖