អ្នក​បឹង​កក់​ស្វែង​រក​យុត្តិធម៌ ពី​ការ​ឃុំ​ខ្លួន​ដោយ​ខុស​ច្បាប់

ពលរដ្ឋបឹងកក់ ប្រមាណជិតមួយរយនាក់ បានមកជួបជុំក្នា នៅមុខសាលាដំបូងរាជធានីភ្នំពេញ ដើម្បីធ្វើការតវ៉ាជាថ្មី និងស្វែងរកភាពយុត្តិធម៌ ដែលពួកខ្លួនជាង១០នាក់ បានជាប់ពន្ធនាគារ ដោយគ្មានកំហុស។
Loading...
  • ដោយ: អ៊ុម វ៉ារី អត្ថបទ ៖ អ៊ុម វ៉ារី ([email protected]oroom.info) - យកការណ៍៖ស្រ៊ុន ទិត្យ - ភ្នំពេញថ្ងៃទី២២ មិថុនា ២០១៥
  • កែប្រែចុងក្រោយ: June 23, 2015
  • ប្រធានបទ: យុត្តិធម៌
  • អត្ថបទ: មានបញ្ហា?
  • មតិ-យោបល់

ក្នុងនាមជាជនរងគ្រោះដីធ្លីដូចគ្នា មានការឈឺចាប់ដូចគ្នា នូវការរំលោភបំពាន សិទ្ធិ ច្បាប់ ពីអាជ្ញាធរអនុវត្តច្បាប់ ដែលមិនបានយកច្បាប់ មកដោះស្រាយ។ នេះជាការលើកឡើង របស់ក្រុមពលរដ្ឋ ដែលប្រកាសថា ខ្លួនបាន​រង​គ្រោះ ពីការរំលោភសិទ្ធិលំនៅដ្ឋាន ហើយបានមកចូលរួមសកម្មភាពតវ៉ា នៅមុខសាលាដំបូងរាជធានីភ្នំពេញ កាលពីថ្ងៃទី២២ ខែមិថុនានេះ ដើម្បីទាមទារពីយុត្តិធម៌សង្គម ក្នុងការរស់នៅ។

ពីក្នុងចំណោមពលរដ្ឋជិត១០០នាក់នោះ អ្នកស្រី ជា គឹមហ៊ន មកពីតំបន់បុរិកីឡា បានថ្លែងប្រាប់​ទស្សនាវដ្តី​មនោរម្យ.អាំងហ្វូថា ពួកអ្នកស្រីចេញមកទាមទាលើកនេះ បានទុកចោលនូវរឿងដីធ្លីដោយឡែក តែអ្វីដែល​អ្នកស្រីចង់បាន គឺភាពយុត្តិធម៌ត្រឹមត្រូវ និងយុត្តិធម៌របស់ច្បាប់ ដែលត្រូវបានបុគ្គលមានអំណាចមួយចំនួន យកមកអនុវត្តខុស។ អ្នកស្រីបានសង្កត់ធ្ងន់ថា៖ «យើងមកទាមទារសិទ្ធិ ក្នុងការរស់នៅ មិនមែនដូចរដ្ឋាភិបាល​កន្លងមក តែងចោទប្រកាន់ថា ជារឿងនយោបាយឡើយ។ (...) យើងជាប់គុកដោយភាពអយុត្តិធម៌ មិនមែន​ជាប់​គុក ដោយចង់បានពានរង្វាន់ ដូចលោកនាយករដ្ឋមន្រ្តី ហ៊ុន សែន លើកឡើងនោះទេ។ (...) យើងក៏ចង់​បញ្ជាក់ ពីសំដីលោក ផៃ ស៊ីផាន ជាអ្នកនាំពាក្យ (ទីស្ដីការ) គណៈរដ្ឋមន្រ្តី ដែលធ្លាប់បានលើកឡើងថា តុលាការ​លុះ​ណា​តែមានលុយ ទើបមានយុត្តិធម៌។»

សូមរំលឹកថា ស្រ្តីបឹងកក់ប្រមាណជាង១០នាក់ ត្រូវបានជាប់ពន្ធនាគារជិតប្រាំមួយខែ ក្រោមបទចោទបិទផ្លូវ និងរារាំងការអនុវត្តច្បាប់ របស់អាជ្ញាធរសាធារណៈ។ អ្នកទាំងនោះ ត្រូវបានព្រះមហាក្សត្រខ្មែរ ព្រះបាទ នរោត្តម សីហមុនី ព្រះរាជទានលើលលែងទោស នៅមុនថ្ងៃចូលឆ្នាំ ប្រពៃណៃខ្មែរ កាលពីថ្ងៃទី១៤ ខែមេសា ឆ្នាំ២០១៥កន្លងទៅនេះ។

