លោក ប៉ា ងួនទៀង នាយកមជ្ឈមណ្ឌលកម្ពុជា សម្រាប់ការផ្សព្វផ្សាយឯករាជ្យ (CCIM) និងជាចាងហ្វាងវិទ្យុសម្លេងប្រជាធិបតេយ្យ «VOD» បានថ្លែងនៅក្នុងវីដេអូមួយ ដែលផ្សាយនៅលើបណ្ដាញសង្គម សាទរចំពោះការសម្រេចចិត្ត របស់ក្រសួងអប់រំ យុវជន និងកីឡា ដែលបានឆ្លើយតបជាវិជ្ជមាន ចំពោះការតវ៉ា នៃបណ្ដាសិស្សានុសិស្សមួយចំនួន។

អ្នកឃ្លាំមើលបញ្ហាសង្គម និងនយោបាយរូបនេះ បានហៅការសម្រេចរបស់ក្រសួង ថាជាការទទួលខុសត្រូវមួយ បើទោះជាការទម្លាក់កំហុស ទៅលើតែប្រព័ន្ធកំព្យូទ័រមួយមុខ មិនគ្រប់គ្រាន់​នោះ​ក៏ដោយ។ លោកថា ក្រសួងគួរសិក្សាទៅលើកំហុសឆ្គងរបស់មន្ត្រី ហើយអាចចាត់វិធានការ ទៅលើមន្ត្រីទាំងនោះ ព្រោះ «បើបណ្ដោយ ឲ្យមន្ត្រីប្រពឹត្តិ​ទង្វើខុសឆ្គងទាំងនោះ ចេះតែរួចខ្លួន នោះប្រទេសកម្ពុជា នៅតែមានវប្បធម៌ នីទណ្ឌភាព»។

លោក ប៉ា ងួនទៀង ដែលធ្លាប់ជាសាស្ត្រាចារ្យ​មួយរូបនោះ នៅបានសាទរ​ចំពោះ សិស្សានុសិស្ស ដែលហ៊ានងើបឡើងតវ៉ា ចំពោះភាពអយុត្តិធម៌ ធ្វើចំពោះពួកខ្លួន។ លោកចាត់ទុកសកម្មភាព របស់បណ្ដាសិស្សទាំងនោះ ថាបានបញ្ជាក់ពី ភាពក្លាហានរបស់ពួកគេ និងបញ្ជាក់ ពីភាពជឿជាក់ទៅលើសមត្ថភាពខ្លួនឯង។ លោកបន្តថា ការតវ៉ារបស់សិស្សនុសិស្ស មិនគ្រាន់តែដើម្បីស្វែងរកការពិត សម្រាប់ខ្លួនគាត់ ឬក្រុមគាត់ ដែលចេញមុខតវ៉ានេះទេ តែថែមទាំងជួយស្វែងរកការពិត ដល់ជនរងគ្រោះដទៃទៀត ដែលជាស្ថិតក្នុងជំនាន់ ប្រឡងបាក់ឌុប ឆ្នាំនេះដែរ។ 

» សូមទស្សនា ការថ្លែងរបស់លោក ប៉ា ងួនទៀង នៅក្នុងវីដេអូរបស់លោក៖