ករណីនេះ បានបង្ករការភ្ញាក់ផ្អើល កាលពីវេលាម៉ោង ១២ និង៣០នាទីយប់ ថ្ងៃទី ១៩ ខែមិថុនា ឆ្នាំ២០១៥ ដែល​ជនរងគ្រោះ ទាំងគ្នាពីរនាក់ ជាគូស្នេហ៍នឹងគ្នា។ អ្នកទាំងពីរ បានជិះម៉ូតូម៉ាក MSX ស្លាលេខ ១CS-៥៩២៦ ហើយ​ត្រូវបានក្រុមចោរ មានគ្នាពីរនាក់ ជិះម៉ូតូធុន ឌូក ពណ៍ស មិនស្គាល់ស្លាកលេខ បានធ្វើសកម្មភាព​ប្លន់​បាន​សម្រេច នៅត្រង់ខាងមុខផ្សារទំនើបបាយ័ន ស្តិតក្នុងសង្កាត់មនោរម្យ ខណ្ឌ៧មករា រាជធានីភ្នំពេញ។

ករណីនេះ ត្រូវបានសាក្សីដែលនៅក្នុងហេតុការណ៍ ប្រាប់ឲ្យដឹងថា ជនរងគ្រោះទាំងពីរ អ្នកមិនមានអ្នកណា​ម្នាក់ រងរបួសនោះទេ តែពួកគេត្រូវបានក្រុមចោរ គម្រាមសម្លាប់ បើមិនប្រគល់ម៉ូតូ។ ភ្លាមៗ បន្ទាប់ពីរចោរបាន​បើក​ម៉ូតូ​រត់គេច ជនរងគ្រោះឈ្មោះ ស្រ៊ុន គឹមវែង អាយុ២៤ ឆ្នាំ និងមិត្តស្រីឈ្មោះ ស្រីពេជ្រ ដែលរស់នៅម្តុំផ្សារ​អួឬស្សី​សព្វថ្ងៃ បានទៅដាក់ពាក្យប្តឹងទាំងយប់ នៅប៉ុស្តិ៍សនគរបាលរដ្ឋបាល សង្កាត់មនោរម្យ។

ហេតុការណ៍ប្លន់ប្រដាប់អាវុធ នៅពីមុខផ្សារទំនើបបាយ័ន យកបានសម្រេច នូវម៉ូតូមួយគ្រឿងនេះ ត្រូវបានក្រុម​អ្នកឃើញហេតុការណ៍និយាយថា គ្មានអ្នកណាហ៊ានធ្វើអ្វីក្រុមចោរនោះទេ ព្រោះនៅពេលនោះ អ្នករាល់គ្នាខ្លាច​គ្រាប់កាំភ្លើង ដូចជនរងគ្រោះដូច្នោះដែរ ព្រោះក្រុមចោរបានស្រែកគម្រាម ហើយម្នាក់បើកម៉ូតូជនរងគ្រោះ​ចេញ​ទៅ ចំណែកឯម្នាក់ទៀត បានជិះចេញទៅតាមគ្នាពីក្រោយ លឿនដូចគេថតកុន។

គូស្នេហ៍ម្ចាស់ម៉ូតូទាំងពីរនាក់ បានត្រឹមតែស្រែកឲ្យគេជួយ តែគ្មានអ្នកណាហ៊ានប្រថុយ ជាមួយការគម្រាម​ពី​ក្រុមចោរនោះទេ។ អស់ជម្រើស ជនរងគ្រោះ ស្រ៊ុន គឹមវែង បានជិះម៉ូតូឌុប ទាំងពីរនាក់ទៅប្តឹងនគរបាល នៅ​សង្កាត់​ខាងលើ ឲ្យជួយដោះស្រាយទៅតាមផ្លូវច្បាប់៕