«នេះគឺជារឿងពិត... ដែលខ្ញុំចង់​ឲ្យអ្នកទាំងអស់គ្នាបានអាន នៅពេលមួយ ដែលខ្ញុំបានទៅរកគ្រូស្នេហ៍» បន្ទាប់​ពីស្នេហានាង បានបែកបាក់ដោយសារ បុរសម្ចាស់ស្នេហ៍របស់នាង បានក្បត់ចិត្តទៅមានថ្មី ដោយគ្រាន់តែ​មក​និយាយ ជាមួយនឹងយ៉ាងខ្លីថា៖ «យើងបែកគ្នាទៅ យើងមិនអាចរស់នៅ ជាមួយគ្នាបានទេ ព្រោះខ្ញុំមានអ្នកថ្មី​ហើយ»។

នេះជាការចាប់ផ្ដើមឃ្លាប្រយោគ ចេញពីបេះដូងរបស់យុវតីម្នាក់ ដែលដាក់ឈ្មោះខ្លួន នៅលើបណ្ដាញសង្គម «ព្រះច័ន្ទ - La Lune» ដើម្បីរៀបរាប់ពីបទពិសោធន៍ដ៏ជូរចត់ ដែលនាងបានឆ្លងកាត់ នៅក្នុងរយៈពេល​ប្រេះ​ស្រាំ​មួយ ជាមួយនឹងសង្សាបណ្ដូលចិត្ត ដែលនាងបានគិតថា រូបគេជាគូជីវិត ស្នេហ៍ស្និតមិនបែកបែរ។ នាង​បាន​គិត​ឃើញបែបនេះ ព្រោះសួនស្នេហ៍ដែលនាង និងម្ចាស់ចិត្តនាង បានថែរ និងសាងមក មានបង្កប់​នូវ​អនុស្សាវរីយ៍​ច្រើនរាប់មិនអស់ តាំងពីបួនឆ្នាំមកហើយ។

នាង«ព្រះច័ន្ទ - La Lune» បានថ្លែងពីបេះដូងប្រេះឆារ ពិបាកក្នុងការបំភ្លេចប្រុសម្នាក់ ដែលនាងបានដាក់​ចិត្ត​ស្រឡាញ់នោះថា៖ «ខ្ញុំដឹងថា កន្លងមកគេបោកប្រាស់ មនោសញ្ចេតនាខ្ញុំរហូត ព្រោះគេនឹងត្រូវរៀបការ ជា​មួយអ្នកថ្មី នៅចុងឆ្នាំនេះហើយ ជំនួសរូបខ្ញុំ»។ ប៉ុន្តែ«ព្រះច័ន្ទ - La Lune» នៅមិនទាន់អស់សង្ឃឹមនៅឡើយ។ នាងនៅតែព្យាយាម ធ្វើអ្វីៗគ្រប់យ៉ាង ដើម្បីឲ្យបុរសដែលនាងស្រឡាញ់ អាចវិលត្រឡប់មកវិញ។

«ព្រះច័ន្ទ - La Lune» តែងសួរខ្លូនឯង ជាញឹកញាប់ថា៖ «ខ្ញុំខុសត្រង់ណា មិនល្អត្រង់ណា ខ្ញុំអាចផ្លាស់ប្តូរបាន តាមគេត្រូវការ ចង់បានអ្វីពីខ្ញុំ ខ្ញុំឲ្យគ្រប់យ៉ាង ព្រមគ្រប់យ៉ាង សុំត្រឹមតែគេត្រឡប់មកវិញ»។ តែនៅទីបំផុត អ្វី​ដែលនាងបានទទួល គឺម្ចាស់ចិត្តកំពូលស្នេហ៍ នៅតែចាកចេញពីនាង ដោយគ្មានថ្ងៃវិលត្រឡប់ ប្រៀបបាន​នឹង​ទឹកហូរមិនត្រឡប់។

ក្នុងអំឡុងពេល នៃស្នេហាបែកបាក់ នាងមិនដែលមានចិត្តស្រស់ថ្លា រីកចិន្តាម្តងណាឡើយ។ នាង «ព្រះច័ន្ទ - La Lune» បានស្រដីថា៖ «ខ្ញុំពិតជាតប់ប្រម៉ល់មួម៉ៅណាស់ ធ្វើអ្វីក៏ខុសគ្រប់យ៉ាង រហូតដល់ថ្ងៃមួយ មិត្តភក្តិ​ខ្ញុំ​បានណែនាំឲ្យខ្ញុំ ទៅរកគ្រូស្នេហ៍ ទាំងដែលខ្ញុំមិនធ្លាប់ជឿ រឿងមន្តអាគមអូមអាម ទាំងនោះផង»។ តែបើ​និយាយ​បែបផ្សេង សេចក្ដីស្នេហាបានប្ដូររូបនាង ជាពិសេសធ្វើឲ្យនាងទន់ជ្រាយ រហូតដល់បាត់បង់​សតិ​សម្បជញ្ញៈ។ ស្នេហាបានបាំងភ្នែកនាង ឲ្យព្រមធ្វើអ្វីគ្រប់យ៉ាង ដើម្បីសុំត្រឹមតែបានបុរស ដែលនាងស្រឡាញ់ ត្រឡប់​មក​វិញ​ដូចដើម។

