ពលរដ្ឋ​​ឃុំ​ព្រែក​តាទែន ថា​មន្រ្តី​ធ្វើ​អត្ត​សញ្ញាណ​ប័ណ្ណ​យឺត​យ៉ាវ​

ប្រជាពលរដ្ឋឃុំព្រែកតាទែន ស្រុកពញ្ញាឮ ខេត្តកណ្តាល ប្រមាណជាង២០០នាក់ បានរអ៊ូរទាំថា មន្រ្តី​ក្នុង​មូលដ្ឋាន ដែល​ចុះ​ធ្វើ​អត្តសញ្ញាណ​ប័ណ្ណ ធ្វើការមិនបានហ្មត់ចត់។ អ្នកខ្លះទៅចាំថត រូប​ដាក់​អត្តសញ្ញាណប័ណ្ណ​​យូរ​ពេក ហើយ​មិន​ឃើញ​អ្នក​ទទួល​ឯកសារ និងគ្មានសម្ភារៈគ្រប់គ្រាន់ ក៏បានសម្រេចចិត្ត​ត្រឡប់​ទៅ​ផ្ទះ​វិញ ទាំង​មិន​បាន​ធ្វើ។
Loading...
  • ដោយ: ក. សោភណ្ឌ អត្ថបទ៖ ក.សោភ័ណ្ឌ ([email protected]) - យកការណ៍៖ ហេង វុទ្ធី - ភ្នំពេញថ្ងៃទី ០១ កក្កដា ២០១៥
  • កែប្រែចុងក្រោយ: July 02, 2015
  • ប្រធានបទ: អភិបាលកិច្ច
  • អត្ថបទ: មានបញ្ហា?
  • មតិ-យោបល់

ស្រ្តីម្នាក់ដែលមានកូនតូច នៅក្នុងដៃកំពុងឈរចាំមន្រ្តីមូលដ្ឋាន តាមសេចក្តីប្រកាស ឲ្យមកធ្វើអត្តសញ្ញាណ​ប័ណ្ណ អ្នកស្រី លឹម សុខឹម បានប្រាប់ទស្សនាវដ្តីមនោរម្យ.អាំងហ្វូ នៅព្រឹកថ្ងៃទី ០១ ខែកក្កដា ឆ្នាំ២០១៥នេះ​ថា អ្នកស្រីមកដល់កន្លែងធ្វើ (អត្តសញ្ញាណប័ណ្ណ) ហើយតែគ្មានមន្រ្តីណាម្នាក់ ចាប់ផ្តើមធ្វើការងារនេះទេ។ ពេល​គាត់ទៅសួរមន្រ្តីទាំងនោះ គេប្រាប់ថា មិនទាន់មានឯកសារគ្រប់គ្រាន់ ដើម្បីចាប់ផ្តើម។

អ្នកស្រី និងពលរដ្ឋជាច្រើននាក់ទៀត ដែលកំពុងចំណាយពេលរង់ចាំដូចគ្នា បានបន្តថា បើមិនទាន់​មាន​ឯកសារ​គ្រប់គ្រាន់ ហេតុអ្វីបិទប្រកាស ឲ្យពលរដ្ឋមកធ្វើពេញភូមិធ្វើអ្វី? ឥឡូវមកដល់មិនបានធ្វើហើយ ត្រូវ​ចំណាយពេលរង់ចាំទៀត។ បន្ទាប់ពីការរអ៊ូរទាំរួច អ្នកខ្លះមានភារៈកិច្ចចាំបាច់ នៅផ្ទះខានមិនបាន សម្រេច​ចិត្ត​ចាកចេញ មិននៅរង់ចាំបន្ត។ ពលរដ្ឋខ្លះព្យាយាមចាំបន្ត ពីម៉ោង៧ ព្រឹក ដល់ម៉ោង ៩ ឈានដល់ម៉ោង១០ នៅ​មិនទាន់បានលទ្ធផលទៀត។

កំហុស របស់មន្ត្រីមកពីក្រសួងមហាផ្ទៃ?

ចំពោះភាពយឺតយ៉ាវ នៅក្នុងការចុះធ្វើអត្តសញ្ញាណប័ណ្ណ នៅបរិវេណវត្តិសាម្គីរង្សី ក្នុងភូមិព្រែកតាទែន ឃុំ​ព្រែកតាទែន ស្រុកពញ្ញាឮ ខេត្តកណ្តាល មិនត្រូវបានមន្រ្តីមូលដ្ឋាន បដិសេធន៍នោះទេ។ លោក ទុយ សុភាព អធិការងស្រុកពញ្ញាឮ ដែលបានដឹងនាំកម្លាំង ចុះធ្វើអត្តសញ្ញាណប័ណ្ណ នៅមូលដ្ឋានខាងលើ បានថ្លែង​ប្រាប់​ទស្សនាវដ្តីមនោរម្យ.អាំងហ្វូថា ភាពយឺតយ៉ាវទាំងនេះ បណ្តាលមកពី មន្រ្តីក្រសួងមហាផ្ទៃមួយរូប ដែលត្រូវ​ចុះមកត្រួតពិនិត្យនោះ មិនបានចុះមក។ ឯកសារចុងសន្លឹកបង់ប្រាក់ សម្រាប់ធ្វើអត្តសញ្ញាណប័ណ្ណ គឺនៅ​ជា​មួយមន្រ្តីរូបនោះ ទើបមិនបានចាប់ផ្តើមឲ្យទាន់ពេល នៅថ្ងៃដំបូងនេះ។

លោកប្រាប់ទៀតថា ភ្លាមៗនៅពេលបានដំណឹងនេះ លោកបានបញ្ជូនកម្លាំងម្នាក់ ទៅយកឯកសារនោះ​ជា​បន្ទាន់ ដែលទើបនឹងត្រឡប់មកដល់ នៅម៉ោងជាង១០ ព្រឹកនេះ។ ដោយឡែក ចំពោះភាពរញ៉េរញ៉ៃផ្សេងៗ ត្រូវបានលោកបញ្ជាក់ថា មកពីថ្ងៃនេះ ជាថ្ងៃធ្វើអត្តសញ្ញាណប័ណ្ណទីមួយ ទើបមិនទាន់មានសម្ភារៈ (តុ កៅអី) គ្រប់គ្រាន់។

មន្រ្តីតំណាងឲ្យអាជ្ញាធរ ធ្វើអត្តសញ្ញាណប័ណ្ណរូបនេះ បានបញ្ជាក់ចុងក្រោយថា លោកបានប្រជុំ ជាមួយ​ក្រុម​ការងាររួចស្រេច មុនពេលចុះធ្វើកាងារនេះ ទាក់ទងនឹងរដ្ឋាបាល ពាក្យសម្តី និងអាកប្បកិរិយា នៃការ​ស្លៀក​ពាក់​ជាដើម។ ជាពិសេស គឺការទទួលសំណូកផ្សេងៗ ក្រៅពីប្រាក់១០០០០រៀល សម្រាប់ធ្វើអត្តសញ្ញាណប័ណ្ណ​នោះ។ លោក បានថ្លែងថា៖ «មុនចុះ ខ្ញុំបានប្រជុំហាមដាច់ខាត មិនឲ្យប៉ះពាល់ថវិកាពលរដ្ឋនោះទេ»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...