«អភ័យឯកសិទ្ធិ សមាជិកព្រឹទ្ធសភា» មិនអាចធ្វើការរារាំង ការចោទប្រកាន់ ការចាប់ខ្លួន ការឃាត់ខ្លួន ឬការឃុំ​ខ្លួន ក្នុងករណីប្រព្រឹត្តបទលើ្មស ព្រហ្មទណ្ឌ«ជាក់ស្តែង» ឡើយ។ នេះជាការថ្លែងឡើង របស់លោក គឹម សន្តិភាព អ្នកនាំពាក្យក្រសួងយុត្តិធម៌ ដោយបានអះអាង ពីរដ្ឋធម្មនុញ្ញ ត្រង់មាត្រា១០៤ថ្មី នឹងមាត្រា១២ នៃ​ច្បាប់​ស្តី​ពី​លក្ខន្តិកៈ នៃសមាជិកព្រឹទ្ធសភា។

ការថ្លែងរបស់អ្នកនាំពាក្យខាងលើ ជាការឆ្លើយតបទៅនឹងមេធាវីម្នាក់ ដែលបានលើកឡើងថា ការចាប់ខ្លួននេះ ត្រូវបានធ្វើឡើង ដោយរំលោភមាត្រា១០៤ នៃរដ្ឋធម្មនុញ្ញ។ លោក គឹម សន្តិភាព បានពន្យល់ថា សម្រាប់​ករណី​«បទល្មើសព្រហ្មទណ្ឌជាក់ស្តែង» គ្រប់បុគ្គលទាំងអស់ អាចចាប់ខ្លួនជននោះ ទៅប្រគល់ជូនមន្ត្រីនគរបាល​យុត្តិធម៌ ដែលនៅជិតបំផុត នេះបើយោងតាមមាត្រា៨៧ នៃក្រមនីតិវិធីព្រហ្មទណ្ឌ។

អ្នកស្រីមេធាវី ម៉េង សុធារី បានលើកឡើងបន្ទាប់ ពីក្រុមសមត្ថកិច្ច បាននាំខ្លួនលោក ហុង សុខហួរ ទៅកាន់​ពន្ធនាគារ ក្នុងកិច្ចសម្ភាស ជាមួយអ្នកសារព័ត៌មានដូច្នេះថា៖ «គាត់ (ហុង សុខហួរ) មិនទាន់ត្រូវបានព្រឹទ្ធសភា ដកអភ័យឯកសិទ្ធិនៅឡើយទេ។ (...) តំណាងអយ្យការក៏ចោទសួរ នៅក្នុងអភ័យឯកសិទ្ធិ ព្រឹទ្ធិសភាផង​ដែរ។ ខុសទៅនឹងមាត្រា១០៤ នៃរដ្ឋធម្មនុញ្ញ។»។

តបនឹងការលើកឡើងនេះ អ្នកនាំពាក្យក្រសួងយុត្តិធម៌ បានឲ្យថ្លែងឡើងថា៖ «ការសម្រេចចាប់ខ្លួន និងឃុំខ្លួន ជាអំណាចតុលាការ រីឯការអនុវត្តន៏​សេចក្តីសម្រេចនេះ ជាសមត្ថកិច្ច របស់អំំណាចនីតិប្រតិបត្តិ ដែលមាន​កម្លាំង​សាធារណ: (នគរបាល កងរាជអាវុធហត្ថ និងមន្ត្រីពន្ធនាគារ) ជាអ្នកអនុវត្តផ្ទាល់!»

អ្នកនាំពាក្យក្រសួងយុត្តិធម៌ បានបន្ថែមទស្សនៈរបស់ខ្លួន តាមបណ្តាញសង្គមថា អ្នកនយោបាយត្រូវនៅ​ឲ្យ​ឆ្ងាយ ពីទង្វើណាមួយដែលល្មើសច្បាប់។ លោក គឹម សន្តិភាព បានឲ្យដឹងទៀតថា៖ «អ្នកនយោបាយ មិន​គួរ​លេងសើច ជាមួយទង្វើរ ដែលជាអំពើល្មើសនោះទេ! យុទ្ធសាស្ត្រយោបាយ មានច្រើន មិនគួរជ្រើសរើស ផ្លួវដើរ​បែបនេះ! ច្បាប់មិនបានកំណត់ អោយអ្នករួចខ្លួន ពីអំពើល្មើស ដោយសារតែអ្នក ជាអ្នកនយោបាយនោះទេ!»