ក្នុងពេលទៅរកគ្រូស្នេហ៍ ជាមួយមិត្តភក្កិ នាង«ព្រះច័ន្ទ - La Lune»បានគិតថា អស់អ្វីក៏អស់ចុះ សំខាន់​គឹ​បុរស​ជាទីស្រឡាញ់ នឹងត្រឡប់មករៀបការ ជាមួយនាងវិញនៅចុងឆ្នាំនេះ។ ខុសស្រឡះ! អ្វីៗមិនបានដូចការគិត របស់​នាងទេ ព្រោះគ្រូស្នេហ៍អូមអាមនោះ បានសួរមកនាងថា៖ «ស្រលាញ់គេណាស់ពេលនេះ ចិត្តសោកសៅ ច្របូកច្របល់គិតចង់សំលាប់ខ្លួន... ចង់បានគេ ត្រលប់មកវិញ(មែនឬ)ទេ?» «ចង់បាន លោកគ្រូ» នាង«ព្រះច័ន្ទ - La Lune» បានឆ្លើយភ្លាម ព្រោះវាជាអ្វីដែលបេះដូងនេះ បានប្រាប់នាង​ឲ្យឆ្លើយ។ គ្រូស្នេហ៍ បានស្រដីបន្ត ដោយ​សម្តីមុតៗថា៖ «បើចង់បាន លោកគ្រូជួយ តែត្រូវជួលណា! មានលុយប៉ុន្មាន?» នាងឆ្លើយប្រាប់ទាំងកុហកថា «៥០ដុល្លារលោកគ្រូ»។

បន្ទាប់ពីសូត្របាលីអេចអូច ចេញពីមាត់បន្តិចក្រោយមក គ្រូស្នេហ៍បានគំហកមកវិញថា លុយនៅក្នុង​កាបូប​នាងទាំងអស់ ១៥០ដុល្លា ចំណែកសៀវភៅធនាគារបស់នាង មានលុយច្រើនទៀត បើសរុបទាំងអស់ នាង​មាន​៨០០ដុល្លា។ «ព្រះច័ន្ទ - La Lune»​ភ្ញាក់ព្រើត ព្រោះពាក្យសម្តី ដែលគ្រូស្នេហ៍បាននិយាយ ជាការ​ពិត​ទាំង​អស់។ ប៉ុន្តែយ៉ាងហោចណាស់ ការគំហករបស់គ្រូស្នេហ៍ បានធ្វើឲ្យនាងមានទំនុកចិត្តជាងមុន ហើយនៅបន្ត​គិតថា អស់ប៉ុន្មានក៏មិនខ្វល់ដែរ សំខាន់គឺបានមនុស្ស​​ជាទីស្រឡាញ់មកវិញ។

គ្រូស្នេហ៍បានទាមទារថ្លៃឈ្នួល ពីអតិថិជនវ័យក្មេងមួយនេះ៨០០ដុល្លា ជាថ្នូរនឹង​លក្ខខណ្ឌ​ចំនួន៤ សម្រាប់រយៈពេល១៥ថ្ងៃ។ បើនាង​អាច​បំពេញ​លក្ខខណ្ឌទាំងនេះបាន មិនឲ្យធ្លោយនោះ បុរសកំពូល​ស្នេហ៍នឹង​ត្រឡប់មករកនាង ដោយខ្លូនឯង។ នាង​«ព្រះច័ន្ទ - La Lune» បានសម្រេចធ្វើតាមទាំងអស់ មិនថាលក្ខខណ្ឌ​ទាំង​បួននោះជាអ្វីឡើយ។

នេះជាលក្ខខណ្ឌទាំងបួន៖ «១- រាល់ថ្ងៃព្រឹកឡើង ឲ្យខ្ញុំដើរ៩៩៩ជំហ៊ាន ឲ្យរាប់មួយជំហ៊ានៗមិនឲ្យខុស បើ​មិន​ច្បាស់ ឲ្យចាប់ផ្តើមរាប់សារជាថ្មី។ ២- មុនចូលគេង ត្រូវសូត្រមន្ត៩៩ចប់។ ៣- ឲ្យនិយាយទៅកាន់ ឪពុកឬ​ក៏​ម្តាយ​រាល់ថ្ងៃ ឲ្យនិយាយប្រាប់រឿងគ្រប់យ៉ាងឲ្យអស់ ហាមមិនអោយលាក់បាំង ឬកុហកដាច់ខាត។ ៤- មិន​អោយ​ធ្វើដឹងឮ ឬនិយាយស្តី ជាមួយសង្សារដាច់ខាត ក្នុងអំឡុងរយៈពេល ១៥ថ្ងៃ។» បម្រាម៖ បើខុស​តំណម​ណាមួយ ត្រូវចាប់ផ្តើមរាប់ម្តងទៀត រហូតគ្រប់១៥ថ្ងៃ។

