នៅព្រឹកថ្ងៃទី ១៧ ខែសីហា ឆ្នាំ២០១៥ យុវជនបីរូប ដែលជាសមាជិកនៃចលនាមាតាធម្មជាតិ ត្រូវបាន​អាជ្ញាធរ​ស្រុកបទុមសារគរ ចាប់ខ្លួននៅភូមិធ្នុង ឃុំកណ្តោល ស្រុកបទុមសាគរ ខេត្តកោះកុង។ យុវជនទាំងបីមានឈ្មោះ សាន់ ម៉ាឡា - ទ្រី សុវិគា និង សំណាង។ នេះបើតាមការអះអាង របស់សមាជិកមួយរូប របស់ចលនានេះ។

សមាជិកនៃចលនាមាតាធម្មជាតិ លោក តារា បានប្រាប់ទស្សនាវដ្តីមនោរម្យ.អាំងហ្វូថា មុនការចាប់ខ្លួនបីថ្ងៃ ខាងអធិការដ្ឋាននគរបាលស្រុកបទុមសាគរ បានផ្ងើលិខិតចំនួនបី ឲ្យលោក សាន់ ម៉ាឡា - ទ្រី សុវិគា និងលោក សំណាង ដើម្បីធ្វើការសាកសួរ។ លោកបានមន្ថែមទៀតថា ឥឡូវពួកគេទាំងបី ត្រូវបានចាប់បញ្ជូនខ្លួន ទៅ​ស្នងការ​​ដ្ឋាន​នគរបាលស្រុកបទុមសាគរ បន្ទាប់មកទៅស្នងការខេត្ត ចុងក្រោយបញ្ជូន ទៅដល់​សាលា​ដំបូង​ខេត្ត។

យុវជនទាំងបីត្រូវបានឃាត់ខ្លួន នៅពេលដែលពួកគេព្យាយាម ចូលទៅមើលសកម្មភាពបូមខ្សាច់ របស់​ក្រុមហ៊ុន​ចំនួនពីរ មានឈ្មោះ Direct action co.ltd និង International Rambo co.ltd ហើយពួកគេបាន​ប៉ុន​ប៉ង សុំឲ្យក្រុមហ៊ុននេះ បញ្ឈប់សកម្មភាពបូមខ្សាច់ ដោយពួកគេយល់ថា វាបានធ្វើឲ្យប៉ះពាល់ ដល់បរិស្ថាន និង​ប្រយោជន៍របស់ប្រជាជន នៅទីនោះ។ លោក តារា បាននិយាយទៀតថា ពួកគាត់មិនដឹងថា សាលា​ដំបូង​នឹង​មានវិធានការយ៉ាងណា ចំពោះអ្នកទាំងនោះទេ ព្រោះកម្លាំងប៉ូលិសមិនអនុញ្ញាត ឲ្យចូលទៅមើល​ឡើយ សូម្បី​តែអ្នកពត័មាន និងអង្គការសង្គមស៊ីវិល ក៏មិនឲ្យយកពត័មានដែរ។

យ៉ាងណាក៏ដោយ សមាជិកចលនាមាតាធម្មជាតិរូបនេះ បានបញ្ជាក់ថា ចលនារបស់លោក មិនមានបំណង ចង់រារាំងការអភិវឌ្ឍន៍ របស់រដ្ឋាភិបាលទេ តែអ្វីដែលសំខាន់ គ្រាន់តែសុំឲ្យមានការគិតគូរ ដល់ផល​ប៉ះពាល់​ទៅលើប្រយោជន៍ របស់ប្រជាពលរដ្ឋប៉ុណ្ណោះ។ ហើយចលនារបស់លោក នឹងគ្រោង​ធ្វើយុទ្ធនាការនៅ​តាម​ស្ថានទូត នៃប្រទេសដែលទិញខ្សាច់ ពីក្រុមហ៊ុនទាំងនោះ មានប្រទេសសិង្ហបុរីជាដើម។ លោក តារា បាន​និយាយថា៖ «ខ្ញុំសង្ឃឹមថា ប្រទេសសិង្ហបុរី នឹងសម្រេចចិត្តផ្អាកការទិញ ពីក្រុមហ៊ុនទាំងនោះ ព្រោះវាបង្ក​ផល​ប៉ះពាល់ ដល់ប្រជាជន»។

មិនអាចស្វែងរកការបកស្រាយ ពីអធិការនគរបាលស្រុកបទុមសាគរ ខេត្តកោះកុងបានទេនៅពេលនេះ៕