ISIS អំពាវនាវឲ្យប្រឆាំង អារ៉ាប៊ីសាអ៊ូឌីត និងគម្រាម អ៊ីស្ត្រាអែល
- ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី២៦ ធ្នូ២០១៥
- កែប្រែចុងក្រោយ: December 28, 2015
- ប្រធានបទ: ភេរវកម្ម
- អត្ថបទ: មានបញ្ហា?
- មតិ-យោបល់
-
អស់រយៈពេលប្រមាណជា ៧ខែហើយ ដែលប្រមុខដឹកនាំ របស់ក្រុមរដ្ឋអ៊ីស្លាម លោកអាចារ្យ អាប៊ូបាក អាល់បាងដាឌី មិនបានបញ្ចេញសម្លេងរបស់ខ្លួន មកជាសាធារណៈ។ បើតាមគេហទំព័រ «SITE» ដែលមានជំនាញខាងតាមដានចលនា និងប្រព័ន្ធផ្សព្វផ្សាយ របស់ក្រុមរដ្ឋអ៊ីស្លាម បានអះអាងថា នេះជាថ្មីម្ដងទៀត ដែលប្រមុខដឹកនាំរបស់ក្រុមភេរវជន ប្រកាន់អ៊ីស្លាមនិយមតឹង បានបញ្ចេញសម្លេងរបស់ខ្លួន ហើយត្រូវបានយកមកចែករំលែក ជាបន្តបន្ទាប់ នៅតាមបណ្ដាញសង្គម ទ្វីសធើរ នៅតាមប្រព័ន្ធទូរសាអេឡិចត្រូនិក។
ការថ្លែងរបស់ប្រមុខដឹកនាំ របស់ក្រុមរដ្ឋអ៊ីស្លាម បានធ្វើឡើង ទំនងជាបណ្ដាលមកពីភាពទ្រមខ្លួន ក្រោមការវាយសន្ធាប់ តាមផ្លូវអាកាស ពីសំណាក់កងកម្លាំងសម្ព័ន្ធមិត្ត នៅប្រទេសស៊ីរី និងអៀរ៉ាក់។ នៅក្នុងឃ្លាមួយរបស់លោក អាប៊ូបាក អាល់បាងដាឌី បានរិះគន់ប្រតិបត្តិការយោធា របស់ប្រទេសទាំង៣៤នេះ និងបានបរិហារប្រទេស អារ៉ាប៊ីសាអ៊ូឌីត ថាបានចូលរួមបង្កើតវាឡើង កាលពីថ្ងៃទី១៥ ខែធ្នូកន្លងមក ក្រោមលេសមួយ ដែលលោកហៅថា ដើម្បី«ប្រយុទ្ធប្រឆាំង នឹងភេរវនិយម»។
លោក អាប៊ូបាក បានរៀបរាប់ថា៖ «ពួកគេបានប្រកាស ពីសម្ព័ន្ធមិត្តវាយប្រហារ (...) មួយ ដែលបន្លំខ្លួនជា"អ៊ីស្លាម" និងបានអះអាងពីកម្មវត្ថុរបស់ពួកគេ គឺដើម្បីប្រយុទ្ធប្រឆាំង នឹងដែនដីព្រះជាម្ចាស់ ដែលជាសមិទ្ធផល នៃក្រុមស្ម័គ្រនឹងព្រះអាឡាហ៍ មានឈ្មោះ"រដ្ឋអ៊ីស្លាម" ស្ថិតនៅរវាងប្រទេសស៊ីរី និងអៀរ៉ាក់សព្វថ្ងៃ»។
អារ៉ាប៊ីសាអ៊ូឌីត...
ប្រមុខដឹកនាំរបស់ក្រុមជនស្ម័គ្រប្រយុទ្ធ ដើម្បីព្រះជាម្ចាស់ ឬហៅថា ជីហាដ (Djihad) បានថ្លែងក្នុងខ្សែអាត់សម្លេងនោះ ឲ្យដឹងបន្តថា៖ «ប្រសិនជាសម្ព័ន្ធមិត្តវាយប្រហារ មានលក្ខណៈជាអ៊ីស្លាមពិតប្រាកដនោះ ម្លេះវាគួរតែផ្ដល់ជ័យជំនះ និងជំនួយទាំងឡាយ ទៅឲ្យប្រជាជនស៊ីរី»។
ការបរិហារខាងលើនេះ បានផ្ដល់អំណះអំណាង ឲ្យលោកអាចារ្យ អាប៊ូបាក អាល់បាងដាឌី ចោទប្រកាន់ធ្ងន់ៗទៅលើរដ្ឋាភិបាលក្រុង រីយ៉ាដ (Ryad) របស់រាជាណាចក្រ អារ៉ាប៊ីសាអ៊ូឌីត និងបានអំពាវនាវ ទៅប្រជារាស្ត្រអារ៉ាប៊ីសាអ៊ូឌីត ឲ្យ«ងើបឡើង»ប្រឆាំងនឹងមេដឹកនាំប្រទេស របស់ពួកគេ។
អ៊ីស្ត្រាអែល...
បើគ្រាន់តែប្រទេសអារ៉ាប៊ីសាអ៊ូឌីត ដែលជាប្រទេសកាន់សាសនា អ៊ីស្លាមដូចគ្នា ក៏ត្រូវបានក្រុមរដ្ឋអ៊ីស្លាមធ្វើការគម្រាមហើយ ចុះទម្រាំប្រទេសអ៊ីស្ត្រាអែល ដែលក្រុមនេះមិនចូលចិត្តស្រាប់ផង ច្បាស់ជាមិនត្រូវបានប្រមុខដឹកនាំរបស់ក្រុមភេរវជន លើកលែងឲ្យឡើយ។ លោក អាប៊ូបាក បានគម្រាម ប្រទេសប្រកាន់សាសនាជីហ្វមួយនេះ ពីការវាយប្រហារមួយយ៉ាងចាស់ដៃ នាពេលខាងមុខ ដោយបានយកជម្លោះដ៏រ៉ាំរ៉ៃ រវាងអ៊ីស្ត្រាអែល-ប៉ាឡេស្ទីន មកធ្វើជាអំណះអំណាង នៅក្នុងខ្សែអាត់សម្លេងនោះថា ក្រុមរដ្ឋអ៊ីស្លាមមិនបានបំភ្លេច សូម្បីមួយ«វិនាទី» នូវប្រជាជនប៉ាឡេស្ទីននោះទេ។
សូមជម្រាបដែរថា ការចេញមុខជាសាធារណៈ លើកដំបូង និងចុងក្រោយបង្អស់ របស់លោក អាប៊ូបាក បានធ្វើឡើងនៅក្នុងអំឡុងរដូវក្ដៅ ឆ្នាំ២០១៤ នាក្រុង ម៉ូស៊ូល (Mossoul) បន្ទាប់ពីក្រុមរដ្ឋអ៊ីស្លាម វាយដណ្ដើមបានតំបន់ នៃភាគខាងជើងទាំងមូល របស់ប្រទេសអៀរ៉ាក់ នៅពេលនោះ៕