ជាស្រ្តីចំណាស់ជាងគេ ក្នុងចំណោមអ្នកតវ៉ា លោកយាយ ម៉ាម៊ី បានលើកឡើងថា តុលាការនៅតែមិន​មាន​ភាព​ឯករាជ្យ និងគ្មានយុត្តិធម៌សម្រាប់ពួកគាត់ ដែលជាជនរងគ្រោះនៅឡើយ។ លោកយាយបានបន្តថា បើសិនជា​តុលាការ នៅតែគ្មានភាពឯករាជ្យយ៉ាងដូច្នេះ នោះកូនចៅអ្នក្រីក្រជំនាន់ក្រោយ មុខជាមិនអាចមានយុត្តិធម៌ សម្រាប់ការរស់នៅ ក្នុងសង្គមជាតិតែមួយនេះទេ។ លោកយាយបានបញ្ជាក់ថា៖ «យើងកំពង់រស់នៅក្រោម​អំណាចគេ។ គេចាប់គាបសង្កត់ ចាប់ចង ដាក់គុកស្រេចតែនឹងចិត្ត។»

ចំណែកពលរដ្ឋម្នាក់ទៀត មកពីបឹងកក់ លោក កេត ចន្ថា បានរៀបរាប់ថា អាជ្ញាធរក្រុងបានឃុបឃិត​ជាមួយ​ឈ្មួញ បង្ខំឲ្យពលរដ្ឋទទួលយកសំណង មិនសមរម្យ។ តែនៅពេលពលរដ្ឋមិនគាំទ្រ និងមិនទទួលយក​សំណង​នេះ បែរជាចោទប្រកាន់ប្រជាពលរដ្ឋថា ប្រឆាំងនឹងអាជ្ញាធរសាធារណៈ ហើយបូមខ្សាច់ និងទឹកពន្លិចផ្ទះ​ពលរដ្ឋ ដោយគ្មានអាសូរ។ លោកបានថ្លែងឡើងថា ប៉ុណ្ណេះហើយ អាជ្ញាធរនៅមិនអស់ចិត្ត ក៏មានគំនិត ចង់ប្រមូល​អ្នក​តវ៉ាទាំងអស់ ដាក់ពន្ធនាគារទៀត ជាក់ស្តែងមានស្រ្តីបឹងកក់ប្រមាណ១០នាក់ បានជាប់ពន្ធនាគារ ដែលទើប​នឹង​ដោះលែងនេះជាដើម។ សម្រាប់លោក កេត ចន្ថា  ទង្វើរបស់អាជ្ញាធររាជធានី ជាការអនុវត្តការងារ បែប​«ហ្វាសស៊ីស» ដែលលោកសុំថ្កោលទោស។

អ្នកស្រី ទេព វន្នី សកម្មជនដ៏ល្បី ក្នុងការទាមទានូវសិទ្ធិ និងសេរីភាពខាងលំនៅដ្នាន បានចង្អុលទៅតុលាការ​កម្ពុជា ថាពោរពេញទៅដោយភាពពុករលួយ គ្មានយុត្តិធម៌ ប្រជាពលរដ្ឋល្អ ថាអាក្រក់ ពលរដ្ឋ ស ថាជា​ខ្មៅ​ជាដើម។ អ្នកស្រីបានលើកឡើងថា ការពួកគាត់មកមុខសាលាដំបូងលើកនេះ គឺជូនផ្កា«ខ្មៅ» ទៅដល់ស្ថាប័ន​តុលាការនេះ ព្រោះចង់បង្ហាញថាតុលាការនេះ កំពុងដើរលើផ្លូវមួយដែលខុសច្បាប់។

ឯអ្នកស្រី សុង ស្រីលាភ បានលើកឡើងថា ថ្នាក់លើនៃរដ្ឋាភិបាលកម្ពុជា កំពុងទុកចិត្ត និងជឿជាក់លើ​កូន​ចៅ ក្រោមបង្គាប់របស់ខ្លួនណាស់។ ទោះបើពួកគេអនុវត្តខុសច្បាប់ រំលោភបំពាន ឬសម្លាប់ពលរដ្ឋក៏ដោយ ក៏​ថ្នាក់​លើមួយនេះ ជឿនិងមិនបានចុះ មកពិនិត្យផ្ទាល់ មើលពីសុខទុក្ខប្រជារាស្រ្តឡើយ។ អ្នកស្រីបានលើក​ឡើង​ថា គ្មានពលរដ្ឋណាម្នាក់ ចង់ប្រឆាំងនឹងការអភិវឌ្ឍន៍ របស់រដ្ឋាភិបាលឡើយ ឲ្យតែជាការអភិវឌ្ឍន៍ ដ៏ពិតប្រាកដ​នោះ។ តែនេះជាការអភិវឌ្ឍន៍មួយ ដែល«ធ្វើបាប»ប្រជាពលរដ្ឋទៅវិញទេ។ អ្នកស្រីថា ប្រជាពលរដ្ឋមាន​ទុក្ខ​លំបាក ជិត១០ឆ្នាំមកហើយ តែមិនមែនឃើញមុខនាយករដ្ឋមន្រ្តីខ្មែរ លោក ហ៊ុន សែន មកមើលរាស្រ្ត ដូច​នាយករដ្ឋមន្រ្តីនៅស្រុកថៃសោះ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...