នាយកប្រតិបត្តិ នៃអង្គការតម្លាភាពកម្ពុជា លោក ព្រាប កុល បានលើកឡើងថា បើគណបក្សនយោបាយ​ណា​មួយ មិនបានបង្ហាញនូវគោលនយោបាយ ពាក់ព័ន្ធនឹងកិច្ចខំប្រឹងប្រែងចូលរួម ទប់ស្កាត់ ឬប្រឆាំងនឹង​អំពើ​ពុក​រលួយនោះទេ គណបក្សនោះនឹងមិនអាច ទទទួលបាននូវការគាំទ្រ ពីប្រជាពលរដ្ឋនោះឡើយ។

ការថ្លែងរបស់លោក បានធ្វើឡើង នៅក្នុងសិក្ខាលាលាមួយស្តីពី «ការស្វែងយល់អំពីអំពើពុករលួយ និង​វិធី​សាស្រ្តក្នុងការទប់ស្កាត់ក្នុងបរិបទប្រទេសកម្ពុជា» កាលពីព្រឹកថ្ងៃទី២៥ ខែសីហា ឆ្នាំ២០១៥ នា​ការិយាល័យ​នៃវិទ្យស្ថានខ្មែរ សំរាប់សហប្រតិបត្តិការ និងសន្តិភាព។

លោក ព្រាប កុល បាននិយាយចុចចំ ទៅគណបក្សកាន់អំណាច ឬរដ្ឋាភិបាល ថាបានបង្ហាញនូវគោល​នយោបាយ នៃការទប់ស្កាត់អំពើពុករលួយ នៅកម្ពុជា ក្នុងកម្មវិធីគោលនយោបាយរបស់ខ្លួនហើយ តែចាំបាច់ ក៏ត្រូវបង្ហាញនូវសកម្មភាព «ទប់ស្កាត់ជាក់ស្តែង» ក្រោមកិច្ចដឹកនាំរបស់ខ្លួនដែរ។ យ៉ាងណា លោកទទួល​ស្គាល់ថា មានបញ្ហាពិបាកខ្លះ ក្នុងការទប់ស្កាត់ ព្រោះតែកម្ពុជា បានកើតនូវបញ្ហាពុករលួយនេះបាន «ចាក់​ស្រេះ» ក្នុងសង្គមកម្ពុជាជាយូរមកហើយ។

មេដឹកនាំអង្គការខាងលើ បានបញ្ជាក់ថា៖ «ការកែទម្រង់ ត្រូវការពេលវេលា។ តែពេលខ្លះ ប្រជាពលរដ្ឋ​ត្រូវ​ការ​ភ្លាមៗ។ (...) ជាក់ស្តែងការកំណែទម្រង់ ត្រូវមានឧបសគ្គ។ យើងទទួលស្គាល់ថា មានឧបសគ្គដែរ តែក៏ចង់​ឃើញ រាជរដ្ឋាភិបាលចាត់វិធានការ ដោះស្រាយបញ្ហានីមួយៗ ទៅលើវិស័យធំៗ ឲ្យបានច្រើន ហើយមាន​តម្លាភាព។»

នាយកប្រតិបត្តិ នៃអង្គការតម្លាភាពកម្ពុជារូបនេះ បានស្នើទៅកាន់រដ្ឋាភិបាល ឲ្យបង្ហាញនូវបញ្ហា ឬភាពជាប់​គាំង​របស់ខ្លួន ក្នុងការទប់ស្កាត់អំពើពុករលួយនៅកម្ពុជា ជាសាធារណៈ ដើម្បីស្វែងរកដំណោះស្រាយជា​បន្ត និងមិនគប្បី ធ្វើការជាលាក់កំបាំង ឬបិទចោល មិនដោះស្រាយនោះឡើយ។ លោកបានបង្ហាញ នូវឧទាហរណ៍​មួយចំនួន ពីភាពរាំងស្ទះនេះថា ដូចករណីខ្វះកម្លាំងមនុស្ស ខ្វះក្រុមបច្ចេកទេស ឬខ្វះថវិការជាដើម ដែលត្រូវ​តែបង្ហាញ ដើម្បីស្វែងករការដោះស្រាយ។

លោក ព្រាប កុល បានថ្លែងឲ្យដឹងទៀតថា៖ «បើកាលណាយើងដឹង យើងអាចជួយគាត់ ស្វែងរកដំណោះ​ស្រាយ (...) និងធ្វើការ ពន្យល់ប្រជាពលរដ្ឋឲ្យដឹងថា រដ្ឋាភិបាលខិតខំប្រឹងប្រែងដែរ... ហើយជួបបញ្ហាយ៉ាង​ដូច្នេះ»៕

» សូមទស្សនាការបកស្រាយទាំងស្រុង របស់លោក ព្រាប កុល ដូចខាងក្រោម៖

» សូមទស្សនាស្ពតវីដេអូមួយ ស្ដីពីអំពើពុករលួយ នៅសាលាបឋមសិក្សា ដូចខាងក្រោម៖