សារាចរណ៍ថ្មីមួយ ចេញពីក្រសួងប្រៃសនីយ៍ និងទូរគមនាគមកម្ពុជា អាចជាគ្រោះថ្នាក់ដល់ហាងលក់អាំងធើណែត និងគម្រាមដល់​សេរីភាព នៃការទទួលពត៌មាន និងការបញ្ចេញមតិ។

ហាងនានានៅទីក្រុងភ្នំពេញ ដែលផ្ដល់សេវាកម្មអាំងធើណែត។

សារាចរណ៍ដែលបានចេញផ្សាយ នៅថ្ងៃពុធទី១២ធ្នូ កន្លងមកនេះ និងចុះហត្ថលេខាដោយលោក សូ ឃុន រដ្ឋមន្ត្រីក្រសួងប្រៃសនីយ៍ និងទូរគមនាគមន៍ បានដាក់ចុះមកសំដៅហាមឃាត់ ហាងសេវាអាំងធើណែត ដែលមានចម្ងាយតិចជាង ៥០០ម៉ែត្រពីសាលារៀន។ បន្ទាប់មកទៀត ក្នុងអត្ថបទនោះដដែល ក៏បានហាមឃាត់ដែរ ទៅគ្រប់យុវជនដែលមានអាយុតិចជាង១៨នាក់ ដើម្បីប្រយុទ្ធប្រឆាំង​ទល់នឹង «ភេវរកម្ម ឧក្រិដ្ឋកម្មសេដ្ឋកិច្ច និងភាពអាសអាភាស»។ ក្នុងចំណោមការឃាមឃាត់ ដែលមាននៅក្នុងសារាចរណ៍នោះ ក៏​មានផងដែរ ការចូលទៅប្រព្រឹត្តិល្បែង លើគេហទំព័រណា ដែលមានប្រើប្រាស់ទឹកប្រាក់ ការចូលទៅទស្សនាគេហទំព័រដែលលក់ថ្នាំ (ញៀន?)  និងគេហទំព័រដែលគម្រាមដល់សន្តិសុខជាតិ និងប្រពៃណីជាតិ។

គេហទំព័រមួយឈ្មោះ អៀបាន វ៉័ស ខេប៊ូឌៀ (Urban Voice Cambodia) នៅក្នុងញតិរបស់ខ្លួនដើម្បី «សង្គ្រោះហាងអាំងធើណែត» បានលើកឡើងថា «ការដាក់បទបញ្ជាចុះមកនេះ មានទិសដៅ ចង់បិទហាងអាំងធើណែតជាច្រើន ដែលមានទីតាំងនៅកណ្ដាល​ទីក្រុងភ្នំពេញ និងកម្រិតសិទ្ធិសេរីភាព នៃការចូលទៅក្នុងបណ្ដាញអាំងធើណែត របស់បណ្ដាជនខ្មែរ ដែលគ្មានម៉ាស៊ីនកំព្យូទ័រ​ផ្ទាល់ខ្លួន»។

មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) រួមជាមួយអង្គការអ្នកយកពត៌មានគ្មានព្រំដែន (RSF) បានចេញ​សេចក្ដី​ថ្លែងការណ៍រួមគ្នាមួយ សម្ដែងការព្រួយបារម្ភ ពីសិទ្ធិសេរីភាពស្ដីពីពត៌មាន តាមបណ្ដាញអាំងធើណែតនៅកម្ពុជា។ លោក គ្រឹស្តូហ្វ៍ ដឺល័រ (Christophe Deloire) អគ្គលេខានៃ អង្គការអ្នកសារពត៌មានគ្មានព្រំដែន និងលោក ប៉ា ងួនទៀង (Pa Nguon Teang) នាយក នៃមជ្ឈមណ្ឌលកម្ពុជា ដើម្បីប្រព័ន្ធផ្សព្វផ្សាយឯករាជ្យ បាននិយាយរួមគ្នាថា «អវត្តមាននៃនិយមន័យ ស្ដីពីគេហទំព័រកំសាន្ដ ល្បែង ឬពាក្យថា ប្រពៃណី បានទុកអោយមានការបកស្រាយ យ៉ាងទូលាយ ពីលើសេចក្ដីសម្រេចចិត្តនោះ ប្រសិនបើសារាចរណ៍នេះ​ត្រូវ​គេយកមកអនុវត្តន៍។ វាជាជំហ៊ានដំបូងមួយ ដែលនឹងឈានជាបណ្ដើរ ទៅត្រួតពិនិត្យ និងបំបិតសិទ្ធសេរីភាពទាំងស្រុង នៅលើ​បណ្ដាញពត៌មានវិទ្យា នៅកម្ពុជា។»

អង្គការជាតិ និងអន្តជាតិទាំងពីរ បានបន្ថែមថា «ជាសារាច​រណ៍មួយ ដែលមានបំណងចង់ ដាក់កំហិតទៅលើប្រជាពលរដ្ឋ ក្នុងការ​ប្រើប្រាស់​បណ្ដាញអាំងធើណែត។ យើងបានឃើញរួចហើយ ពីអ្វីដែលបានកើតឡើង នៅក្នុងប្រទេសជិតខាងរបស់កម្ពុជា ដូចជា​វៀតណាម និងភូមាពីមុននេះជាដើម ហើយយើងមានការខ្វាយខ្វល់ ពីបញ្ហាដែលរដ្ឋាភិបាលកម្ពុជា ធ្វើមិនដឹងមិនលឺពីកាតព្វកិច្ច​របស់ខ្លួន ស្ដីពី​សិទ្ធិមនុស្ស នៅចំពោះសហគមជាតិ និងអន្តរជាតិ។»

«យើងលើកទឹកចិត្ត ដល់អ្នករាយការណ៍ពិសេស របស់អង្គការសហប្រជាជាតិ ស្តីពីស្ថានភាពសិទ្ធិមនុស្សនៅកម្ពុជា អោយ​សិក្សា​កាន់តែលំអិត ពីស្ថានភាពទាំងនេះ ក្នុងពេលស្នាក់នៅរបស់លោកនៅកម្ពុជា។» អង្គការទាំងពីរ បានបញ្ជាក់បន្ថែម។

មនោរម្យព័ងអាំងហ្វូ នឹងត្រឡប់មកវិភាគ លើសារាចរណ៍នេះឡើងវិញ ក្នុងអត្ថបទក្រោយរបស់ខ្លួន៕

-------------------------------------------------------
ដោយ ៖ ដារា រិទ្ធ - ភ្នំពេញ ថ្ងៃទី១៤ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