ត្រី«ថុនក្រហម»នេះ មានទម្ងន់ ២២២គីឡូក្រាម ត្រូវបានគេដេញថ្លៃលក់ដាច់ នៅទីក្រុងតូក្យូ ប្រទេសជប៉ុន ក្នុងតម្លៃ១,៨ លានដុល្លា (១៥៥,៤លានយ៉េន ត្រូវជា ១,៣៨លានអ៊ឺរ៉ូ)។ បើគិតមកតម្លៃក្នុងការកាប់លក់រាយវិញ  គេត្រូវចំណាយប្រាក់​ក្នុងតម្លៃ ៨២០០ដុល្លា (ប្រមាណជា៦០០០អ៊ឺរ៉ូ) ដើម្បីទិញបានសាច់ត្រីមួយដុំ ទម្ងន់មួយគីឡូក្រាម។

លោក គីយ៉ូស្សី គីមួរ៉ា ម្ចាស់ភោជនីយដ្ឋាន ស៊ូស៊ី ជប៉ុនដ៏ល្បី។ AFP PHOTO / Yoshikazu TSUNO

ត្រីដែលមានទំហំធំគួរសម នេសាទចេញពីផ្នែកខាងជើង នៃប្រទេសជប៉ុន ត្រូវបានទិញដោយ លោក គីយ៉ូស្សី គីមួរ៉ា (Kiyoshi Kimura) ម្ចាស់ភោជនីយដ្ឋានជាច្រើន ដែលមានជំនាញខាងមុខម្ហូប ស៊ូស៊ី (Sushi ម្ហូបជប៉ុនដែលផ្សំ​ជាមួយ​ត្រី​ថុនឆៅ)។ លោក គីមួរ៉ា ធ្លាប់ឈ្នះការដេញថ្លៃម្ដងរួចមកហើយ កាលពីឆ្នាំមុន។ ប៉ុន្តែលោកហ៊ានទិញត្រីនេះ ក្នុងឆ្នាំនេះ មានតម្លៃថ្លៃជាងបីដង បើប្រៀបនឹងការដេញថ្លៃលើកមុន។

នៅចំពោះមុខអ្នកកាសែត លោកនិយាយថា «ខ្ញុំចង់ឆ្លើយតបអោយបាន នូវការទន្ទឹងរងចាំរបស់ អតិថិជនរបស់ខ្ញុំ ដែល​ចង់ទទួលទានត្រីថុន មានគុណភាពពិសេស ដូចកាលពីឆ្នាំមុន»។

ក្រុមហ៊ុនភោជនីយដ្ឋាននេះ បានចង្អុលបង្ហាញថា តម្លៃលក់ចេញ សម្រាប់មុខម្ហូបពិសេសនេះ នឹងត្រូវកំណត់ ក្នុងមួយ ស៊ូស៊ី ថ្លៃ៤០០យ៉េន (ត្រូវជា៥ដុល្លា ឬ៣,៥អ៊ឺរ៉ូ)។

ត្រី«ថុនក្រហម» ជាប្រភេទដែលរងនូវការនេសាទយ៉ាងសម្បើម ហើយក៏ជាប្រភេទត្រី ដែលលក់ដាច់ក្នុងតម្លៃថ្លៃ​ជាង​គេ​ដែរ នៅផ្សារ ជ្សូគីជី (Tsukiji)។ ជនជាតិជប៉ុន ទទួលទានប្រភេទត្រីនេះ ចំនួន១ភាគបួន នៃត្រីដែលនេសាទបាននៅក្នុង​ពិភពលោក៕

ក្បាលរបស់ត្រីថុន ដែលត្រូវគេកាត់ចេញពីខ្លួន រងចាំឡើងជ្រុញ។
AFP PHOTO / Yoshikazu TSUNO

សូមទស្សនាវីដេអូ ដែលអ្នកកាសែតបានទៅថតផ្ទាល់៖

--------------------------------------------------
ដោយ៖ សេក មនោរកុមារ - ប៉ារីស ថ្ងៃទី ០៥ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