សាសា សើចលែងសម ព្រោះតុលាការអាចហៅសួរ រឿងគ្រោះថ្នាក់ចរាចរណ៍
- ដោយ: ដារី អត្ថបទ និងយកការណ៍៖ ដាវី ([email protected]) - ភ្នំពេញ ថ្ងៃទី១៤ សីហា ២០១៥
- កែប្រែចុងក្រោយ: August 16, 2015
- ប្រធានបទ: តារា
- អត្ថបទ: មានបញ្ហា?
- មតិ-យោបល់
-
រឿងភាគថ្មីស្ដីពីកញ្ញា សាសា តារាសម្បូររឿង«ពេលយប់» នៅតែបន្តមានទៅមុខ... មិនដាច់សូរ។ អតីតតារាទូរទស្សន៍ ដែលបានល្បីខ្លាំងក្នុងសំនុំរឿង វាយតប់ទាត់ធាក់បោកសក់ ពីសំណាក់ឧកញ៉ា សុខ ប៊ុន នោះ ទំនងជានឹងត្រូវទៅបង្ហាញខ្លួន ក្នុងពេលឆាប់ៗនេះ នៅមុខការស៊ើបសួររបស់ព្រះរាជអាជ្ញារង អមសាលាដំបូងខេត្តបាត់ដំបង។
លោក តូច សុភក្តី ព្រះរាជអាជ្ញារង អមសាលាដំបូងខេត្តបាត់ដំបង បានថ្លែងឲ្យដឹងថា នាង ឯក សុជាតា ហៅ កញ្ញា សាសា អាចនឹងត្រូវកោះហៅ ឲ្យមកបំភ្លឺជុំវិញរឿងគ្រោះថ្នាក់ចរាចរណ៍ នៅក្រុងបាត់ដំបង កាលពីយប់ថ្ងៃទី០២ ខែសីហាកន្លងមកនេះ។ ការថ្លែងអះអារបស់ព្រះរាជអាជ្ញារង បានធ្វើឡើង បន្ទាប់ពីលោក បានកោះហៅមិត្តភក្តិ ២នាក់ របស់កញ្ញា សាសា មកសាកសួរព័ត៌មាន អំពីបញ្ហាគ្រោះថ្នាក់ខាងលើនេះ រួចហើយ។
ហេតុការណ៍គ្រោះថ្នាក់ចរាចរណ៍នោះ បានកើតឡើង រវាងរថយន្តស៊េរីទំនើបម៉ាក Porsche ពណ៌ស និងរឺម៉កដឹកទឹក នៅក្បែរមន្ទីរពេទ្យវិសាលសុខ ស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង បណ្ដាលឲ្យអ្នកបើកបររ៉ឺមក រងរបួសយ៉ាងធ្ងន់ធ្ងរ។ សាក្សីដែលនៅក្នុងហេតុការណ៍នេះ តាំងពីដំបូង បាននិយាយថា កញ្ញា សាសា គឺជាអ្នកបើកបររថយន្ដទំនើបនេះ ដែលមានអ្នកជិះជាមួយ ជាមិត្តស្រីនាងម្នាក់ទៀត។ ប៉ុន្តែនៅក្រោយគ្រោះថ្នាក់នោះបន្តិច កញ្ញា សាសា ត្រូវបានមន្ត្រីយោធាម្នាក់ ជម្លៀសខ្លួនចេញទៅ ដោយទុកកិច្ចការដោះស្រាយបញ្ហា ទៅឲ្យមិត្តភ័ក្ររបស់នាងម្នាក់ ដែលជាម្ចាស់ផ្ទះសំណាក់ ស្តារវីឡា លោក ឡូ ប៊ុនរិទ្ធ ហៅ តូ នៅក្រុងបាត់ដំបង។
នៅក្រោយហេតុការណ៍នោះ និងបន្ទាប់ពីសារព័ត៌មាននៅក្នុងស្រុក បានផ្សាយដំណឹងនេះ យ៉ាងព្រោងព្រាតនោះ កញ្ញា សាសា បានសរសេរច្រានចោលដំណឹងនេះ នៅគណនីហ្វេសប៊ុករបស់នាង ដោយអះអាងថា នាងកំពុងមានវត្តមាន ឯរាជធានីបាងកកឯណោះ មិនស្ថិតក្នុងក្រុងបាត់ដំបងទេ។ មិនត្រឹមតែប៉ុណ្ណឹង អតីតពិធីការិនីទូរទស្សន៍ CTN បានសរសេរបន្ថែមថា នឹងបើកឡានមកសួរសុខទុក្ខ អ្នកកាសែតរបស់សារព័ត៌មានមួយ ដល់ការិយល័យនោះទៀតផង។
