អ្នកជំងឹ ត្រូវបានបញ្ជូនមកដល់មន្ទីរពេទ្យ នៃរាជធានីបាងកក កាលពីថ្ងៃទី១៥ ខែមិថុនា ឆ្នាំ២០១៥នេះ ដើម្បី​ពិនិត្យ​ព្យាបាល អាការៈបេះដូងរបស់ខ្លួន។ អ្នកជំងឺជាច្រើនមកពីតំបន់មជ្ឈឹមបូព៌ា បានជ្រើសរើសមន្ទីរពេទ្យ នៃ​រាជធានីបាងកក ដើម្បីពិនិត្យព្យាបាលរោគរបស់ពួកគេ។ សមាជិកបីនាក់ទៀត នៃអ្នកជំងឺខាងលើ ក៏ត្រូវ​បាន​ដាក់ឲ្យស្ថិតក្រោមការត្រួតពិនិត្យ របស់មន្ទីរពេទ្យ បាមរ៉ាស្នារ៉ាឌៀរ៉ា (Bamrasnaradura) ដែលមាន​ជំនាញ​ខាង​ការ​ប្រយុទ្ធទល់នឹងជំងឺរាតត្បាត។

ជំងឺ «MERS» បានបង្ហាញខ្លួនដំបូងគេ នៅក្នុងឧបទ្វីបអារ៉ាប់ ដែលបានសម្លាប់មនុស្សជាង ៩៥០នាក់ និង​៤១២​នាក់ នៅក្នុងប្រទេសអារ៉ាប៊ីសាអ៊ូឌីត រាប់ពីឆ្នាំ២០១២​កន្លងមក។ រោគរាតត្បាតមួយនេះ ក៏បានធ្វើឲ្យមនុស្ស​២៣នាក់ បានស្លាប់ នៅក្នុងប្រទេសកូរ៉េខាងត្បូងដែរ។ អ្នកជំងឹទីមួយ របស់ប្រទេសកូរ៉េ ត្រូវបានរកឃើញថា បាន​ឆ្លងជំងឺនេះ កាលពីថ្ងៃទី២០ ខែឧសភាកន្លងទៅ បន្ទាប់ពីអ្នកជំងឺ បានធ្វើដំណើរកំសាន្ដ ទៅកាន់ប្រទេស អារ៉ាប៊ីសាអ៊ូឌីត។

អង្គការសុខភាពពិភពលោក ហៅកាត់ថា «OMS» បានថ្លែងពីក្ដីរំពឹងរបស់ខ្លួន កាលពីថ្ងៃទី១៧ ខែមិថុនានេះ ថា​មេរោគជំងឺ «MERS» ដែលកំពុងមានវត្តមាន នៅប្រទេសកូរ៉េខាងត្បូងនោះ ជាសញ្ញា«ប្រកាសអាសន្ន»មួយ សម្រាប់​គ្រប់ប្រទេសទាំងអស់ នៅលើផែនដី។ អង្គការជំនាញខាងសុខភាព របស់អង្គការសហប្រជាជាតិ​មួយ​នេះ បានសង្កត់ធ្ងន់ពីកង្វះ នៃការយល់ដឹង របស់បុគ្គលិកសុខាភិបាល និងសាធារណៈជនទូទៅ ពីមេរោគនេះ នឹង​ជា​លទ្ធភាពមួយ ជំរុញឲ្យមេរោគនៅតែមានជីវិត។

ជំងឺនេះបង្ហាញអាការៈដំបូង តាមរយៈការគ្រុនញ៉ាក់ បង្កឲ្យមានការធីងធោង និងពិបាកដកដង្ហើម។ រហូតមក​ដល់​ពេលនេះ អ្នកវិទ្យាសាស្ត្រនៅមិនទាន់រកឃើញ ពីថ្នាំវ៉ាក់សាំងបង្កា ទល់នឹងមេរោគបាននៅឡើយ ខណៈ​ភាគរយនៃអ្នកជំងឺ ដែលរងគ្រោះដល់ជីវិតនោះ មានដល់ទៅ៣៥ភាគរយ។ នេះបើតាមអង្គការ សុខភាព​ពិភព​លោក ដដែល៕