អត្ថប្រយោជន៍១០យ៉ាង របស់កញ្ចប់តែ ដែលមិនធ្លាប់ដឹង!
- ដោយ: ក. សោភណ្ឌ អត្ថបទ និងយកការណ៍៖ ក.សោភ័ណ្ឌ( [email protected]) - ភ្នំពេញ ថ្ងៃទី២៤ធ្នូ ២០១៤
- កែប្រែចុងក្រោយ: December 26, 2014
- ប្រធានបទ: ជីវិតប្រចាំថ្ងៃ
- អត្ថបទ: មានបញ្ហា?
- មតិ-យោបល់
-
សម្បកកញ្ចប់តែ ដែលអ្នកតែងគិតថា វាជាសម្រាមទៅហើយនោះ អាចជួយដល់សុខភាពបន្ទាប់បន្សំ អាវយវៈខាងក្រៅ និងការប្រើប្រាស់សម្ភារៈប្រចាំថ្ងៃរបស់អ្នក។ ពេលខ្លះអ្នកត្រូវប្រើប្រាស់ប្រាក់ ដូចជាដើម្បីទៅទិញថ្នាំបង្កាជាដើមមកព្យាបាលរោគ ឬផលិតផលអ្វីមួយ ដើម្បីមកសំអាតសម្ភារៈផ្សេងៗ។ តែជាមួយសម្បកកញ្ចប់តែដែលប្រើហើយ អ្នកពិតជាអាចសន្សំសំចៃប្រាក់នេះ បានមួយផ្នែក និងមិនគួរឲ្យនឹកស្មានដល់។ ខាងក្រោមនេះ ជាគុណប្រយោជន៍ ទាំង១០ ពីកញ្ចប់តែ ដែលអ្នកមិនបានស្គាល់ពីមុនមក៖
១. ភ្នែកហើម ឬក៏ចុករោយស្រពន់ភ្នែក៖ អ្នកអាចយកកញ្ចប់តែទៅស្អំ នៅពេលភ្នែករបស់អ្នកឡើងហើម និងរោយស្រពន់។ វិធីអនុវត្ត៖ យកកញ្ចប់តែ ទៅដាក់លើទឹកដែលត្រជាក់មួយសន្ទុះ រឺក៏ដាក់ក្នុងទូរទឹកកក រួចយកមកដាក់ចំពីលើភ្នែករបស់អ្នក វានឹងជួយសម្រួលដល់អាការៈហើមបាន។
២. ជាំសាច់៖ ប្រសិនបើស្បែករបស់អ្នក រងប៉ះទង្គិចនឹងអ្វីមួយ រួចឡើងទៅជាជាំខ្មៅ អ្នកអាចយកកញ្ចប់តែ មកស្អំពីលើបាន។ បន្ថែមពីនេះទៅទៀត កញ្ចប់តែបានផ្ទុកនូវសារធាតុតែខ្មៅ ដែលវាជួយឲ្យឈាម ដើរបានស្រួល និងជួយកាត់បន្ថយនូវបញ្ហាជាំបាន។
៣. រងការរលាក ដោយកម្តៅថ្ងៃ៖ កញ្ចប់តែដែលនៅសើម អ្នកអាចយកមកញីលើស្បែក ដែលរងនឹងការរលាក នូវកម្តៅថ្ងៃ។ វានឹងជួយឲ្យស្នាមរលាក អាចរលាយបាត់ទៅវិញ បានផងដែរ។ ប៉ុន្តែប្រសិនបើអ្នករងការរលាកពេញដងខ្លួន អ្នកយកកញ្ចប់តែ លាយជាមួយនឹងទឹក រួចចាក់មុជតែម្តងក៏បាន។
៤. កាត់បន្ថយការឈឺចាប់ បន្ទាប់ពីកោរពុកមាត់៖ ជាការពិត មនុស្សប្រុសភាគច្រើនតែងមានការឈឺចាប់ បន្ទាប់ពីកោរពុកមាត់ ជាមួយនឹងផ្លែឡាម។ ប៉ុន្តែអ្នកអាចយកកញ្ចប់តែ មកញីថ្នមៗ ត្រង់កន្លែងដែលកោរពុកមាត់ វាជួយកាត់បន្ថយ ភាពឈឺចាប់នេះបាន។
៥. ជួយលើបញ្ហាមុន៖ ប្រសិនបើអ្នកមានបញ្ហាមុន កញ្ចប់តែអាចជួយអ្នកបាន គ្រាន់តែអ្នកឧស្សាហ៍លុបមុខ ជាមួយនឹងការប្រើប្រាស់ កញ្ចប់តែបៃតង។ ចំពោះវិធីនេះ អាចជួយអ្នកបាន ប៉ុន្តែអាស្រ័យ ទៅលើអ្នកផងដែរ ថាអ្នកព្យាយាមអនុវត្តវិធីនេះ បានប៉ុណ្ណា?
