ជាលើកដំបូងបង្អស់ ដែលអង្គការរដ្ឋអ៊ីស្លាម ល្បីល្បាញខាងធ្វើអំពើភេរវកម្ម បានចាត់វិធានការ ទៅខ្មាំង​សត្រូវ​របស់ខ្លួន ដែលមានភេទជាស្ត្រី។ នៅថ្ងៃអង្គារនេះ ក្រុមអ្នកឃ្លាំមើលសិទ្ធិមនុស្ស នៅក្នុងប្រទេសស៊ីរី ដែលហៅ​កាត់ «OSDH» បានអះអាងថា ស្ត្រីជាតិស៊ីរីពីរនាក់ ត្រូវបានកាត់ ក ដោយក្រុមយុទ្ធជនស្ម័គ្រប្រយុទ្ធ របស់​ព្រះអាឡាហ៍ ដែលជាផ្នែកមួយ នៃអង្គការរដ្ឋអ៊ីស្លាម បន្ទាប់ពីបានចោទស្ត្រីទាំងនេះ ថាបានធ្វើ​«អំពើ​អាប​ធ្មប់»។

ប្រធានក្រុមអ្នកឃ្លាំមើលសិទ្ធិមនុស្ស លោក រ៉ាមី អាប៊ែល រ៉ាម៉ាន់ (Rami Abdel Rahmane) បាន​ថ្លែង​ឡើង​ថា៖ «ក្រុមអង្គការរដ្ឋអ៊ីស្លាម បានសម្លាប់ស្ត្រីពីរនាក់ ដោយកាត់"ក" នៅក្នុងខេត្ត ដៀអេស៊័រ។ នេះ ជា​លើក​ទី​មួយ​ហើយ ដែលក្រុមអ្នកឃ្លាំមើលរបស់យើង បានជួបប្រទះ ទាក់ទងនឹងការសម្លាប់ស្ត្រី របស់​អង្គការ​រដ្ឋ​អ៊ីស្លាម ទោះ​ជាស្ថិតក្នុងការចោទប្រកាន់ បែបណាក៏ដោយ។» លោក រ៉ាមី បានអះអាងទៀតថា ស្ត្រី​ទាំង​ពីរ​នាក់ ត្រូវ​​បាន​សម្លាប់ នៅថ្ងៃអាទិត្យ និងថ្ងៃចន្ទកន្លងមកនេះ ជាមួយនឹងស្វាមីរបស់ពួកនាង ក្រោម​បទ​ចោទ​ប្រកាន់ ថា​«បាន​ធ្វើ​អំពើ​អាប ធ្មប់ និងអំពើសីល៍»។

សម្លាប់អស់ជាង៣០០០នាក់

ក្រោមការចោទប្រកាន់ថា ជាឧក្រិដ្ឋកម្មប្រឆាំងនឹងមនុស្សជាតិនោះ ក្រុមអង្គការរដ្ឋអ៊ីស្លាម បានជាប់ឈ្មោះ​យ៉ាងល្បីល្បាញ ខាងការកាប់សម្លាប់មនុស្ស រាប់ទាំងការសម្លាប់ជាក្រុម ឬជាឯកជន ដោយការកាត់ក ឬ​ការ​ចោទដុំថ្ម ទៅលើស្ត្រី ឬដោយទារុណកម្មធ្ងន់ធ្ងរ ទៅលើជនដែលស្រឡាញ់ភេទដូចគ្នា។ ប៉ុន្តែការសម្លាប់ស្ត្រី ដោយការកាត់ ក ទើបនឹងត្រូវបានធ្វើ ជាលើកទីមួយ នាពេលនេះ។

តាំងពីដណ្ដើម​បាន​ទឹកដី នៅភាគកើតនៃប្រទេសស៊ីរី និងភាគខាងជើង នៃប្រទេសអៀរ៉ាក់ មកកាន់កាប់​នោះ​មក ក្រុមសមាជិកអង្គការរដ្ឋអ៊ីស្លាម បានសម្លាប់មនុស្ស ប្រមាណជាង ៣០០០នាក់ហើយ ក្នុងនោះ១៨០០​នាក់ ជាជនស៊ីវិល (៧៤នាក់ជាកុមារ)។ នេះបើយោងតាមរបាយការណ៍ របស់ក្រុមអ្នកឃ្លាំមើលសិទ្ធិមនុស្ស ដែល​បានឈរលើតួលេខ ផ្ដល់ដោយសមាជិក បណ្ដាញរបស់ខ្លួន អ្នកផ្ដល់ព័ត៌មាន នៅក្នុងប្រទេសទាំងពីរ និង​ប្រភព​ពីគ្រូពេទ្យ៕