ក្រោយការអនុវត្តន៍១៥ថ្ងៃ នាង «ព្រះច័ន្ទ - La Lune» បានត្រឡប់ទៅជួបគ្រូស្នេហ៍វិញ ទាំងចិត្តស្រលះ​ជាង​មុន​បន្តិច។ រួចរាល់ គ្រូស្នេហ៍បានសួរនាង នូវសំនួរក្នុងចិត្តជាច្រើន តាមអ្វីដែលបានអនុវត្តន៍កន្លងទៅ។ នាង​ឆ្លើយ​ទាំង​ទឹកភ្នែក ដោយយល់ឃើញខ្លូនឯងថា ហេតុអ្វីនាងចាំបាច់ អោយមនុស្សម្នាក់នោះមានឥទ្ធិពល មកលើ​ជីវិតខ្លួន​ឯង​ដល់ថ្នាក់នេះ ខំធ្វើគ្រប់យ៉ាង​ដើម្បីគេ រហូតមិនបានគិតអ្វីសោះ ពីខ្លួនឯង និងពីមនុស្សសំខាន់​ផ្សេង​ទៀត នៅក្បែរខ្លួន (មានដូចជា​ឪពុកម្ដាយជាដើម)។

ចុងក្រោយគ្រូស្នេហ៍បានលូកដៃ ទៅក្នុងថង់យាមយកលុយ៨០០ដុល្លា ហុចមកអោយនាងវិញ រួចប្រាប់ថា៖ «បើ​​យើងមិនរឹងមាំនោះ (...) បើយើងព្រមចុះចាញ់វា នោះយើងនឹងចុះចាញ់ ពេញមួយជីវិត។ បើយើងយក​ឈ្នះ​វាបាន បញ្ជាវាបាននោះ យើងនឹងមិនមានទុក្ខទៀតទេ។ គ្មានអ្នកណាជួយយើងបានទេ ពេទ្យនៅកន្លែង​ណា ក៏​មិនអាចព្យាបាល (ជំងឺនេះឲ្យ) ជាបានដែរ មានតែខ្លួនយើង និងពេលវេលាប៉ុណ្ណោះ ដែលជួយខ្លួនយើង​បាន។»។

គ្រូស្នេហ៍អូមអាម បានប្រាប់ទៅតួស្រីកំសត់ថា៖ «ឈប់! ហាមទៅធ្វើស្នេហ៍ នៅកន្លែងផ្សេងទៀត ត្រូវចាំ​ពាក្យ​លោកគ្រូនៅក្នុងចិត្តណា» រួចប្រាប់បន្ថែមថា ប្រាក់៨០០ដុល្លារនេះ នាង«ព្រះច័ន្ទ - La Lune» ត្រូវផ្ញើរទៅ​ម្តាយ​នាង៦០០ដុល្លារ សល់២០០ដុល្លា នាងយកទៅទិញសម្លៀកបំពាក់ តុបតែងកាយឲ្យស្អាតចុះ ល្ងាចនេះ សង្សា​នាងនឹងត្រឡប់ មករកនាងជាមិនខាន។

ពិតដូចជាអ្វី ដែលគ្រូស្នេហ៍និយាយមែន ព្រោះបុរស ដែលនាង​«ព្រះ​ច័ន្ទ - La Lune» គិតពីពេលមុន ថាជាម្ចាស់កំពូលដួងចិត្តនោះ បានត្រឡប់មករកនាងមែន។ តែពេលនេះ បុរស​នេះលែងជា«ម្ចាស់កំពូលស្នេហ៍ស្និត» របស់នាងនោះទៀតហើយ។ នាង«ព្រះច័ន្ទ - La Lune» នៅ​ចាំ​សម្តី​ទាំង​ប៉ុន្មានរបស់គ្រូស្នេហ៍ ហើយយកមកពិចារណា ជាមួយបុរសម្នាក់នេះដោយស្មារតីរឹងមាំ។ ដោយសារ​អ្វី?  ព្រោះ​បុរស​នេះ ធ្លាប់បានក្បត់ចិត្តនាងម្តងរួចទៅហើយ៕

កំណត់សម្គាល់៖ អត្ថបទនេះ ជាការដកស្រង់ ចេញពីការថ្លែងរៀបរាប់ របស់នាង «ព្រះច័ន្ទ - La Lune» នៅ​លើបណ្ដាញសង្គម ដែលជាបទពិសោធន៍ដ៏ល្អមួយ សម្រាប់រាល់យុវវ័យគ្រប់រូប។ ប៉ុន្តែទស្សនាវដ្ដី​មនោរម្យ.​អាំងហ្វូ តាមរយៈអ្នកនិពន្ធរបស់ខ្លួន បានធ្វើការកែសម្រួល និងបន្ថែមបន្ថយពាក្យពេជ្រ ដើម្បីឲ្យអត្ថបទ កាន់​តែ​មាន​មនោរម្មណ៍ ស្រួលអាន និងងាយយល់។

» ចំណងដៃចុងក្រោយ ជាមួយនឹងចម្រៀង «បងជាអ្នកធ្វើឲ្យខ្ញុំយំ» បកស្រាយដោយនាង រស់ សេរីសុទ្ធា៖