មេធាវីម្នាក់ ក្នុងចំណោមមេធាវីទាំងបួន ការពារលោក ហុង សុខហួរ គឺលោកមេធាវី ជួង ជូងី បានថ្លែង បន្ទាប់​ពីកូនក្តីរបស់លោក ត្រូវបានបញ្ជូនដល់ពន្ធនាគារព្រៃសរថា ការសម្រេចឃុំខ្លួនកូនក្តីលោក នាពេលនេះ មិន​ត្រូវបានអនុវត្តតាមច្បាប់ឡើយ ព្រោះកូនក្តីរបស់លោក ជាសមាជិកព្រឹទ្ធសភា។

មេធាវី ជួង ជូងី បានបន្តថា លោកនឹងស្នើសុំ ឲ្យកូនក្តីរបស់លោក បាននៅក្រៅឃុំ ពីសាលាឧទ្ធណ៍ តាមច្បាប់​កំណត់។ លោកមេធាវីបានលើកឡើងថា កូនក្តីរបស់លោក ត្រូវបានតុលាការចោទប្រកាន់ ចំនួនបីបទល្មើស ដែលរួមមាន ក្លែងឯកសារសាធារណៈ ប្រើប្រាស់ឯកសារក្លែង និងញុះញង់ បង្កឲ្យមានភាពវឹកវរ ដល់សន្តិសុខ​សង្គម។ ឯអ្នកស្រីមេធាវី ម៉េង សុធារី បានលើកឡើងថា ក្រុមមេធាវីនឹងបន្តការពិភាក្សាគ្នា តាមនីតិវិធីច្បាប់ ជាបន្តបន្ទាប់ទៀត។ តែអ្នកស្រីបានបង្ហាញ នូវការខកចិត្តថា មកទល់ពេលនេះ សូម្បីមេធាវី ក៏មិនមានការ​អនុញាត ឲ្យបានជួបកូនក្តី (លោក ហុង សុខហួរ) របស់ខ្លួន នៅឡើយដែរ។

ចំពោះគម្រោងសុំអភ័យទោស ជាយថាហេតុ ពីសំណាក់លោក ហុង សុខហួរ ត្រូវបានអ្នកនាំពាក្យ​ក្រសួង​យុត្តិធម៌ លោក កឹម សន្តិភាព លើកយកក្រមនីតិវិធីព្រហ្មទណ្ឌ មាត្រា៧ មកបង្ហាញថា មានការកំណត់​នូវ​មូលហេតុ នៃការរំលត់បណ្តឹងអាជ្ញា តែក្នុងនោះ បណ្តឹងអាជ្ញា មិនត្រូវបានរំលត់ តាមការ​«សុំអភ័យទោស» ឬក្នុងនាមជា«អ្នកនយោបាយ»ឡើយ។ លោកថា ការរំលត់បណ្តឹងអាជ្ញា មានប្រាំចំនុចរួមមាន មរណ:ភាព​នៃជនល្មើស, ការផុតអាជ្ញាយុកាល, ការលើកលែងទោសជាទូទៅ, និរាករណ៍នៃច្បាប់ព្រហ្មទណ្ឌ, អាជ្ញាអស់​ជំនុំ។ លោក គឹម សន្តិភាព បានឲ្យដឹងបន្ថែមថា៖ «ការសូមអភ័យទោស មិនមែនជាមូលហេតុ នាំអោយ​រំលត់​បណ្តឹងអាជ្ញានោះទេ! ការដឹងកំហុសហើយ ចូលមកសារភាព ចំពោះមុខតុលាការ អាចជាកាល:ទេស: ផ្តល់​ឲ្យ​ចៅក្រមពិចារណា ក្នុងការផ្តល់នូវស្ថានសម្រាលទោស!»

តាមមាត្រា១០៤ នៃរដ្ឋធម្មនុញ្ញ បានចែងថា៖ «សមាជិកព្រឹទ្ធសភា មានអភ័យឯកសិទ្ធិសភា។ សមាជិក​ព្រឹទ្ធសភា​រូបណាក៏ដោយ មិនអាចត្រូវបានចោទប្រកាន់ចាប់ខ្លួន ឃាត់ខ្លួន ឬឃុំខ្លួន ដោយហេតុ ពីបានសំដែង​យោបល់ ឬបញ្ចេញមតិ ក្នុងការបំពេញមុខងារ របស់ខ្លួនសោះឡើយ។ ការចោទប្រកាន់ ការចាប់ខ្លួន ការឃាត់​ខ្លួន ឬការឃុំខ្លួនសមាជិកណាមួយ នៃព្រឹទ្ធសភា នឹងអាចធ្វើទៅកើត លុះត្រាតែមានការយល់ព្រម ពីព្រឹទ្ធសភា ឬពីគណៈកម្មាធិការអចិន្ត្រៃយ៍ របស់ព្រឹទ្ធសភា ក្នុងចន្លោះសម័យប្រជុំនៃព្រឹទ្ធសភា វៀរលែង តែក្នុងករណី​បទ​ល្មើសព្រហ្មទណ្ឌជាក់ស្ដែង។ ក្នុងករណីចុងក្រោយនេះ ក្រសួងមានសមត្ថកិច្ច ត្រូវធ្វើសេចក្ដីរាយការណ៍​ជូន​ព្រឹទ្ធសភា ឬជូនគណៈកម្មាធិការអចិន្ត្រៃយ៍ របស់ព្រឹទ្ធសភាជាបន្ទាន់ ដើម្បីសម្រេច។ សេចក្ដីសម្រេច របស់​គណៈកម្មាធិការអចិន្ត្រៃយ៍ របស់ព្រឹទ្ធសភា ត្រូវដាក់ជូនសម័យប្រជុំព្រឹទ្ធសភាខាងមុខ ដើម្បីអនុម័តតាមមតិ​ភាគច្រើនពីរភាគបី នៃសមាជិកព្រឹទ្ធសភាទាំងមូល។»៕