បើតាមការអះអាង របស់លោក អេង ឆៃអៀង ប្រធានគណៈកម្មការទីមួយនៃរដ្ឋសភា បានលើកឡើងថា លោក ហេង សំរិន ប្រធានរដ្ឋសភា បានធ្វើការ«កោះប្រជុំ គណៈកម្មាធិការអចិន្ត្រៃយ៍ នៃរដ្ឋសភា» នៅម៉ោង ៨:០០ ព្រឹក ថ្ងៃទី៣០ ខែតុលា ឆ្នាំ២០១៥ មុនកិច្ចប្រជុំរដ្ឋសភាពេញអង្គ។ ក្នុងទំព័រហ្វេសប៊ុកផ្ទាល់របស់លោក ឆៃអៀង តំណាងរាស្ត្រមកពីគណបក្សប្រឆាំង បានអះអាងថា៖ «តែរបៀបវារៈ នៃកិច្ចប្រជុំគណៈកម្មាធិការ​អចិន្ត្រៃយ៍នេះ មិនត្រូវបានប្រាប់ឲ្យដឹង ជាមុនឡើយ»។

យ៉ាងណាទស្សនាវដ្តីមនោរម្យ.អាំងហ្វូ បានព្យាយាមហៅទៅលោក អេង ឆៃអៀង ក្នុងព្រឹកថ្ងៃទី៣០ ខែតុលា​នេះ ដើម្បីសុំការលំអិត តែលោកមិនបានទទួលទូរសព័្ទឡើយ។ នៅម៉ោង៨ និង៣០ នាទីព្រឹកថ្ងៃដដែលនេះ ទស្សនាវដ្តីបានហៅទៅលោក សុខ ឥសាន អនុប្រធានគណៈកម្មការទីមួយនៃរដ្ឋសភា ហើយលោកបាន​ប្រាប់ទស្សនាវដ្តីថា លោកកំពុងប្រជុំក្នុងរដ្ឋសភា ខណៈលោក ជា ប៉ូច ជាសមាជិកគណៈកម្មការទីមួយ នៃ​រដ្ឋសភាបាននិយាយថា លោករង់ចាំចូលប្រជុំរដ្ឋសភានោះ។

តាមអ្នកសារព័ត៌មានរបស់ទស្សនាវដ្តីមនោរម្យ.អាំងហ្វូ ដែលកំពុងមានវត្តមាន នៅនឹងរដ្ឋសភា ក៏បាន​បញ្ជាក់​ដែរថា នៅម៉ោងជិត៩ ព្រឹកនេះ រដ្ឋសភា បាននឹងកំពុងធ្វើការបោះឆ្នោត ក្នុងការសម្រេចចិត្តទម្លាក់ លោក កឹម សុខា ចេញពីតំណេងអនុប្រធានទីមួយ នៃរដ្ឋសភា។ ឯតំណាងរាស្រ្ត ដែលមានវត្តមានតែគឺ ៦៨រូប មក​ពី​គណបក្សប្រជាជនកម្ពុជា ឯតំណាងរាស្រ្ត៥៥រូប មកពីគណបក្សសង្គ្រោះជាតិ មិនមានវត្តមានឡើយ រួម​ទាំងលោក កឹម សុខា។

លោក កឹម សុខា ត្រូវបានសម្រេចទម្លាក់ចេញ ពីអនុប្រធានទីមួយនៃរដ្ឋសភា ក្រោមសម្លេងគាំទ្រ ៦៨ សម្លេង នៃតំណាងរាស្រ្ត មកពីគណបក្សប្រជាជនកម្ពុជា។

តាមឯកសារដែលទស្សនាវដ្តីមនោរម្យ.អាំងហ្វូទទួលបាន ការប្រជុំពេញអង្គនៃរដ្ឋសភា ដើម្បីទម្លាក់លោក កឹម សុខា ភ្លាមៗនេះ បានធ្វើឡើង បន្ទាប់ពីរដ្ឋសភាជាតិបានទទួលញត្តិ ពីប្រជាពលរដ្ឋជាច្រើនពាន់នាក់ ដែល​បានធ្វើបាតុកម្ម កាលពីថ្ងៃទី២៦ ខែតុលា ឆ្នាំ២០១៥។ ញត្តិនោះ ត្រូវបានតំណាងរាស្រ្តភាគច្រើននៃរដ្ឋសភា មកពីគណបក្សប្រជាជនកម្ពុជា ធ្វើការគាំទ្រ និងបានចេញញតិ្ត ក្នុងនាមតំណាងរាស្រ្ត ចំនួន៦១រូប ដោយ​ស្នើឲ្យមានការទម្លាក់លោក កឹម សុខា ក្នុងនោះមានលោក ប៉ែន បញ្ញា និងលោក ជាម យៀប ជាតំណាង។

ដោយឡែក តាមសេចក្តីជូនដំណឹងរបស់រដ្ឋសភា ដែលបានចេញ ក្នុងដ្ងៃទី២៧ ខែតុលា ឆ្នាំ២០១៥ នោះ មិន​បានបញ្ជាក់ ឬកមណត់ពីរបៀបវារៈ នៃការសម្រេចដកលោក កឹម សុខា ចេញពីអនុប្រធាន​រដ្ឋសភា​ឡើយ៕