រឿងរ៉ាវរបស់អតីតបេក្ខជន ម៉ៅ ហាជី របស់កម្មវិធី ខេមបូឌៀន អាយឌ័ល បានផ្ទុះឈានដល់ដំណាក់កាល ប្ដឹងផ្ដល់គ្នា នៅសាលាដំបូងរាជធានីភ្នំពេញ ជាមួយនឹងទូរទស្សន៍ ហង្សមាស ដែលជាផលិតករផលិតកម្មវិធី។ ទូរទស្សន៍ បានចោទតារាចម្រៀង«ហៀប»នឹងរះ ម៉ៅ ហាជី រូបនេះ ថាបានក្បត់ និងរំលោភលើកិច្ចសន្យា ដោយ​លួច​ទៅចុះកិច្ចសន្យា ជាមួយផលិតកម្មផ្សេង ខណៈកិច្ចសន្យាជាមួយ ហង្សមាស កំពុងនៅ​ជាធរមាន​នៅ​ឡើយ។

ហង្សមាស ថែមទាំងបានបញ្ជាក់ឲ្យដឹង តាមរយៈអគ្គនាយករងស្ថានីយទូរទស្សន៍ លោក មាស រិទ្ធី ថាអតីត​បេក្ខជន​របស់ខ្លួន បានមើលស្រាលចំពោះ មន្ត្រីនៅក្នុងហង្សមាសទាំងអស់ ដោយបញ្ជាក់ថា ហង្សមាស បាន​ស្នើ​ឲ្យ ម៉ៅ ហាជី មកជួបដើម្បីជជែកសម្រុះសម្រួលគ្នា តែអតីតបេក្ខជនបែរជាណាត់ហើយ មិនមក និង​ថែម​ទាំង​បិទ​ទូរស័ព្ទ ហៅមិនលើកនោះថែមទៀត។

នៅចំពោះការចោទរបស់ទូរទស្សន៍ ហង្សមាសខាងលើ លោក ម៉ៅ ហាជី បានចេញមកបកស្រាយថា លោក​មិនមានជំពាក់វ៉ាក់វិនអ្វី ដែលជាមួយទូរទស្សន៍ហង្សមាសទៀតទេ។ ឆ្លើយតបក្នុងកិច្ចសម្ភាសមួយ ជាមួយ​សារព័ត៌មាន​ក្នុងស្រុក អតីតបេក្ខជនបានអះអាងថា៖ «​ខ្ញុំបាន​គោរព​លក្ខខណ្ឌ ខេមបូឌៀន អាយឌ័ល ហើយ ​គឺ​ប្រឡង​បាន​ចប់​កម្ម​វិធី​»។

តើការថ្លែងរបស់បេក្ខជន និងទូរទស្សន៍ មានអំណះអំណាង ទៅលើអ្វីខ្លះ? សូមចូលទៅអានកិច្ចសន្យា​ទាំង​ស្រុង ដែលទំនង​ជា​ធ្វើឡើង រវាងទូរទស្សន៍ ហង្សមាស និងលោក ម៉ៅ ហាជី ហើយដែលត្រូវបានបង្ហោះ ពាស​ពេញបណ្ដាញសង្គម កាលពីពេលថ្មីៗនេះ។ សូមជម្រាបដែរថា ទស្សនាវដ្ដីមនោរម្យ.អាំងហ្វូ មិនអះអាង​ពី​ច្បាប់​ដើម នៃឯកសារកិច្ចសន្យាខាងក្រោម ថាមានភាពពិតប្រាកដ ឬយ៉ាងណានោះទេ។ តែបើតាមការធ្វើ​អត្ថាធិប្បាយ កាលពេលកន្លងមក របស់លោក មាស រិទ្ធី ទាក់ទងនឹងកិច្ចសន្យានេះ បានបង្ហាញថា ឯកសារ​ខាង​ក្រោម និងកិច្ចសន្យាដែលលោកបានអាន មានឃ្លាឃ្លោងទម្រង់ដូចគ្នា។

សូមបញ្ជាក់បន្ថែមថា ពាក្យ«កិច្ចសន្យា»បីម៉ាត់ មានន័យថា ជា«ចំណង»ដែលចងភាគីហត្ថលេខី ទាំង​សង​ខាង ឲ្យគោរពនូវអ្វីដែលភាគីទាំងនេះ បានព្រមព្រៀងគ្នា សម្រាប់ជាផលប្រយោជន៍ ឬជាហនិភ័យ ដល់​ភាគី​រៀងៗខ្លួន។ កិច្ចសន្យាអាចត្រូវបានធ្វើឡើង ច្រើនប្រភេទ ក្នុងនោះ មានកិច្ចសន្យាពាក្យសំដី កិច្ចសន្យា​សតិ​សម្បជញ្ញៈ ឬកិច្ចសន្យាសរសេរ។ កិច្ចសន្យាពាក្យសម្ដី និងកិច្ចសន្យាសតិសម្បជញ្ញៈ អាចគ្មានតម្លៃ នៅចំពោះ​ការ​តតាំង​គ្នា តាមផ្លូវតុលាការ។ តែសម្រាប់កិច្ចសន្យាសរសេរ ដូចយ៉ាងកិច្ចសន្យាផលិតកម្ម - ជួលផ្ទះ - ខ្ចី​ប្រាក់ ឬកិច្ចសន្យាផ្ទេរអចលនវត្ថុជាដើម សុទ្ធតែមានតម្លៃ អាចយកមកតតាំងគ្នា នៅចំពោះមុខចៅក្រម​ឲ្យ​កាត់​សេចក្ដី​បាន។

-------------