គណបក្សខ្មែរអភិវឌ្ឍន៍សេដ្ឋកិច្ច ដឹកនាំដោយលោក ហួន រាជចំរើន ដែលឈរនៅលេខរៀង ទី១៤ ក្នុងសន្លឹកឆ្នោត បានចេញមុខទាត់ចោល លទ្ធផលនៃការបោះឆ្នោតជាតិ ដែលបានប្រព្រឹត្តិទៅ កាលពីថ្ងៃទី២៩ ខែកក្កដា ចុងសប្ដាហ៍មុន។ គណបក្សនេះ ដែលតាំងខ្លួនថា ជា«គណបក្សប្រឆាំង ក្នុងក្របខណ្ឌនៃរដ្ឋធម្មនុញ្ញ» ថែមទាំងព្រមានទៀតថា ខ្លួននឹងដឹកនាំធ្វើ «បាតុកម្មមិនទទួលយកលទ្ធផល» នៃការបោះឆ្នោត បើសិនជាគ្មានដំណោះស្រាយទេនោះ។

សេចក្ដីថ្លែងការណ៍ដ៏វែងអន្លាយមួយ របស់គណបក្សខ្មែរអភិវឌ្ឍន៍សេដ្ឋកិច្ច ដែលត្រូវបានចេញផ្សាយ កាលពីថ្ងៃទី៤​ ខែសីហា និងដែលធ្លាក់មកដៃអ្នកសារព័ត៌មាន បានបញ្ជាក់ពីមូលហេតុចំនួនពីរ ដែលនាំទៅដល់ការបដិសេធនេះ។ ទីមួយ ចំនួនពលរដ្ឋដែលចេញទៅបោះឆ្នោត មិនមានចំនួនដូចការប្រកាស របស់គណៈកម្មាធិការជាតិរៀបចំការបោះឆ្នោត និងទីពីរ ពលរដ្ឋដែលបោះឆ្នោត ឲ្យគណបក្សប្រជាជនកម្ពុជា មិនមានចំនួនរហូតជាង ៨៧% ដូច្នេះឡើយ។

គណបក្ស ដែលហៅកាត់តាមភាសាអង់គ្លេស «KEDP» បានពន្យល់ថា ខ្លួនមិនចង់ធ្វើបាតុកម្ម-កូដកម្មទេ ដោយចាត់ទុក ការធ្វើបាតុកម្ម-កូដកម្ម ថាជា«ចំណុចសម្លាប់ជាតិ» តែចាំបាច់ត្រូវ​ក្រោកតវ៉ា សុំឲ្យ​«រដ្ឋាភិបាល​អនុវត្ត​ច្បាប់ តាមរដ្ឋធម្មនុញ្ញ ដើម្បីលទ្ធិប្រជាធិបតេយ្យ សេរីពហុបក្ស»។

សេចក្ដីថ្លែងការណ៍ ដែលសរសេរមាន​កំហុស​អក្ខរាវិរុទ្ធជា​ច្រើន បានបញ្ជាក់ថា៖ «បើរាជរដ្ឋាភិបាល មិនមានដំណោះស្រាយទេ នៅក្រោយថ្ងៃប្រកាសលទ្ធផល នៃការបោះឆ្នោត គណបក្សខ្មែរអភិវឌ្ឍន៍សេដ្ឋកិច្ច ដែលជាបក្សប្រឆាំង សុំធ្វើបាតុកម្មតវ៉ា មិនទទួលយកលទ្ធផលជាផ្លូវការ»។

ជំហរក្នុងពេលនេះ របស់គណបក្សខ្មែរអភិវឌ្ឍន៍​សេដ្ឋកិច្ច បានដើរផ្ទុយពីអ្វី ដែលប្រធានគណបក្ស លោក ហួន រាជចំរើន ធ្លាប់បានប្រកាស នៅរដ្ឋសភា កាលពីចុងខែវិច្ឆិកា បន្ទាប់ពីទទួលបាន «កៅអីជ័យភណ្ឌ មួយកៅអី» បណ្ដាលមកពីការរំលាយ គណបក្សសង្គ្រោះជាតិ។ លោក ហួន រាជចំរើន បានថ្លែងនៅពេលនោះថា គណបក្សលោក ជាគណបក្សប្រឆាំង ដែលប្រកាន់ខ្ជាប់នូវរដ្ឋធម្មនុញ្ញ ដោយមិនលំអៀង និងមិនធ្វើអ្វីប្រាសចាក ដូចគណបក្សសង្គ្រោះជាតិមុនឡើយ។

ថ្លែងបន្ទាប់ពីចេញ ពីអង្គប្រជុំសភា​លើកដំបូង​របស់ខ្លួន ក្នុងថ្ងៃទី២៧ ខែវិច្ឆិកា ឆ្នាំ២០១៧ ប្រធានគណបក្សរូបនេះ បានបញ្ជាក់ដូច្នេះ​ថា៖ «យើងត្រូវប្រកាន់ខ្ជាប់ខ្ជួន មិនឲ្យមានបាតុកម្ម កូដកម្ម អ្វីៗទាំងអស់ ជាដាច់ខាត»។

គឺលោក ហួន រាជចំរើន នេះហើយ ដែលចេញមុខមកព្រមាន ប្រហាក់​ប្រហែលគ្នាដែរ បន្ទាប់ពីការបោះឆ្នោតជាតិ ឆ្នាំ២០១៣ ថាខ្លួននឹងដឹកនាំធ្វើ​បាតុកម្ម ប្រឆាំងបាតុកម្ម​​ជាច្រើនដង របស់គណបក្សសង្គ្រោះជាតិ។ កាព្រមាននោះ ធ្វើឡើងក្នុងសន្និសីទ​សារព័ត៌មាន​មួយ ក្នុងថ្ងៃចន្ទ ទី២១ ខែតុលា ឆ្នាំ២០១៣ ដោយមានការចូលរួម ពីមន្ត្រីរដ្ឋាភិបាល និងមានការផ្សព្វផ្សាយ យ៉ាងសម្បើមដៃ ដោយប្រព័ន្ធផ្សព្វផ្សាយ ស្និតនឹងរដ្ឋាភិបាល​គណបក្ស​ប្រជាជន​កម្ពុជា​នោះផង។

លោកបណ្ឌិត កែម ឡី បានប្រតិកម្មនៅពេលនោះ តបនឹងការព្រមាន ធ្វើ​បាតុកម្ម​ប្រឆាំងបាតុកម្ម របស់លោក ហួន រាជចំរើន ដូច្នេះថា៖ «នៅក្នុងបញ្ហានេះ មាន​អ្នកនិពន្ធតែមួយទេ តែមានតួអង្គសម្តែង ប្លែកៗគ្នាច្រើន»៕