បើទោះជាលោក សុខ ទូច បានអះអាងថា មានតែផែនទីផ្លូវការ របស់រដ្ឋាភិបាលកម្ពុជា ដែលមានលក្ខណៈ​ផ្លួវ​ច្បាប់ សម្រាប់ការប្រើប្រាស់ នូវការវាស់វែងព្រំដែន ជាមួយប្រទេសជិតខាង យ៉ាងណាក៏ដោយ ចាំបាច់​ក្រុម​លោក​នឹងចុះផ្ទាល់ដល់ផែនដី ដើម្បីកំណត់ភាពខុស និងត្រូវនេះ។

ថ្លែង នៅក្នុងកិច្ចសម្ភាស ជាមួយអ្នកសារព័ត៌មាន នាព្រឹកថ្ងៃទី៣ ខែសីហា ឆ្នាំ២០១៥នេះ របស់លោក សុខ ទូច ប្រធានក្រុមស្រាវជ្រាវ នៃរាជបណ្ឌិតសភាកម្ពុជា ដែលជាសេនាធិការមួយ របស់រដ្ឋាភិបាលកម្ពុជា បាន​និយាយ​ថា ដោយហេតុការអះអាង នោះ ត្រូវបានធ្វើឡើង ដោយភាគីរដ្ឋាភិបាលផ្ទាល់តែម្ខាង ដូច្នេះលោកនៅ​មិន​ទាន់ ដាក់ការជឿជាក់ លើការះអាង ដោយតំណាងរដ្ឋាភិបាលនោះឡើយ ក្នុងករណីណា ដែលក្រុម​ការងារ​របស់​លោក នៅមិនទាន់បានធ្វើការ ចុះផ្ទៀងផ្ទាត់ជាក់ស្តែង រវាង«ផែនទី និងផែនដី»នោះ។

ប្រធានក្រុមស្រាវជ្រាវ ដែលអះអាង ពីឯករាជ្យភាពរបស់ខ្លួនញឹកញាប់ បានបញ្ជាក់ដូច្នេះថា៖ «ការលើក​ឡើង​របស់លោក ហោ ណាំហុង នោះជារឿងរបស់គាត់។ ឯខាងខ្ញុំ មិនទាន់ជឿអ្នកណានោះទេ។ ខ្ញុំនឹងយកអ្វី ដែល​រដ្ឋាភិបាលបានធ្វើ យកមកផ្ទៀងផ្ទាត់ នឹងការពិត។ រយៈពេលជាងពីរឆ្នាំទៀត ខាងយើងខ្ញុំ នឹងបង្ហាញ​ធាតុ​ពិត​នេះ។»

លោកអះអាងថា ការបញ្ជាក់ រវាង«ផែនទី និងផែនដី» សម្រាប់ក្រុមស្រាវជ្រាវរបស់លោក ត្រូវការ​ពេល​វេលា​ពីរឆ្នាំ។ រយៈពេល(ពីរឆ្នាំ)នេះ លោកថា ជាការចុះផ្ទាល់ដោយថ្មើរជើង ជាមួយនឹងការវាស់វែង លើ​ប្រវែង​ដី១២៧០គីឡូម៉ែត្រ (តាមព្រំដែន)។ លោកអះអាងថា សម្រាប់ក្រុមការងាររបស់លោក នៅតែទាមទារ​នូវ​ភាព​ច្បាស់លាស់ មិនមែនធ្វើតាមអ្នកនយោបាយ ក្នុងពេលធ្វើដំណើរ ទៅដល់ព្រំដែនហើយ មកវិញស្រែកថា បាត់​ដីនោះទេ។

លោក សុខ ទូច និយាយថា៖ «យើងមិនមែនគ្រាន់តែដើរ ហើយមកវិញ ស្រែកថាបាត់ដីទេ។ គ្រាន់តែមួយ​បង្គោលៗ ខ្ញុំសិក្សាពីម្សិលម៉ិញ ប្រើប្រាស់រយៈពេលមួយថ្ងៃ ចាប់ពីម៉ោង៨ព្រឹក រហូតដល់ម៉ោង៥ល្ងាច យើង​បាន​តែ​បីបង្គោលទេ នេះបង្គោលជិតៗ ចុះបើបង្គោលឆ្ងាយ? (...) មិនមែនអ្នកនយោបាយគ្រាន់តែដើរទៅ មក​ស្រែកថា បាត់ដីហើយ អាងទៅលើអ្វី?»

លោកបន្តថា ការងារដែលលោកកំពុងធ្វើ ទាក់ទងនឹងបញ្ហាព្រំដែន នាពេលនេះ ប្រវត្តិសាស្រ្ត និង«ជេរ»​ក្រុម​ការងារលោក បើសិនជាក្រុមលោកធ្វើ មិនត្រឹមត្រូវនោះ។ លោកបានអះអាងថា បើទោះបីកន្លងមក លោក​ត្រូវ​បានជនអនាមិក ធ្វើការគម្រាមសម្លាប់ តាមរយៈការផ្ញើរសារតាមទូរស័ព្ទដៃ ឬតាមបណ្តាញសង្គម របស់​លោក​ក៏ដោយ ក្រុមការងាររបស់លោក នឹងមិនបញ្ជប់នោះឡើយ ហើយលោកក៏មិនខ្លាច ចំពោះការគម្រាម​សម្លាប់​នោះ​ដែរ។ ការអះអាងនេះ ដោយលោកបានបង្ហាញការយល់ឃើញថា ទាំងនេះលោកធ្វើដើម្បីជាតិ និង​ប្រទេស​របស់​លោកតែប៉ុណ្ណោះ។

លោក​ សុខ ទូច បានបន្តទៀតថា៖ «ខ្ញុំធ្វើដើម្បីជាតិ ខ្ញុំធ្វើដើម្បីប្ររទេសរបស់ខ្ញុំ រឿងអ្វីដែលត្រូវអ្នកឯង​សម្លាប់​ខ្ញុំ។ អ្នកឯងសម្លាប់ដើម្បីអ្នកណា? អ្នកឯងសម្លាប់ ដើម្បីបំរើគណបក្សរបស់អ្នកឯង ប៉ុន្តែខ្ញុំធ្វើដើម្បីជាតិ​របស់​ខ្ញុំ។»

យ៉ាងណាលោក សុខ ទូច នៅតែអះអាងថា លោកក៏ពេញចិត្ត ចំពោះការគម្រាម ឬប៉ងសម្លាប់មកលើ​រូប​លោក បើសិនជាលោកមានកំហុសមែននោះ។ លោកបន្តថា រដ្ឋាភិបាលកម្ពុជា ត្រូវតែមានភារកិច្ចមួយ ក្នុង​ការ​ការពារ​រូប​លោក ព្រោះលោកមិនមានអ្វី សម្រាប់ការការពារខ្លួននោះឡើយ៕

» សូមស្តាប់ការបកស្រាយទាំងស្រុង របស់លោក សុខ ទូច ដូចខាងក្រោម៖