ភាពយន្ដទីបី របស់តារាសម្ដែង ដ៏ល្បីឈ្មោះ របស់ហូលីវូដ នាង អេនជឺលីណា ជូលី នឹងថតឡើងវិញ ពីការ​សម្លឹង​មើលឃើញ របស់កុមារ ទៅក្នុងឈុតឆាក ដ៏សាហាវឬស្សា នៃរបបប្រល័យពូជសាសន៍ ខ្មែរក្រហម។ នេះ​បើ​តាមការប្រកាស ឲ្យដឹងកាលពីថ្ងៃព្រហស្បត្តិ៍ របស់គេហទំព័រ «Netflix» ដែលធ្វើអាជីវកម្មភាពយន្ដ នៅ​តាម​បណ្ដាញអ៊ិនធើណែត។

នាង ជូលី នឹងតម្លើងភាពយន្ដនេះឡើង ដោយដកស្រង់គំនិត តាមសៀវភៅមួយ ដែលមានចំណងជើងថា «មុនដំបូង ខ្មែរក្រហមបានសម្លាប់ប៉ារបស់ខ្ញុំ» និងជាស្នាដៃនិពន្ធ ដោយអ្នកស្រី លឿង អ៊ឹង ក្នុងការ​រៀបរាប់​ឡើង​វិញ ពីជីវិតដ៏ខ្លោចផ្សារ នៅក្នុងរបបវាលពិឃាត ៣ឆ្នាំ៨ខែ២០ថ្ងៃ រវាងពីឆ្នាំ១៩៧៥ មកឆ្នាំ១៩៧៩។ គេហទំព័រ «Netflix» បានស្រង់សំដីរបស់នាង ជូលី មកបញ្ជាក់ថា៖ «សៀវភៅរបស់អ្នកស្រី លឿង បាន​ធ្វើ​ឲ្យអារម្មណ៍ខ្ញុំ ស្រយ៉ុតស្រយ៉ង់ណាស់។ វាជួយឲ្យខ្ញុំយល់ កាន់តែខ្លាំងឡើង ថាតើកុមារមានេះជីវិតបែបណា នៅក្នុងពេលមានសង្គ្រាម និងថាតើពួកគេរងផលប៉ះពាល់បែបណា។»

តារាភាពយន្ដល្បី បានថ្លែងឲ្យដឹងទៀតថា៖ «សៀវភៅនេះ បានផ្ដល់ឲ្យខ្ញុំ នូវអារម្មណ៍កាន់តែជិតដិតឡើងៗ ជាមួយបណ្ដាជនទាំងឡាយ នៅក្នុងប្រទេសកម្ពុជា ដែលជាប្រទេសកំណើត របស់កូនប្រុសខ្ញុំ។» ការថ្លែង​លើក​ពីកូនប្រុសរបស់នាង ធ្វើឲ្យគេយល់ភ្លាម ថាម្នាក់នោះ ជាកូនប្រុសចិញ្ចឹមច្បងរបស់នាង យុវជនជំទង់ ម៉ាដុក ដែល​នឹងក្លាយ ជាផលិតករមួយរូប សម្រាប់ភាពយន្ដ របស់ម្ដាយចិញ្ចឹមខ្លួននេះផង។

អ្នកដឹកនាំរឿង ជាតារាភាពយន្ដផ្ទាល់តែម្ដង ដោយមានការ រៀបចំឈុតឆាក (scénario) ដោយរូបនាង និង​អ្នកស្រី លឿង អ៊ឹង។ អ្នកសហការផលិតមួយរូប ក៏ជាជនជាតិបារាំង មានដើមកំណើតខ្មែរ ដ៏ល្បីល្បាញម្នាក់ នៅក្នុងពិភពភាពយន្ដដែរ។ នោះ គឺលោក រិទ្ធី ប៉ាន ដែលធ្លាប់ត្រូវបានជ្រើសចូល ក្នុងការប្រកួតប្រជែង ដណ្ដើមពានរង្វាន់អូស្កា កាលពីឆ្នាំ២០១៣ កន្លងទៅ សម្រាប់ភាពយន្ដ «រូបភាពដែលខ្វះ» របស់លោក។

ភាពយន្ដថ្មី របស់នាង អេនជឺលីណា ជូលី នេះ នឹងគ្រោងចេញបញ្ចាំង នៅចុងឆ្នាំ២០១៦ ខាងមុខ ហើយ​ក្លាយ​ជា ភាពយន្ដទីបី របស់តារាភាពយន្ដ បន្ទាប់ពីភាពយន្ដ «នៅស្រុកឈាម និងស្រុកទឹកឃ្មុំ (In The Land Of Blood and Honey - 2012)» និងភាពយន្ដ «មិនអាចបំបែកបាន (Unbroken 2014)»៕