«រដ្ឋសភាពុំបានចេញ លិខិតបេសកកម្មឲ្យឯកឧត្តម ចុះធ្វើកិច្ចការនេះទេ។ ដូច្នេះខ្ញុំមិនអនុញ្ញាត ឲ្យធ្វើសន្និសីទ​កាសែត នៅវិមានរដ្ឋសភាទេ។» នេះជាអ្វី ដែលគេអាចអានបាន នៅលើចំណារ ដោយផ្ទាល់ដៃ របស់លោក ហេង សំរិន ប្រធានរដ្ឋសភា ក្នុងការបដិសេធតំណាងរាស្ត្រកម្ពុជា មិនឲ្យធ្វើសន្និសីទការសែត នៅវិមានរដ្ឋសភា ទាក់ទងនឹងករណីព្រំដែនកម្ពុជា-វៀតណាម។ ការបដិសេធរបស់លោក ហេង សំរិន ពីការប្រើប្រាស់​ផ្នែកណា​មួយ នៃរដ្ឋសភាជាតិ ដោយអ្នកតំណាងរាស្ត្រ ដើម្បីបញ្ហា«ជាតិ»នេះ ត្រូវបានក្រុមអ្នកតំណាងរាស្ត្រ មកពី​គណបក្ស​សង្គ្រោះជាតិប្រតិកម្មខ្លាំងៗ ដោយបានចាត់ទុកការសម្រេចចិត្តនោះ ថាជាការយកវិមានរដ្ឋសភា ធ្វើ​ជា​កម្មសិទ្ធិផ្ទាល់ខ្លួន ឬជារបស់បក្សពួកខ្លួន។

លោកតំណាងរាស្ត្រ ម៉ៅ មុនីវណ្ណ អនុប្រធានគណកម្មការទី៧ នៃរដ្ឋសភា មកពីគណបក្សសង្គ្រោះជាតិ បាន​ថ្លែង​ប្រាប់ទស្សនាវដ្តីមនោរម្យ.អាំងហ្វូថា ក្នុងរដ្ឋសភាប្រជាធិបតេយ្យ ប្រធានរដ្ឋសភា មានសិទ្ធិត្រឹមតែ ដឹកនាំ​អង្គប្រជុំប៉ុណ្ណោះ។ ការបដិសេធរបស់លោក ហេង សំរិន ដោយយោងទៅលើលិខិត «បញ្ជាបេសកកម្ម» គឺជាការ​អនុវត្តតាមបែបផែន«កុម្មុយនីស» ដែលអ្វីៗ ត្រូវចាំបាច់មានអនុញ្ញាត ពី«អគ្គលេខាធិការមជ្ឈឹមបក្ស»។

កាលពីថ្ងៃទី១៧ ខែមិថុនា លោក ហេង សំរិន ប្រធានរដ្ឋសភា បានបដិសេធជាផ្លូវការភ្លាមៗ នូវស្នើសុំយក​បន្ទប់​ណាមួយ ក្នុងវិមានរដ្ឋសភា ដើម្បីធ្វើជាកន្លែង សម្រាប់សន្និសិទ្ធិសារព័ត៌មានមួយ របស់ក្រុមតំណាងរាស្ត្រ​គណបក្ស​ប្រឆាំង ពាក់ព័ន្ធបញ្ហាព្រំដែនកម្ពុជា-វៀតណាម ដែលជាបញ្ហារបស់ជាតិ។ ចំណាររបស់អតីតប្រធាន ​«ក្រុម​ប្រឹក្សា​បដិវត្ត​ប្រជាជន (សម័យសាធារណរដ្ឋប្រជាមានិតកម្ពុជា)» លើលិខិតចុះថ្ងៃតែមួយនោះ មិនបាន​បង្ហាញ នូវហេតុផលជាក់លាក់ណាមួយ ដែល​ពាក់ព័ន្ធ នឹងការបដិសេធរបស់លោក ក្រៅតែពីពាក្យថា «រដ្ឋសភា ពុំបានចេញលិខិតបេសកកម្ម ឲ្យ​ឯកឧត្តម ចុះធ្វើកិច្ចការនេះទេ» នោះឡើយ។

លោក ម៉ៅ មុនីវណ្ណ តំណាងរាស្ត្រមណ្ឌលកំពង់ចាម បានថ្លែងបន្តថា ការបដិសេធរបស់ប្រធានរដ្ឋសភា នា​​ពេល​នេះ បានបង្ហាញថា ប្រធានរដ្ឋសភា កំពុងប្រើប្រាស់នូវអំណាចជ្រុល ហួសពីអ្វីដែលបានកំណត់ ក្នុងបទ​បញ្ជា​ផ្ទៃ​ក្នុងនៃរដ្ឋសភា និងថែមទាំងកំពុងរំលោភ លើរដ្ឋធម្មនុញ្ញទៀតផង។ លោកបានបញ្ជាក់ថា៖ «វិមានរដ្ឋសភា តំណាងរាស្រ្ត អាចមានសិទ្ធិប្រើប្រាស់ស្មើៗគ្នា។ បើខ្ញុំប្រើមិនបាន តែតំណាងរាស្រ្តបក្សកាន់អំណាចប្រើបាន (...) នោះមិនមែនជាសភាជាតិទេ ទៅជាសភាបក្សទៅវិញហើយ។ (...) តំណាងរាស្រ្ត ជាតំណាងឲ្យ​ប្រជា​​ពលរដ្ឋ​ខ្មែរ ទូទាំងប្រទេស តំណាងរាស្រ្តអាចចុះទៅគ្រប់ទីកន្លែង នៅទូទាំងប្រទេស។ (...) មិនចាំបាច់​មាន​លិខិត​បេសកម្ម​ទេ តំណាងរាស្រ្តនោះ ក្នុងព្រះរាជាណាចក្រកម្ពុជា ចុះទៅកន្លែងណាក៏បានដែរ។ រឿង​លិខិត​បញ្ជា​បេសកម្ម​ហ្នឹង កុម្មុយនីសតើ? ចុះទៅណា ទាល់តែមានការអនុញ្ញាត ពី​អគ្គលេខាធិការ​មជ្ឈឹម​បក្ស (...) នោះ​​ជា​ជំនាន់កុម្មុយនីសទេ កុំចេះតែនឹកឃើញទៅរក ទាញៗទៅរកសភាកុម្មុយនីសនោះពេក។»

