បន្ទាប់ពីសកម្មជនគណបក្ស ចំនួនបីនាក់ ត្រូវបានសាលាដំបូងរាជធានីភ្នំពេញ សម្រេចដោះលែង​មកវិញ​នោះ អ្នកនាំពាក្យគណបក្សអំណាចខ្មែរ បានបង្ហាញពីជំហរ របស់គណបក្សនេះជាថ្មីថា ការប្រជែង​យក​សន្លឹក​ឆ្នោត នាពេលខាងមុខ (ការបោះឆ្នោតជ្រើសរើស ក្រុមប្រឹក្សាភូមិឃុំសង្កាត់ ឆ្នាំ២០១៧ និងការបោះ​ឆ្នោត ជ្រើសរើសតំណាងរាស្ត្រឆ្នាំ២០១៨) គណបក្សអំណាចខ្មែរ នឹងមិនមានគម្រោង ចូលរួមបោះឆ្នោត​នោះ​ឡើយ ដរាបណាការស្នើឡើង យ៉ាងហោច៥ចំណុច ក្នុងចំណោម៦ចំណុច របស់គណបក្ស មិនត្រូវបាន​រដ្ឋាភិបាល​កម្ពុជា​សព្វថ្ងៃ ទទួលយកទៅដោះស្រាយនោះទេ។

ថ្លែងក្នុងសន្និសិទ្ធសារព័ត៌មាន កាលពីថ្ងទី២៣ ខែកញ្ញា ម្សិលម៉ិញនេះ លោក ទេព វីរៈ អ្នកនាំពាក្យគណបក្ស​អំណាចខ្មែរ បានថ្លែងឡើងថា៖ «បើសិនជាការទាមទារ ប្រាំចំណុចមិនបានទេ គណបក្សអំណាចខ្មែរ មិន​ចូល​រួមបោះឆ្នោតជាដាច់ខាត។ (...) ដោយសារអី?... ដោយសារយើងអត់មាន អាប្រាំចំណុចហ្នឹងហើយ វា​អត់​មាន​យុត្តិធម៌ទេ។ ទោះបីយើងឈ្នះ ក៏មិនអាចឈ្នះដែរ ព្រោះមិនមែនជាការពិត បោះឆ្នោតគ្រាន់​តែជា​ការ​បង្រ្គប់​កិច្ច​ប៉ុណ្ណោះ។»

អ្នកនាំពាក្យ បានបង្ហាញនូវចំណុចទាំង៦នោះ ដែលបានស្នើទៅរដ្ឋាភិបាលកម្ពុជា ដើម្បីឲ្យមាន​ការដោះ​ស្រាយ​មួយ ដ៏ពិតប្រាកដនោះ រួមមាន៖ ទីមួយ ត្រូវធ្វើការកំណត់ចំនួនអាណត្តិ របស់នាយករដ្ឋមន្រ្តី ក្នុង​ការ​ដឹកនាំប្រទេស ត្រឹមតែពីរអាណត្តិយ៉ាងច្រើន។ ទីពីរ នាយករដ្ឋមន្រ្តី ត្រូវតែជ្រើសរើសដោយប្រជាពលរដ្ឋ មិនមែនដោយមន្រ្តី ក្នុងគណបក្សនយោបាយឡើយ។ ទីបី ប្រជាពលរដ្ឋកម្ពុជា មានសិទ្ធិគ្រប់គ្រាន់ ក្នុងការ​ចូលរួមបោះឆ្នោតពីក្រៅប្រទេស ដោយមិនចាំបាច់ មកបោះនៅកម្ពុជា។ ទីបួន ត្រូវរំលាយចោល នូវ​គណៈកម្មា​ធិការជាតិរៀបចំការបោះឆ្នោត (គ.ជ.ប)។ ទីប្រាំ បណ្តាជនជាតិវៀតណាម ដែលមានឈ្មោះ​បោះ​ឆ្នោត ត្រូវតែលប់ចេញពីបញ្ជីឈ្នោះ អ្នកបោះឆ្នោត។ និងទីប្រាំមួយ អាចជាប់ជាអ្នកតំណាងរាស្រ្តបាន បើ​មានការគាំទ្រពីពលរដ្ឋខ្មែរ ចាប់ពីបួនពាន់នាក់ឡើងលើ។

» សូមស្រាប់ការបកស្រាយទាំងស្រុង ដូចខាងក្រោម៖

បើតាមការបញ្ជាក់ របស់លោក ទេព វីរៈ ដដែល បានឲ្យដឹងថា លោក សួន សេរីរដ្ឋា ប្រធាន​គណបក្ស​អំណាច​ខ្មែរ ដែលទើបនឹងបង្កើតថ្មី និងទើបនឹងទទួលស្គាល់ ជាផ្លូវការ ដោយក្រសួងមហាផ្ទៃកម្ពុជា កាលពីថ្មីៗនេះ នឹង​វិលត្រឡប់មកកម្ពុជាវិញ នាថ្ងៃទី១ ខែតុលា ឆ្នាំ២០១៥ខាងមុខនេះ ប្រសិនជាគ្មានអ្វីប្រែប្រួលនោះទេ។ ការ​ឈានជើងត្រឡប់មកកម្ពុជា របស់លោក សួន សេរីរដ្ឋា នេះជាការវិលលើកដំបូង បន្ទាប់ពីលោក​ត្រូវបាន​រដ្ឋាភិបាល និងប្រព័ន្ធតុលាការកម្ពុជា តាមចាប់ខ្លួន ក្រោមបទចោទ «ទោសក្បត់ជាតិ» ពាក់ព័ន្ធនឹង​ការផ្សព្វ​ផ្សាយ រារាំងមិនឲ្យពលរដ្ឋខ្មែរទៅបោះឆ្នោត កាលពីអំឡុងឆ្នាំ២០១៣»កន្លងមក។ ប៉ុន្តែលោក សួន សេរីរដ្ឋា ត្រូវបានព្រះមហាក្សត្រកម្ពុជា លើកលែងទោស កាលពីអំឡុងខែកក្កដា ឆ្នាំ២០១៥ កន្លងមកថ្មីៗនេះ ទាំង​មិន​ទាន់បានទទួលទោស។ ការលើកលែងទោស ដែលត្រូវបាន​អ្នកតាមដាន​នយោបាយកម្ពុជា មើលឃើញថា ជាការបើកផ្លូវឲ្យលោក បង្កើតគណបក្សអំណាចខ្មែរនេះឡើង៕