ទីស្ដីការ​គណៈរដ្ឋមន្ត្រី​​ បាន​អនុម័ត​​សេចក្ដី​​ព្រាង​ច្បាប់​ ស្ដីពី សមាគម និង​អង្គការមិន​មែន​រដ្ឋាភិបាល កាលពី​ថ្ងៃ​សុក្រ ទី៥ ខែមិថុនា ឆ្នាំ២០១៥នេះរួចហើយ ក្រោមការដឹកនាំអង្គប្រជុំ ដោយលោក ហ៊ុន សែន នាយករដ្ឋមន្ត្រី​កម្ពុជា រួច​គ្រោង​នឹង​បញ្ជូន​ច្បាប់​នេះ​ ទៅ​រដ្ឋសភា​ នៅ​សប្ដាហ៍​ក្រោយ។ នេះជាការថ្លែង របស់លោក ផៃ ស៊ីផាន អ្នកនាំពាក្យ​ទីស្ដីការ​គណៈរដ្ឋមន្ត្រី​ ទៅកាន់សារព័ត៌មានក្នុងស្រុក។

លោក ស៊ីផាន បានថ្លែងបន្តថា ការបញ្ជូនច្បាប់ដ៏ចម្រូងចម្រាស់នេះ ទៅកាន់រដ្ឋសភា អាចនឹងត្រូវប្រើពេល១ឬ​២ថ្ងៃទៀត ដើម្បីអាចឲ្យអ្នកជំនាញ អាចធ្វើការ​កែសម្រួល នូវមាត្រា និងពាក្យពេជ្យ​មួយ​ចំនួន ដែលមិនចាំបាច់ និងធ្វើឲ្យមានការស្មុគ្រស្មាញ។ លោក បានបញ្ជាក់ថា៖ «ច្បាប់​នេះ​ (...) នឹង​ត្រូវ​បញ្ជូន​ទៅ​រដ្ឋសភា ​នៅ​​ថ្ងៃ​ច័ន្ទ ឬ​ថ្ងៃ​អង្គារ​សប្ដាហ៍​ក្រោយ ពីព្រោះយើង​ចាំ​បាច់​ ត្រូវ​លុប​មាត្រា​ចំនួន​ពីរ​ចេញ និង​កែប្រែ​ពាក្យពេចន៍​មួយ​ចំនួន។ មាត្រា​ទាំង​ពីរ​​នេះ​ ត្រូវ​បានលុប​ចោល​​ ដោយ​សារ​តែ​មាត្រា​ទាំង​នោះ​ ហាក់​ដូច​ជា​ធ្វើ​ឲ្យ​រឿង​ស្មុគ​ស្មាញ។​ ដូច្នេះ​ហើយ​សម្ដេច​នាយក​រដ្ឋមន្ត្រី ចង់​ធ្វើ​ឲ្យ​វា​មាន​​លក្ខណៈ​សាមញ្ញ​ និង​ងាយ​ស្រួល​ សម្រាប់​អង្គការ​ មិន​មែន​រដ្ឋាភិបាល​ចុះ​បញ្ជី មាន​ន័យ​ថា លុប​បំបាត់​បញ្ហា​ការិយាធិបតេយ្យ​។»

នាពេលកន្លងមក សង្គមស៊ីវិល ចំនួនជាង៣០០អង្គការសមាគម បានសម្ដែងការ«មិន»គាំទ្រ របស់ពួកគេ ទៅ​លើ«សេចក្តីព្រាងច្បាប់ ស្តីពី សមាគម និងអង្គការមិនមែនរដ្ឋាភិបាល»នេះឡើយ។ ពួកគេបានលើកឡើងថា សម្រាប់បរិបទកម្ពុជា ក្នុងពេលបច្ចុប្បន្ន សេចក្តីព្រាងច្បាប់នេះ មិនចាំបាច់ត្រូវមាននោះទេ ហើយ​ពួកគេបាន​ស្នើរ​រដ្ឋាភិបាល ឲ្យបញ្ឈប់ការធ្វើសេចក្តីព្រាងច្បាប់នេះ ជាបណ្តោះអាសន្ន និងអនុញ្ញាត ឲ្យមានការចូលរួច ពិភាក្សា និងផ្តល់យោបល់ពីសង្គមស៊ីវិល និងភាគីពាក់ព័ន្ធមួយចំនួនទៀត។ អង្គការសង្គមស៊ីវិល​ទាំង​នោះ បាន​សម្ដែង​ការ​ព្រួយបារម្ភថា សេចក្តីព្រាងច្បាប់នេះ នឹងដាក់ការរឹតត្បិតសេរីភាព ទៅលើពួកគេ។

តបនឹងការលើកឡើង របស់ក្រុមសង្គមស៊ីវិលខាងលើ លោកនាយករដ្ឋមន្រ្តី ហ៊ុន សែន បានថ្លែងថា ការ​ពិគ្រោះ​យោបល់លើ«សេចក្តីព្រាងច្បាប់ ស្តីពីសមាគម និងអង្គការមិនមែនរដ្ឋាភិបាល»នេះ មានច្រើនពេក​មក​ហើយ។ លោក ហ៊ុន សែន បានបញ្ជាក់ថា៖ «ពិគ្រោះយោបល់ហ្នឹង វាច្រើនពេកហើយ។ ឥឡូវធាតុចូលថ្មីៗ បន្ថែមទៀត ក៏ត្រូវបានយកចិត្តទុកដាក់។ (…) ឥឡូវសំឡេងហាក់ដូចជាមិនជំទាស់ នឹងមិនឲ្យចេញច្បាប់ទេ ប៉ុន្តែសុំ​ពិគ្រោះ​យោបល់។ (…) យោបល់នេះ យើងបានយកចិត្តទុកដាក់ពេញទំហឹង អ្វីដែលយើង អាចទទួលបាន អ្វី​ដែល​យើង មិនអាចទទួលបាន។»

យ៉ាងណាក៏ដោយ លោក ហ៊ុន សែន បានធានាអះអាងថា ច្បាប់​នេះ​ នឹង​មិន​ជ្រៀត​ជ្រែក​ ប្រតិបត្តិការ​របស់ក្រុម​អង្គការសង្គមស៊ីវិលទាំងនោះ​ នៅ​ក្នុង​ប្រទេស​កម្ពុជា​ឡើយ​។ ខាងក្រោមនេះ ជាការដកស្រង់ នូវមាត្រាមួយ​ចំនួន ដែលមានចែង នៅក្នុងសេចក្ដីព្រាងច្បាប់ ស្ដីពីសមាគម និងអង្គការក្រៅរដ្ឋាភិបាល ដែលបានអនុម័ត ត្រៀម​បញ្ជូន​ទៅរដ្ឋសភា និងដែលទស្សនាវដ្ដីមនោរម្យ.អាំងហ្វូទទួលបាន៖