ហេតុការណ៍នេះ បានបង្ករឲ្យភាគីទាំងសងខាង រងរបួសដូចគ្នា ចំណែកម៉ូតូ មិនមានរងការខូចខាត ធ្ងន់ធ្ងរទេ។ អ្វីដែលជាបញ្ហា គឺយុវជន ដែលជាអ្នកបើក ទៅប៉ះភាគីម្ខាងទៀតនោះ បានព្យាយាមរត់គេច តែត្រូវបានគេ​ឃាត់​បាន មុននឹងបញ្ជូន ឲ្យត្រឡប់មកដោះសា្រយ ជាមួយអ្នករងគ្រោះ នៅកន្លែងកើតហេតុវិញ។

ម្ចាស់ម៉ូតូឌ្រីម លោក មុត សុផល អាយុ៦៨ឆ្នាំ ដែលជាភាគីជនរងគ្រោះ បានប្រាប់ទស្សនាវដ្តី​មនោរម្យ.អាំងហ្វូ​ឲ្យដឹងថា ម៉ូតូរបស់លោកម៉ាឌ្រីម ស្លាកលេខកណ្តាល១I-៤១០៦ បើកចេញពីស្តុប ត្រសក់ផ្អែម នៅពេលដល់​ភ្លើងខៀវ។ លោកបានអះអាង ទាំងសម្តីខ្លាំងៗថា ម៉ូតូម៉ា និច ពណ៍ស ស្លាកលេខ ១CS-៨១៩៨ ជាអ្នកបើកមក​បុកលោក នៅពេលកំពុងធ្វើដំណើរ ហើយលោកទារសំណង ពីយុជនម្ចាស់ម៉ូតូខាងលើ ចំនួនមួយរយដុល្លារ ថ្លៃព្យាបាលរបួស។

ដោយឡែកយុវជនម្ចាស់ម៉ូតូ និច ឈ្មោះ ពុំ បូរិទ្ធ អាយុ ១៨ ឆ្នាំស្នាក់នៅ សង្កាត់បឹងកេងកងទីមួយ ខណ្ឌ​ចំការមន រាជធានីភ្នំពេញ បានសុំសម្របសម្រួល ជាមួយម្ចាស់ម៉ូតូ ឌ្រីមថា ខ្លូនគ្មានលុយដល់ មួយរយដុល្លារ​ទេ។ យុវជននោះ បាននិយាយថា៖ «អ៊ំ ខ្ញុំសុំអង្វរ ខ្ញុំថ្វាយបង្គុំក៏បាន ខ្ញុំគ្មានលុយទេ»។ តែភាគីម្ខាងទៀត នៅរឹង​មិនព្រម តាមពាក្យអង្វរករទេ ហើយបានប្រាប់ថា បើចង់សម្របសម្រួល ទាល់តែហៅចាស់ៗ មកនិយាយគ្នា។

ដំណោះស្រាយ នៅមិនទាន់មានទេ រហូតមកដល់ម៉ោង ៤ និង២០ នាទី ក្រោយពេលកើតហេតុនេះ បើតាម​ការបញ្ជាក់ពីមន្រ្តីចរាចរណ៍ នៅសង្កាត់បឹងកេងកងទី១ ដែលប្រចាំការត្រង់ចំណុចស្តុប ត្រសក់ផ្អែម តាម​បណ្តោយផ្លូវត្រសក់ផ្អែម រាជធានីភ្នំពេញ ដោយលោកបញ្ជាក់ថា អ្នកទាំងពីរបើកបរគ្មាន មួកការពារ និងកញ្ចក់​ទាំងពីរ៕