អតីតប្រធានសាលាដំបូងរាជធានី អាំង មាលតី ត្រូវបានឃាត់ខ្លួន
- ដោយ: ដារា រិទ្ធ អត្ថបទ៖ ដារា រិទ្ធ ([email protected]) - ភ្នំពេញ ថ្ងៃទី១៥ សីហា ២០១៥
- កែប្រែចុងក្រោយ: August 15, 2015
- ប្រធានបទ: ពុករលួយ
- អត្ថបទ: មានបញ្ហា?
- មតិ-យោបល់
-
កាលពីថ្ងៃទី១៤ ខែសីហាម្សិលមិញ វេលាម៉ោងប្រមាណជា ១២ថ្ងៃត្រង់ លោក អាំង មាលតី អតីតប្រធានសាលាដំបូង រាជធានីភ្នំពេញ ត្រូវបានឃាត់ខ្លួនដើម្បីសាកសួរ នៅអង្គភាពប្រឆាំងអំពើពុករលួយ។ នេះបើតាមការបញ្ជាក់ របស់លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ ដែលត្រូវបានស្រង់សម្ដីដោយសារព័ត៌មាន ក្នុងស្រុក។
លោក យ៉ិនទៀង បានបញ្ជាក់ទៀតថា តាមច្បាប់កម្ពុជា លោក មាលតី អាចនឹងត្រូវឃាត់ទុក ក្នុងរយៈពេល៤៨ម៉ោង មុននឹងបញ្ជូនខ្លួន ទៅកាន់តុលាការ។ លោកទេសរដ្ឋមន្ត្រី ដែលទទួលបន្ទុកការប្រឆាំងអំពើពុករលួយរូបនេះ បានថ្លែងឲ្យដឹងថា លោក អាំង មាលតី ត្រូវបានអង្គភាពលោករកឃើញ ថាបានជាប់ពាក់ព័ន្ធទៅនឹងបទនីតិក្រម ដែលជាបទល្មើសអំពើពុករលួយ។
ប៉ុន្តែប្រធានអង្គភាពប្រឆាំងអំពើពុករលួយ មិនបានអះអាងថា តើនឹងត្រូវបញ្ជូនខ្លួនលោក អាំង មាលតី ទៅកាន់តុលាការនៅពេលណា ឬយ៉ាងណានោះឡើយ ដោយលោកគ្រាន់តែថ្លែងថា កំពុងតែធ្វើតាមនីតិវិធី។
សូមរំលឹកឡើងវិញថា នៅប៉ុន្មានម៉ោង ក្រោយប្រតិកម្មរបស់លោក ហ៊ុន សែន កាលពីថ្ងៃទី១៨ ខែកុម្ភៈ ទាក់ទងនឹងសំណុំរឿងដោះលែង ឪពុកម្តាយលោកឧកញ៉ា ថោង សារ៉ាត់ នោះ លោក អាំង មាលតី ត្រូវបានដកចេញពីតំណែង ជាប្រធានសាលាដំបូងរាជធានីភ្នំពេញ ហើយត្រូវបានផ្ទេរភារកិច្ច មកកាន់ក្រសួងយុត្តិធម៌វិញ។
នៅក្នុងសំនុំរឿងដ៏ស្មុគ្រស្មាញនោះ លោក ពេជ្រ ព្រហ្មមុនី អតីតឧត្តមសេនីយ៍យោធាផ្កាយ១ មួយរូប ដែលគេស្គាល់ថាជាជំនួយការ និងជាមនុស្សជំនិត របស់លោក អាំង មាលតី ត្រូវបានតុលាការ សម្រេចឃុំខ្លួនបណ្តោះអាសន្ន ដោយចោទពីបទជ្រៀតជ្រែក ចូលកិច្ចការរបស់តុលាការ និងប្រើប្រាស់ស្លាកលេខរថយន្ដក្លែងក្លាយ។ អតីតឧត្តមសេនីយ៍រូបនេះ ក៏មានជាប់សង្ស័យ នៅក្នុងការរត់កាត់ដ៏សម្ងាត់មួយ ដើម្បីឲ្យមានការដោះលែងឪពុកម្ដាយ របស់លោកឧកញ៉ា ថោង សារ៉ាត់ នោះដែរ៕