នៅថ្ងៃព្រហស្បត្តិ៍ទី២០ធ្នូនេះ​  ជនជាតិអង់គ្លេសម្នាក់ អាយុ៧១ឆ្នាំ ត្រូវបានកាត់អោយជាប់ទោស ចំនួន២ឆ្នាំ ក្នុងនោះមួយ​ឆ្នាំ​ត្រូវ​បានព្យួរ ពីបទរំលោភសេពសន្ធវះ ជាមួយកុមារាកម្ពុជា។ ក្រុមសកម្មជន របស់សង្គមស៊ីវីល ដែលបានតាមដាន​សំនុំរឿងនេះ បាន​បរិហាពីទម្ងន់ទោស ដែលមានកម្រិតស្រាលជាទីបំផុត និងគ្មានយុត្តិធម៌។

រូបផ្សាយ បង្ហាញពីការអនុវត្តច្បាប់ នៅកម្ពុជា ជុំវិញបទល្មើសសេពកាមជាមួយកុមារ។

ជនសង្ស័យឈ្មោះ រ៉ឺជីណាល ប្លាកីឡី (Reginald Blakeley) ដែលមកកម្ពុជាក្នុងថានះជាគ្រូបង្រៀនភាសាអង់គ្លេស អោយ​ស្ថាប័ន​ក្នុងស្រុកមួយនោះ ត្រូវបានអាជ្ញាធរចាប់ឃាត់ខ្លួន ពីអំឡុងខែមករាកន្លងទៅនេះ នៅផ្នែកខាងជើងនៃ​ទីក្រុង​សៀមរាប។ បុរស​ចំណាស់៧១ឆ្នាំរូបនេះ ត្រូវបានរកឃើញថាមានទោស ពីបទអាណាចារ ប្រព្រឹត្តិទៅលើកុមារខ្មែរប្រាំនាក់ អាយុ​រវាងពី៧ទៅដល់១៤ឆ្នាំ។

ចៅក្រមហុក ពៅ បាននិយាយប្រាប់ភ្នាក់ងារសាពត៌មានបារាំង អាអេហ្វប៉េ (AFP) នៅក្រោយសាវនាការថា «ជនជាប់ចោទ ត្រូវ​ជាប់ទោសក្នុងពន្ធនាគារពីរឆ្នាំ តែសាលក្រមបានបង្គាប់ អោយមានការព្យួរទោសមួយឆ្នាំ»។ តុលាការក៏បានបង្គាប់ អោយធ្វើការ​ផាកពិន័យ ពីជនជាប់ចោទ នូវទឹកប្រាក់ចំនួន ៥០០ដុល្លា និងសងជម្ងឺចិត្ត១៥០ដុល្លាម្នាក់ អោយទៅជន​រងគ្រោះបីនាក់ ខណៈជន​រងគ្រោះពីរនាក់ទៀត មិនបានទាមទារអ្វីទេ។

នាយកអង្គការសកម្មភាពដើម្បីកុមារ (APLE) លោក សំលៀង សីលា បានវាយតម្លៃពីទម្ងន់ទោស ដែលមានកម្រិតស្រាល​ជា​ទីបំផុតនេះ ហើយលោកបារម្ភថា សាលក្រមរបស់តុលាការនេះ នឹងមិនបានជួយបញ្ឈប់បទល្មើស សេពសន្ធវះលើកុមារ​មិនទាន់​គ្រប់អាយុ នៅកម្ពុជាទេ។

ឋានសួគ៌លោកិយ៍ នៃឧក្រិដ្ឋជនល្មោភកាម

បុរស រ៉ឺជីណាល ប្លាកីឡី ដើមកំណើតអង់គ្លេសនេះ ធ្លាប់ត្រូវអាជ្ញាធរចាប់ខ្លួន នៅពេលគាត់ត្រឡប់មកអង់គ្លេសវិញ នៅឆ្នាំ​២០១០ តែត្រូវបានដោះលែងវិញ ដោយខ្វះភស្តុតាង។