៦. ជួយលើ បញ្ហាឈឺក្រហាយមាត់៖ បើអ្នកមានអាការៈឈឺមាត់ អ្នកអាចយកកញ្ចប់តែ លាយជាមួយទឹក រួចខ្ពុលមាត់ វានឹងជួយព្យាបាល នូវបញ្ហាឈឺមាត់បាន។
៧. ជួយឲ្យមានក្លិន ដកដង្ហើមក្រអូបប្រហើរ៖ ក្លិនមាត់ជារឿងសំខាន់ សម្រាប់មនុស្សគ្រប់គ្នា ក្នុងការប្រាស្រ័យទាក់ទងគ្នា ទៅវិញទៅមក។ ក្នុងនោះដែរ កញ្ចប់តែក៏បានដើរតួនាទី យ៉ាងសំខាន់ ក្នុងការជួយបំបាត់ក្លិនមាត់ របស់អ្នក ឲ្យត្រឡប់មកជាក្លិនក្រអូបប្រហើរបានដែរ។ វិធីអនុវត្ត៖ អ្នកអាចយកកញ្ចប់តែ លាយជាមួយទឹក រួចក្រពុលមាត់ ជាការស្រេច។
៨. ជួយឲ្យជើង មានសំណើម៖ មុនអ្នកចូលគេង អ្នកអាចយកទឹកក្តៅឧណ្ឌៗ លាយជាមួយនឹងកញ្ចប់តែ ត្រាំរយៈពេល១០ ទៅ១៥នាទី ហើយយកមកជូតជើងដែលស្ងួត ជាការស្រេច។ កញ្ចប់តែនឹងអាចធ្វើឲ្យជើងរបស់អ្នក មានសំណើមបានមួយគ្រាមកវិញ។
៩. ជួយដោះស្រាយ នូវក្លិនមិនល្អ៖ ប្រហែលជាអ្នកមិនធ្លាប់ដឹងនោះទេ ថាកញ្ចប់តែអាចជួយដោះស្រាយ នូវបញ្ហាក្លិនល្អ ដែលជាប់ដៃរបស់អ្នកបាន ដូចជាក្លិនត្រី ឬក្លិនខ្ទឹមជាដើម។ មិនតែប៉ុណ្ណោះ វាអាចជួយដោះស្រាយ នូវក្លិនស្អុយ ដែលជាប់ក្នុងទូរទឹកកកបានផងដែរ។
១០. កញ្ចប់តែជួយ លាងសម្អាតចានរបស់អ្នក៖ ចំពោះចំនុចនេះ ហាក់ដូចជាចម្លែកបន្តិច ប៉ុន្តែវាជាការពិត ដែលកញ្ចប់តែ អាចលាងសម្អាតចាន របស់អ្នកបានយ៉ាងល្អប្រសើរ។ បន្ថែមពីនេះទៅទៀត អ្នកអាចជូតកញ្ចក់ទ្វារ បង្អួច ឥដ្ឋ រឺក៏គ្រឿងសង្ហារឹមនានាបាន ជាមួយនឹងកញ្ចប់តែ ។ ប៉ុន្តែ បន្ទាប់ពីអ្នកលាងសម្អាត នូវរបស់ទាំងអស់នេះហើយ ត្រូវប្រាកដចិត្តថា អ្នកត្រូវជូតរបស់របរទាំងនោះបានស្ងួតល្អ។ ពីព្រោះ «តែ» ជារុក្ខជាតិពីធម្មជាតិមួយ ដែលជ្រលក់ពណ៌បានល្អ ហើយបើអ្នកមិនបានជូត របស់ទាំងនោះ បានស្អាតល្អទេ វាអាចបង្កទៅជា ឡើងពណ៌ជាប់រហូត៕