អ្នកឃើញហេតុការណ៍នេះ លោក រិទ្ធ អាយុ ៣២ ឆ្នាំរស់នៅភ្នំពេញ បានប្រាប់ទស្សនាវដ្តីមនោរម្យអាំង.ហ្វូថា នៅ​មុនពេលកើតហេតុ ម៉ូតូដែលមានស្លាកលេខ ភ្នំពេញ ១AW-០៤១១ ធុន សង់ឌ្រីមសេរី១០១១ ត្រូវបានម្ចាស់ម៉ូតូ បើកយ៉ាងលឿន ក្នុងទិសដៅពីលិចទៅកើត។ ស្រាប់តែមកដល់មុខ មណ្ឌលសុខភាពទឹកថ្លា បានបុកពេញ​ទំហឹង ជាមួយស្រ្តីម្នាក់ដែលកំពុងដើរឆ្លងថ្នល់។

ម្ចាស់ម៉ូតូ លោក នួន លី បានប្រាប់ឲ្យដឹងដែរថា លោកគ្មានចេតនាទេ លោកជាអ្នករត់ម៉ូតូឌុប ពេលមាន​គ្រោះ​ថ្នាក់នេះ លោកកំពុងតែឌុបភ្ញៀវទៅផ្សារសូរិយា ហើយក៏ស្រាប់តែមាន គ្រោះថ្នាក់បែបនេះ។ លោកថា៖ «ខ្ញុំ​មើល​មិនឃើញមានមនុស្សទេ ដោយដើរបាំងឡាន»។

ជនរងគ្រោះ អ្នកស្រី ទាវ សុគន្ធា បាននិយាយនៅពេលភ្លាមៗ ទាំងស្មារតីមិនទាន់មានច្បាស់ នៅបន្ទាប់ពីកើត​ហេតុថា អ្នកស្រីជាអ្នកធ្វើការោងចក្រ នៅក្បែរនោះឈ្មោះ អេវើរហ្រ្គីន អឹភែរឹល (AEC)។ បច្ចុប្បន្នជនរងគ្រោះ ស្នាក់នៅភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។

ករណីនេះ នៅមិនទាន់បានដោះស្រាយរួចរាល់ទេ នេះបើតាមការបញ្ជាក់ របស់ស្វាមីជនរងគ្រោះលោក វុទ្ធី កាណាន់ នៅឯមន្ទីពេទ្យលោកសង្ឃ។ លោកប្រាប់ឲ្យដឹងថា លោកបានជូបជាមួយអ្នករត់ម៉ូតូឌុប ដែលធ្វើ​ឲ្យ​ប្រពន្ធរបស់លោក រងរបួសនោះហើយ តែនៅមិនទាន់ដោះស្រាយបានថា ចេញថ្លៃព្យាបាលប៉ន្មាននោះទេ ព្រោះគ្រូពេទ្យមិនទាន់បញ្ជាក់ថា អ្នកជំងឺមានរបួសធ្ងន់ឬស្រាល៕