អាពាហ៍ពិពាហ៍ពិសេស៖ កូនក្រមុំដ៍ស្រស់ស្អាត ជាមួយជនពិការ (vdo)
- ដោយ: ក. វិច្ចនី អត្ថបទ៖ក. វិច្ចនី ([email protected]) - យកការណ៍៖ ហេង វុទ្ធី - ភ្នំពេញ ថ្ងៃទី ២៥ ធ្នូ ២០១៤
- កែប្រែចុងក្រោយ: December 27, 2014
- ប្រធានបទ: រញ្ជួយចិត្ត
- អត្ថបទ: មានបញ្ហា?
- មតិ-យោបល់
-
ឆ្នាំ២០១៤ នឹងបញ្ចប់ទៅ ជាមួយនឹងប្រវត្តិស្នេហ៍ដ៏ពិសេសមួយ ដែលបញ្ជាក់ដល់ពិភពបេះដូងលន្លង់លន្លោចក្នុងលោក ថា«ស្នេហាពិត មិនគិតពីរូបរាងកាយឡើយ»។ នារីរូបស្រស់វ័យក្មេងល្ហក់ បានសម្រេចដាក់ចិត្តស្រលាញ់យ៉ាងពេញទំហឹង លើបុរសមួយរូប ដែលជាជនពិការជើងទាំងពីរតាំងពីកំណើត។ សេចក្ដីស្នេហា ដែលកើតចេញពីក្តីអាណិត របស់យុវតីប្រិមប្រិយរូបនេះ បានឈានមកដល់អាពាហ៍ពិពាហ៍ កាលពីពេលថ្មីៗនេះ ជាមួយម្ចាស់ដួងចិត្តកំពូលស្នេហ៍ម្នាក់នេះ។
អ្នកដែលនៅជុំវិញអ្នកទាំងពីរ រួមទាំងចាស់ទុំឪពុកម្ដាយទាំងសងខាង មិនមាននរណាម្នាក់នឹកស្មានដល់ឡើយ ថាអ្នកទាំងពីរនឹងមានថ្ងៃដ៏ពិសេសនេះ។ ប៉ុន្តែនៅទីបំផុត គឺពួកគេទាំងនេះហើយ ដែលបានផ្សំផ្គុំ យុវតីរូបស្រស់ សុខ នឿន និងយុវជន ច្រឹក សុផាត ទៅតាមប្រពៃណីយ៉ាងអធឹកអធម សមតាមបំណងរបស់ពួកគេ កាលពីថ្ងៃទី ២៤ និង ២៥ ខែធ្នូ កន្លងមកនេះ។ គ្រប់ភ្ញៀវពន្លឺញាតិមិត្តជិតឆ្ងាយទាំងអស់ ដែលបានចូលរួមជាច្រើន ក៏មិនមាននរណាម្នាក់ មិនស្ងើចសរសើរដល់ពួកគេទាំងពីរនោះដែរ និងជំរុញឲ្យទស្សនាវដ្ដីមនោរម្យ.អាំងហ្វូ បានទៅយកព័ត៌មាននេះ មកជំរាបជូនប្រិយមិត្ត។
កញ្ញា សុខ នឿន បាននិយាយប្រាប់ទស្សនាវដ្តីថា នាងបានសម្រេចចិត្តប្រគល់ក្ដីស្នេហ៍របស់នាង ទៅឲ្យបុរសកំពូលស្នេហ៍ ដោយបេះដូងរបស់នាងផ្ទាល់ និងមិនមានការបង្ខំពីម្តាយឪពុក ឫបងប្អូននោះឡើយ។ ហើយក្ដីស្នេហ៍របស់អ្នកទាំងពីរ ដែលធ្វើឲ្យមានការយល់ចិត្តគ្នាទៅវិញទៅមក បានកើតមានឡើងដោយសារ នៅក្នុងភូមិស្រុកជាមួយគ្នា និងបន្ទាប់មកតាមរយៈទូរស័ព្ទតែប៉ុណ្ណោះ។ នាងបានបន្ថែមទៀតថា នាងមានការសប្បាយចិត្តណាស់ ដែលបានរៀបការជាមួយបុរសដែលខ្លួនស្រលាញ់។
អង្គុយនៅលើរទេះកង់សម្រាប់ជនពិកា លោក ច្រឹក សុផាត បានញញឹមបិទមាត់មិនជិត បង្ហាញភាពជឿជាក់ប្រាប់ទស្សនាវដ្តីថា លោកលង់ស្នេហ៍នឹងកញ្ញា សុខ នឿន មិនត្រឹមតែដោយសាររូបសម្ផស្សដ៏ស្រស់ស្អាតរបស់នាងនោះទេ តែដោយសារតែនាងមានចរិកសុភាព រម្យទុំ គួរជាទីបេតី។ លោកថា រូបលោកមិននឹកស្មានថា ខ្លួនជាជនពិការធ្វើអ្វីមិនបានដូចអ្នកទៃផង បែជាមានថ្ងៃនេះដូចគេឯងអញ្ចឹងទេ។
មានមុខរបរជាអ្នកលក់ដូរទូរស័ព្ទ និងជូសជុលទូរស័ព្ទ បុរសពិការតែរូប លោក ច្រឹក សុផាត បានអះអាងទៀតថា លោកនឹងមិនបារម្ភខ្លាចក្រែងថ្ងៃណាមួយ នាង សុខ នឿន អាចនឹងបោះបង់ចោលរួបលោកនោះឡើយ ដោយសារតែនៅមុនចូលរោងការនេះ នាងបាននិយាយសម្ដីមួយដ៏អស្ចារ្យថា៖ «អ្វីគ្រប់យ៉ាង គាត់អាចទទួលរូបខ្ញុំបាន»។
បើទើបតែបានរៀបការ តែគូរស្នេហមួយគូរនេះ ទំនងជាបានគិតគូរ ពីអនាគតវែងឆ្ងាយរបស់ពួកគេរួចហើយ។ កញ្ញា សុខ នឿន បាននិយាយទាំងអ៊ឹមអៀនថា នាងមានបំណងចង់បានកូនបីនាក់ នឹងមានគម្រោងពង្រីកមុខជំនួញរបស់ស្វាមីខ្លួនឲ្យកាន់តែធំឡើង។ នាងបាននិយាយបង្ហាញពីជំនឿចិត្ត ដែលខ្លួនបានរៀបអាពាហ៍ពិពាហ៍នេះ ថាជាជម្រើសដែលមិនមានការស្ដាយក្រោយ សម្បីបន្តិច។
ទស្សនាវដ្ដី សូមទុកជូនប្រិយមិត្តទស្សនាវីដេអូ នៃកិច្ចសម្ភាសទាំងស្រុងរវាង គូរស្នេហ៍ទាំងពីរ និងមានការចូលរួមពីឪពុកម្ដាយរបស់អ្នកទាំងពីរផង៖