ជីវិតរបស់មនុស្ស «មានខ្ពស់ មានទាប» មិនប្រាកដថា អ្នកណាម្នាក់ អាចនៅជាអ្នកមានរហូត ឬមួយនៅជា​អ្នក​ក្ររហូតនោះទេ។ សំខាន់ឲ្យតែមនុស្សនោះ មានគំនិតច្បាស់លាស់ ក្នុងការធ្វើអ្វីមួយ ដោយមានគោលដៅ​ជាក់​លាក់ គ្មានបញ្ហាណា ដែលរកដំណោះស្រាយយ មិនបាននោះឡើយ។ តែអនិច្ចាបុរសម្នាក់នេះ បែរជាបានលើក​ឡើង ពីជីវិតរបស់ខ្លួនឲ្យដឹងថា តាំងពីមានប្រពន្ធច្រើន មានកូនជុំជិត រហូតដល់ជីវិត ប្រែក្លាយជាតែលតោល រស់នៅតែម្នាក់ឯងជាមួយកូន ព្រោះតែគំនិតមិនកើត។

បុរសដែលបានទម្លាយ រឿងជីវិតដ៏ជូរចត់របស់ខ្លួន ប្រាប់ទស្សនាវដ្ដីមនោរម្យ.អាំងហ្វូ មានឈ្មោះ ភោគ តឿ រស់​នៅភូមិដំណាក់ធំទី១ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ បច្ចុប្បន្នលោករស់នៅ ជាមួយកូន​ប្រុស​ពីរនាក់ ដែលជីវិរបស់លោក ស្ទើរតែក្លាយទៅជាអ្នកសុំទានទៅហើយ។ ពោល គឺលោកនៅសល់ការងារ តែ​មួយ​ប៉ុណ្ណោះ នោះគឺត្រូវដើរអូសរទេះអេតចាយ ដើម្បីលក់ដូរ បានប្រាក់បន្តិចបន្តួច គ្រាន់នឹងចឹញ្ចិមកូនប្រុស​ទាំង​ពីរ បានមួយថ្ងៃសម្រាប់មួយថ្ងៃ។

ភោគ តឿ ដែលមានវ័យជាង៣០ឆ្នាំ បាននិយាយទាំងទឹកមុខសោះកក្រោះ មកកាន់អ្នកសារព័ត៌មានថា លោក​ជា​អតីត​អ្នកមានប្រពន្ធបីនាក់  តែបច្ចុប្បន្នសូម្បីតែម្នាក់ ក៏គ្មានដែរ។

លោកថា ប្រពន្ធទី១មានកូនម្នាក់ ក៏បានបាក់បែកគ្នាទៅ ព្រោះលោកគំនិតមិនកើត បានជាប្រពន្ធនោះមិន​រស់​នៅ​ជាមួយ។ ប្រពន្ធទីពីរ មានកូនពីរនាក់ទៀត គេក៏បានចាកចេញពីលោកទៀត ដោយមានអ្នកថ្មី រហូតដល់​លោក​មានប្រពន្ធទីបី នាងបានរស់នៅជាមួយលោក រហូតមានកូនប្រាំនាក់ បច្ចុប្បន្ននាងក៏ចាកចេញ​ពីលោក​ដែរ គឺ​បាន​បន្សល់​ទុក កូនប្រុសពីនាក់សព្វថ្ងៃ ដែលលោកមានក្នុងបន្ទុក។

បុរសដែលសារភាពថា ខ្លូនគ្មានគំនិតរកស៊ី ដែលធ្វើឲ្យប្រពន្ធ ចេះតែរត់ចោលរហូត បានបញ្ជាក់ប្រាប់​ទស្សនាវដ្ដី កាលពីថ្ងៃទី០៥ ខែមិថុនា នេះថា លោកឈប់យកប្រពន្ធ បន្តទៀតហើយ។ តែថ្ងៃណាមួយ ដែល​ប្រពន្ធរបស់​លោក​វិលត្រឡប់មកវិញ នោះលោកនឹងយល់ព្រមរួមរស់ ជាមួយនាងបន្ត ដោយសន្យាចឹញ្ចិម​កូន​ទាំងអស់គ្នា ឈប់​ប្រព្រឹត្តរឿងអាក្រក់ៗ ឲ្យនាងពិបាកអ្វីទាំងអស់។

បញ្ចប់ពាក្យសម្តីនេះ ស្ទើមិនទាន់ លោកបានបន្តថា ពេលនេះកូនប្រុសទាំងពីរនាក់ កំពុងតែនឹករកម្ដាយ​របស់​ខ្លួន ដែល​បច្ចុប្បន្ន នាងកំពុងប្រកបរបរ ជាអ្នកលក់បន្លែនៅផ្សារនាគមាស តែនាងមិនបាននៅជាមួយលោក ដូច​ពី​មុន​ទៀតទេ។ កូនប្រុសទាំងពីរ ដែលកំពុងគេង នៅលើរទេះកំសត់ ជាមួយឪពុកអភ័ព្ទ ដែលកំពុងដើរបណ្តែត​ខ្លួន តាមដងវិថីនានា នៅក្នុងរាជធានីភ្នំពេញនោះ ម្នាក់អាយុ៥ឆ្នាំឈ្មោះ ភោគ វិដ និងម្នាក់ទៀត អាយុ៤ឆ្នាំ​ឈ្មោះ ភោគ វិន។៕