នៅឆ្នាំ២០០៣ ប្រទេសកម្ពុជាបានចាប់ផ្ដើមយុទ្ធនាការ កែលម្អរូបភាពរបស់ខ្លួន ដែលត្រូវបានរិះគន់ជារឿយៗថា ជាជម្រក និងបាន​ផ្ដល់ជម្រក សម្រាប់ក្រុមឧក្រិដ្ឋជនសេពសន្ធវះ លើកុមារកម្ពុជាមិនគ្រប់អាយុ។ ចាប់ពីពេលនោះមក ជនបរទេស​ប្រមាណជាង​១០នាក់ ត្រូវបានចាប់ដាក់ទោស ក្នុងនោះមួយចំនួន ត្រូវបានកាត់ទោសអោយជាប់ពន្ធនាគារ ពីបទ​សេព​សន្ធវះលើកុមារ​មិនទាន់​គ្រប់អាយុ និងមួយចំនួនទៀត ត្រូវបានចាប់បញ្ជូនចេញក្រៅកម្ពុជា ដើម្បីទៅទទួលទោស​នៅ​ប្រទេសដើមរបស់ខ្លួន។

ទាក់ទងនឹងទម្ងន់ទោស ដែលតុលាការក្នុងប្រទេសបារាំង កាត់សេចក្ដីទៅលើឧក្រិដ្ឋជនល្មោភកាមទាំងនោះ ជនល្មើសនឹង​ត្រូវ​ទទួលទោស មានកម្រិតពី៥ទៅ១៥ឆ្នាំ តាមបទប្រព្រឹត្តិខ្លាំងឬល្មម ហើយត្រូវបង់ប្រាក់ពិន័យ ពី៧៥ ០០០អ៊ឺរ៉ូ ដល់១៥០ ០០០អ៊ឺរ៉ូ (ប្រមាណជា ១២១ ៦០០ដុល្លា ដល់ ២៤៣ ២០០ដុល្លា។ ក្នុងករណីមានការរំលោភចាប់បង្ខំ លើអនិតិជនក្រោម​អាយុកំណត់​ដោយច្បាប់ ជនល្មើសនឹងជាប់ទោស ក្នុងពន្ធនាគារ ពី«២០ឆ្នាំដល់ ៣០ឆ្នាំ»។

ទម្ងន់ទោសនេះ អាចជាមូលហេតុមួយ ដែលធ្វើអោយជននិយមប្រព្រឹត្តិកាមជាមួយកុមារទាំងនោះ «ខ្លាចរអា» មិនហ៊ាន​ប្រព្រឹត្តិក្នុងប្រទេសដើមរបស់ខ្លួន តែបានធ្វើដំណើរ​ទៅកាន់ប្រទេសផ្សេងទៀត ដែលមានប្រព័ន្ធយុត្តិធម៌មិនរឹងមាំ ឬពុក​រលួយ ដើម្បីបំពេញ«ចំណង់»របស់ខ្លួន ដោយគ្រាន់តែចំណាយប្រាក់បន្ដិចបន្តួចប៉ុណ្ណោះ។ ក្នុងករណីខាងលើ តុលាការ​បានកាត់ទោស អោយជាប់ទោស​មួយឆ្នាំ និងបង់ប្រាក់ផាកពិន័យទាំងអស់ ៩៥០ដុល្លា (ត្រូវជា៦៩០អ៊ឺរ៉ូ ឬ​៥៨៥លីវ​ប្រាក់​អង់គ្លេស) វាប្រៀប​បាននឹង«ឋានសួគ៌»មួយ ដែលឧក្រិដ្ឋជនត្រូវបានជាប់ពិន័យ បើប្រៀបនឹងទម្ងន់ទោសកម្រិតដោយ ក្រុមប្រទេសបស្ចឹមលោក៕

• សូមអានអត្ថបទមុនរបស់មនោរម្យព័ងអាំងហ្វូ ដែលនិយាយពីឋានសួគ៌លោកិយ៍ នៃក្រុមឧក្រិដ្ឋជន (ចុចលើទីនេះ)។

-------------------------------------------------------
ដោយ ៖ ដារា រិទ្ធ - ភ្នំពេញ ថ្ងៃទី២០ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