សាកសពយុវជន កំសត់ ត្រូវបានអ្នកដំណើរប្រទះឃើញ នៅវេលាម៉ោង ប្រមាណជា ៤ និង៣០នាទី ល្ងាចថ្ងៃទី ២៤ ខែកក្កដា ឆ្នាំ២០១៥ ត្រង់ចំនុចទល់មុខ អង្កការមួយ ឈ្មោះ«ព្រះយេសូ៑គ្រឹស្ត» តាមបណ្តោយផ្លូវវេងស្រេង ស្ថិតក្នុងភូមិដំណាក់ធំ២ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ យុវជនដែលដេកស្លាប់ ត្រូវ​បាន​គេស្គាល់ថា ឈ្មោះ ផា រដ្ឋា អាយុ១៨ឆ្នាំ រស់នៅភូមិថ្មី (ខ) ឃុំរកាគយ ស្រុកកងមាស ខេត្តកំពង់ចាម មិន​មាន​មុខរបរពិតប្រាកដ។

តាមប្រភពព័ត៌មាន ពីអ្នករត់ម៉ូតូឌុប នៅកន្លែងកើតហេតុ បានអោយដឹងថា គេឃើញយុវជនឈ្មោះ ផា រដ្ឋា នេះ មកអង្គុយមុខកន្លែងកើតហេតុ តាំងពីម៉ោង១ រសៀលមកម្លេះ ប៉ុន្តែគេមិនបានដឹងថា យុវជននោះ មកពីទីណា​នោះទេ។ អ្នកឃើញហេតុការណ៍ បានបញ្ជាក់ទៀតថា រហូតដល់ម៉ោង ៤ និង៣០នាទីល្ងាច ទើបភ្ញាក់ផ្អើលថា យុវជនខាងលើស្លាប់ បណ្តាលឲ្យអោយប្រជាពលរដ្ផ ធ្វើដំណើរតាមផ្លូវវេងស្រេង មានការភ្ញាក់ផ្អើល ឈប់​មើល​គ្រប់ៗគ្នា ទាំងក្តីអាណិតអាសូរ។

តាមសំដីបញ្ជាក់ របស់សមត្ថកិច្ចប៉ុស្ថិ៍ស្ទឹងមានជ័យ បានប្រាប់ឲ្យដឹងថា យុវជនខាងលើទំនងជាខ្យល់ គ ស្លាប់​ម្នាក់ឯងគ្មានអ្នកដឹង រហូតដល់ស្លាប់បាត់បង់ជីវិត ទើបមានគេឃើញ។ មន្រ្តីដដែលបានបន្តទៀតថា ក្រោយ​ពី​ធ្វើកោសល្យវិច័យរួច សាកសពត្រូវបានបញ្ជូន ទៅតម្កល់ទុក ជាបណ្តោះអាសន្ននៅវត្ត សំបួរមាស ក្នុងសង្កាត់​ដង្កោ ខណ្ឌដង្កោ រាជធានីភ្នំពេញ ព្រោះមិនទាន់មានសាច់ញាតិ មកទទួលទៅធ្វើបុណ្យ៕