ការឆ្លើយឆ្លងគ្នា តាមសារព័ត៌មាន និងតាមបណ្ដាញសង្គម មិនបានធ្វើឲ្យតុលាការជឿនោះឡើយ។ លោក តូច សុភក្តី បានថ្លែងឲ្យដឹងទៀតថា កញ្ញា សាសា នឹងអាចត្រូវកោះហៅមកសាកសួរ ក្នុងពេលឆាប់ៗ តាមដែលអាចធ្វើទៅបាន នាពេលខាងមុខ។ លោកព្រះរាជអាជ្ញារង មិនបានទម្លាយឲ្យដឹង ទាក់ទងនឹងចម្លើយ របស់មិត្តភ័ក្រពីរនាក់ របស់កញ្ញា សាសា នោះឡើយ ដោយសារវាកំពុងស្ថិតក្នុងនីតិវិធីច្បាប់ របស់តុលាការ។
ប៉ុន្តែសារព័ត៌មាន កម្ពុជាថ្មី បានស្រង់ប្រភពអានាមិកមួយ ដែលស្និតនឹងសាលាដំបូងខេត្តបាត់ដំបង មកបញ្ជាក់ថា មិត្តភ័ក្រទាំងពីរនាក់ របស់កញ្ញា សាសា សុទ្ធតែបានបដិសេធ នៅចំពោះការស៊ើបសួរថា រថយន្ដតូចទំនើបនោះ មិនមែនជារថយន្ដរបស់ពួកគេទេ តែជារថយន្ដ ដែលបើកបរដោយកញ្ញា សាសា ផ្ទាល់តែម្ដង។ ប្រភពនោះ បាននិយាយប្រាប់សារព័ត៌មានទៀតថា លោក ឡូ ប៊ុនរិទ្ធ បានចេញមុខមកដោះស្រាយ ករណីគ្រោះថ្នាក់ចរាចរណ៍នេះ ដោយសារកញ្ញា សាសា បានទូរស័ព្ទទៅពឹងពាក់លោក ឲ្យជួយអន្តរាគមន៍។
នៅចំពោះរឿងអាស្រូវ ដែលចេះតែកើតមាន ជាបន្តបន្ទាប់ដូចទឹកហូរ នាង ឯក សុជាតា ហៅកញ្ញា សាសា បានសរសេរបន់ព្រះ សំពះព្រះពុទ្ធ នៅលើគណនីហ្វេសប៊ុករបស់នាងទៀតថា៖ «បើសិនខ្ញុំជាមនុស្សអាក្រក់ សាងតែអំពើបាប មិនដែលធ្វើអំពើល្អ សូមឲ្យទេវតាយកជីវិតខ្ញុំ ក្នុងឆ្នាំនេះចុះ មិនចាំបាច់ឲ្យខ្ញុំមានជីវិត ដល់ឆ្នាំក្រោយទេ»។ ការសរសេរនេះ មិនបានកន្លងផុត ពីភ្នែករបស់ក្រុមអ្នកប្រមាញ់យកព័ត៌មានទេ ហើយក្រុមអ្នកសារព័ត៌មានទាំងនោះ ថែមទាំងធ្វើអត្ថាធិប្បាយ ចាត់ទុកសំណេរខាងលើថា វាជាការដាក់បណ្ដាសារខ្លួនឯង របស់កញ្ញា សាសា នោះទៀត។ អតីតពិធីការិនី បានសរសេរបន្តភាគ ទៅនឹងការចុះផ្សាយនោះវិញថា៖ «តេីអ្នកទាំងអស់យល់យ៉ាងណាដែរ ចំពោះការបកប្រែ របស់បងសារព័ត៌មាន? ក្នុងប្រទេសខ្ញុំ អស់ព័ត៌មានត្រូវចុះផ្សាយហេីយ ក្រៅពីព័ត៌មាន "មី"សាសា គឺមិនចុះ(ផ្សាយ) ព្រោះលក់មិនដាច់!»៕