មេប៉ុស្តិ៍នគរបាលដើមមាន លោក សេង វុទ្ធី បានថ្លែងឲ្យទស្សនាវដ្តីមនោរម្យ.អាំងហ្វូដឹង នៅថ្ងៃកើតហេតុថា ការឆាបឆេះនេះ បណ្តាលមកពី ការទូស្សេខ្សែរភ្លើង តែមិនមានអ្នករងរបួស ឬុអ្នកស្លាប់នោះទេ តែភ្លើងបាន​ត្របាក់​យក សំឡីគរ ពីររោងសិប្បកម្មអស់ប្រមាណ ៥០ភាគរយ។

ហេតុការណ៍ខាងលើ បានកើតឡើង នៅតាមបណ្តោយផ្លូវ ២០៦ ត្រង់ចំនុចកែង ដែលបត់ចូលទៅក្នុង ប្រមាណ​ជាង២០ម៉ែត្រ ស្ថិតក្នុងភូមិដើមមាន សង្កាត់ដើមមាន ក្រុងតាខ្មៅខេត្តកណ្តាល។

លោកបានបន្ថែមឲ្យដឹងថា នៅក្នុងហរតុការណ៍គ្រោះអគ្គីភ័យនេះ បានប្រើប្រាស់ឡានពន្លត់អស់ចំនូន ០២ គ្រឿង​ប្រភេទធំ ដែលចំណាយទឹកបាញ់ អស់ប្រមាណជា ២៨ម៉ែត្រគូប។ ក្រុមអ្នកជួយសង្គ្រោះ បានសង្គ្រោះ​តែ​មនុស្ស ចំនែកឯរបស់របរ ដែលនៅខាងក្នុងរោងសិប្បកម្ម បានរងការខូចខាតមួយចំនួន។

គ្រោះអគ្គីភ័យនេះ ត្រូវបានមេប៉ុស្តិ៍នគរបាលរដ្ឋាបាលដើមមាន បញ្ជាក់ថា មិនបង្កគ្រោះថ្នាក់អ្វី ដល់អ្នកជិត​ខាង​ទេ ព្រោះទីតាំងសិប្បកម្មនៅឆ្ងាយពីគេ។ ម្យ៉ាងទៀត មានអ្នកឃើញហេតុការណ៍នេះភ្លាមៗ ហើយការជួយ​សង្គ្រោះ ក៏ត្រូវបានធ្វើដោយទាន់ពេលដែរ ដែលធ្វើឲ្យភ្លើងបានរលត់ជាស្ថាពរ ក្នុងរយៈពេល តែមួយ​ម៉ោង​ប៉ុណ្ណោះ ពីម៉ោង ៨ និង៣០ នាទី ដល់ម៉ោង ៩និង៣០នាទី៕