សម្រាប់តំណាងរាស្រ្តមណ្ឌលសៀមរាប លោក អ៊ុំ សំអាន មកពីគណបក្សសង្គ្រោះជាតិដូចគ្នា ក៏បានលើកឡើង​ប្រហែលគ្នានេះដែរ។ លោកបានអះអាងថា៖ «លិខិតបេសកកម្ម លែកលែងទៅ ក្នុងនាមគណកម្មការរដ្ឋសភា នោះ​ជារឿងផ្សេង។ តែនេះយើងទៅ មិនមែនក្នុងនាមគណកម្មការសភាទេ ទៅក្នុងនាមតំណាងរាស្រ្ត។ ប្រជា​រាស្រ្ត​មានទុក្ខទីណា យើងមានសិទ្ធិអាចចុះទៅមើលបាន។»

លោក អ៊ុំ សំអាន បានបន្ថែមទៀតថា៖ «សភាជា សភារបស់ជាតិ មិនមែនរបស់សម្តេច ហេង សំរិន ឬរបស់​គណបក្ស​ប្រជាជនកម្ពុជាទេ។ អ្នកតំណាងរាស្រ្ត មានសិទ្ធិប្រើប្រាស់កន្លែងសភា សម្រាប់ផ្តល់ព័ត៌មាន ដល់​ប្រជាពលរដ្ឋ សង្គមស៊ីវិល និងអ្នកសារព័ត៌មានបាន។ (...) ការសម្រេចរបស់គាត់ មានភាពលំអៀង ព្រោះ​ប្រសិន​ជាតំណាងរាស្រ្តគណបក្សប្រជាជន គាត់ប្រាកដជាឲ្យកន្លែងហ្នឹង ធ្វើសន្និសីទការសែត។»

ប្រធានកម្មវិធីសិទ្ធិការងារ នៃមជ្ឈមណ្ឌលអប់រំច្បាប់ សម្រាប់សហគមន៍ លោក មឿង តុលា បានបង្ហាញការ​យល់ឃើញរបស់ខ្លួនថា តំណាងរាស្រ្ត ជាតំណាងដែលត្រូវ មើលការខុសត្រូវ និងសុខទុក្ខរបស់រាស្រ្តទាំងអស់ ដែលមានទុក និងជួបបញ្ហានានា។ លោកបានសរសេរ នៅលើជញ្ជាំងហ្វេសប៊ុករបស់លោកថា៖ «ប្រជាពលរដ្ឋ​បានបោះឆ្នោត ជ្រើសរើសតំណាងរបស់ខ្លួន នៅក្នុងរដ្ឋសភា។ ហើយបើម្ចាស់ឆ្នោតមានទុក្ខ តំណាងរាស្ត្រចង់​ទៅជួយ តែប្រធានសភាមិនព្រម ហើយមិនអាចជួយម្ចាស់ឆ្នោតបាន តើនេះមិនទៅជារឿងវ៉ល់ៗទៅហើយ!»

ទស្សនាវដ្តីមនោរម្យ.អាំងហ្វូ មិនអាចសុំការបង្ហាញ និងបញ្ជាក់បន្ថែមពីអ្នកនាំពាក្យរដ្ឋសភាបានទេ នារសៀល​ថ្ងៃទី១៩ ខែមិថុនា ឆ្នាំ២០១៥នេះ ដោយទូរស័ព្ទរបស់លោក ពុំមានអ្នកទទួល។ ហើយគេនៅពុំយល់ពីហេតុអ្វី ក៏ការសុំទីកន្លែងមួយ ក្នុងវិមានរដ្ឋសភា សម្រាប់ធ្វើសន្និសីទសារព័ត៌មាន ក្រុមតំណាងរាស្ត្រចាំបាច់ត្រូវធ្វើការ​សុំការអនុញ្ញាត ពីប្រធានរដ្ឋសភាបែបនេះឬ? សំនួរបានបន្តចោទទៀតថា បើប្រធានរដ្ឋសភា មាន​អំណាច​គ្រប់​គ្រងលើដំណើរការទូទៅ របស់រដ្ឋសភា ចុះលេខាធិការដ្ឋានរដ្ឋសភា ដែលត្រូវបានបង្កើតមកនោះ មាន​តួនាទី​ជា​អ្វី​ទៅ?

សម្រាប់លោក លោក ម៉ៅ មុនីវណ្ណ ក៏ដូចជាក្រុមតំណាងរាស្រ្ត គណបក្សសង្គ្រោះជាតិ នៅតែរក្សាជំហរ ក្នុង​ការ​ធ្វើ​សន្និសីសារព័ត៌មាន ស្តីពីបញ្ហា ព្រំដែនកម្ពុជា-វៀតណាមនេះដដែល។ ក្រុមតំណាងរាស្រ្ត​គណបក្ស​សង្គ្រោះ​ជាតិ នឹងជួបពិភាក្សាគ្នាជាថ្មី លើការសម្រេចស្វែងរកទីតាំងដ៏សមគួរ សម្រាប់សន្និសីទសារព៍ត៌មាននេះ នា​ពេល​ខាងមុខ៕