ទោះជាមានជម្ងឺ ឬចាស់ជរាបែបណាក៏ដោយ ក៏គ្រួសាររបស់អ្នក មិនដែលចង់ឲ្យអ្នកបាត់បង់ ពីពួកគេឡើយ។ នេះ ​គឺជាជិវិត ព្រោះថា តាំងពីកើតតូចក្រូចឆ្មារ រហូតមកដល់ពេលនេះ ជីវិតគឺជាការប្រយុទ្ធតស៊ូ ដ៏ស្វិត​ស្វាញ​មួយ ដែលគ្រួសារទាំងមូល បានព្រមព្រៀមស្ម័គ្រស្មោះ ទទួលយក ហើយបើព្រោះតែជម្ងឺ ធ្វើឲ្យអ្នកអស់សង្ឃឹម សម្រេចចិត្តចាកចេញ ពីមនុស្សជាទីស្រឡាញ់នោះ ផលវិបាកចុងក្រោយ គឺពួកគេទាំងនោះទៅវិញទេ ដែល​រង​ទុក្ខសោក នឹងសោកស្តាយអ្នក ជារៀងរហូត។

តែយុវជនម្នាក់ក្នុងវ័យ២២ឆ្នាំនេះវិញ បានគិតខ្លី ព្រោះខ្លួនមានជម្ងឺ«សតិមិនគ្រប់» ហើយបានធ្វើសកម្មភាព លោត​ពីលើស្ពានអាកាស ស្ទឹងមានជ័យ ក្នុងសង្កាត់ស្ទឹងមានជ័យ រាជធានីភ្នំពេញ នៅវេលាម៉ោង១០ និង​៤០នាទី​ព្រឹកថ្ងៃទី០៦ ខែមិថុនាឆ្នាំ២០១៥ ដែលមានកម្ពស់ប្រមាណជា១៥ម៉ែត្រ ដោយគ្មានអ្នកណាឃាត់​ទាន់​ឡើយ។

បងប្រុសបង្កើត របស់យុវជនរងគ្រោះ បានប្រាប់ឲ្យដឹងថា ប្អូនលោកឈ្មោះ សីហា អាយុ២២ឆ្នាំ មានជម្ងឺ​វិកល​ចរិត​យូរមកហើយ ម្តងដឹងខ្លួន ម្តងមិនដឹងខ្លួន និងថា ឲ្យតែប្អូនខ្លួននេះ នៅម្នាក់ឯង គឺចង់សម្លាប់ខ្លួនរហូត តែ​កន្លង​មក មិនបានសម្រេច។ លោកមិននឹកស្មានថា បាត់មួយភ្លែត ក៏ស្រាប់ប្អូនប្រុសលោក បានធ្វើដំណើរ​មក​ដល់ ស្ពានស្ទឹងមានជ័យសោះ ខណៈផ្ទះរស់នៅសព្វថ្ងៃ ស្ថិតនៅក្រុមទី២៨ សង្កាត់ទំនប់ទឹក ខណ្ឌចំការមន រាជធានីភ្នំពេញឯណោះ។

បច្ចុប្បន្នយុវជនរងគ្រោះ មិនមានគ្រោះថ្នាក់ដល់អាយុជីវិតទេ តែរងរបួសធ្ងន់បែកក្បាល ហូរឈាម ត្រូវ​បញ្ជូន​ទៅមន្ទីពេទ្យរូស្ស៊ី ដើម្បីសង្គ្រោះបន្ទាន់។

បងប្រុសរូបនោះ បានឲ្យដឹងថា ខ្លួន និងគ្រួសារ មិនដែលមានចិត្ត ចង់បាត់បង់ប្អូនប្រុសម្នាក់នេះទេ ទោះជាគេ​មានជម្ងឺ ប្រចាំកាយក៏ដោយ។ ម្យ៉ាងទៀត បើគេមានគ្រោះថ្នាក់ដល់ជិវិតទៅ គ្រួសារច្បាស់ជាត្រូវស្តាយគេ អស់​មួយជីវិត៕

» ហេតុការណ៍រងគ្រោះ ជារូបភាពវីដេអូ៖