ករណីភ្លើងឆេះសន្ធោសន្ធៅនេះ ត្រូវបានក្រុមអ្នកសង្គ្រោះអគ្គីភ័យ ជួយពន្លត់បានសម្រេច អស់រយៈពេល​ប្រមាណ២ម៉ោង ចាប់ពីម៉ោង ៦ ល្ងាចដល់ម៉ោង ៨ យប់ថ្ងៃទី១៣ ខែកក្កដា ឆ្នាំ២០១៥ នៅទីតាំងកើតហេតុ ជារោងចក្រស្តុកសម្ភារៈរបស់របរ និងសម្ភារៈអេឡិចត្រូនិច ផ្ទះលេខ២៦ ផ្លូវ៧៥ ក្នុងសង្កាត់ស្រះចក ខណ្ឌ​ដូនពេញ រាជធានីភ្នំពេញ នៅជាប់របងវត្តស្រះចក។

អភិបាលខណ្ឌដូនពេញ លោក គួច ចំរើន ដែលបានចុះផ្ទាល់ ក្នុងហេតុការណ៍អគ្គីភ័យនេះ បានប្រាប់​អ្នក​សារព័ត៌មានឲ្យដឹងថា តំបន់ដែលរងអគ្គិភ័យ បានរួចផុត ពីការគម្រាមកំហែងហើយ។ ក្នុងនោះ មិនមាន​បង្ក​ការខូចខាត ដល់អ្នកជិតខាងនោះទេ តែរបស់របរនៅខាងក្នុង ត្រូវបានលោកបញ្ជាក់ថា មានការខូចខាត​មួយ​ចំនួន។ លោកបានឲ្យដឹងដែរថា ហេតុការណ៍ឆាបឆេះនេះ បើតាមការសន្និដ្ឋានបឋម បណ្តាលមកពី​ទូស្សេ​ម៉ាស៊ីនកុំព្យូទ័រ នៅក្នុងការិយាល័យ ក្នុងនោះមានអ្នករបួសម្នាក់ ឈ្មោះ ថន ម៉ាប់ បានចូលទៅជួយពន្លត់ ហើយ​ក៏ធ្លាក់ពីលើដំបូលសន្លប់ ត្រូវបញ្ជួនទៅមន្ទីពេទ្យកាល់ម៉ែត្រ។

លោក ព្រំ យ៉ុន អ្នកទទួលបន្ទុក ផ្នែកពន្លត់អគ្គីភ័យបានឲ្យដឹងថា អង្គភាពរបស់លោក បានប្រើប្រាស់ឡាន​ទឹកអស់ចំនួន១៥គ្រឿង និងប្រើរយៈពេល ប្រមាណជា១ម៉ោង និង ៣០នាទី ទើបភ្លើងស្ងប់ស្ងាត់ទៅវិញ៕