នាង អាណា អារ៉េអូឡា ហែណង់ដេស (Anna Areola-Hernandez) ត្រូវបានតុលាការផ្ដន្ទាទោស ឲ្យជាប់ពន្ធនាគារ១០ ឆ្នាំ បន្ទាប់ពីតុលាការបានរកឃើញ ថានាងបានប្រព្រឹត្តិកំហុស ក្នុងការបោកបន្លំក្មេងប្រុស មិនទាន់គ្រប់អាយុចំនួនបីនាក់ ឲ្យ​មករួមភេទជាមួយនាង។ មានលំនៅដ្ឋាន នៅក្រុង Glendale ក្នុងរដ្ឋអារីហ្សូណា ( សហរដ្ឋអាមេរិក) យុវតីរូបនេះ បាន​ប្រើ​ប្រាស់​នាមសម្គាល់ Tiny Hernandez នៅលើបណ្ដាញសង្គម និងបានបន្លំអាយុរបស់នាង មកជាយុវតីអាយុ១៥ឆ្នាំ ទើប​នឹង​ពេញជំទង់ ហើយបានបង់សំណាញ់ ទាក់យកក្មេងប្រុសបីនាក់ ឲ្យមកជួបនាងផឹកស៊ី និងបញ្ច្រកថ្នាំញៀន មុន​នឹងឲ្យនាង​បាន​ឡើង​ថាន​សួគ៌ ជាមួយនឹងពួកគេ។

អ្នកដែលបានសង្ស័យរឿងនេះមុនគេ គឺម្ដាយរបស់ក្មេងប្រុសរងគ្រោះមួយរូប ដែលបន្ទាប់មក បានរាយការណ៍​ប្រាប់​អាជ្ញាធរ និងបានប្ដឹងចោទនាង អាណា ថាបានប្រលោមស្នេហ៍ កូនគាត់ដែលមានអាយុទើបតែ ១៣ឆ្នាំ។ នៅក្នុងការសួរ​ចម្លើយ ពីសំណាក់នគរបាល នាង អាណា បានប្រកែកយ៉ាងដាច់អហង្កា។ ប៉ុន្តែក្មេងប្រុសបានសារភាព ប្រាប់អ្នក​ស៊ើប​អង្កេតថា ខ្លួនគេ ពិជាបានរួមរ័ក្សជាមួយនាង អាណា បន្ទាប់ពីស្ត្រីម្នាក់នេះ បានស្បថថាខ្លួន មានអាយុ១៥ឆ្នាំ។

នៅក្នុងសវនាការជំហានដំបូង កាលពីខែមុន នាង អាណា បានទទួលស្គាល់ថា នាងបានបំពារបំពានលើក្មេងប្រុស មិន​ទាន់​គ្រប់អាយុទាំងនោះមែន។ នៅក្នុងរោងជំនុំ ម្ដាយជនរងគ្រោះម្នាក់ទៀត ដែលមានអាយុ១៥ឆ្នាំ ហើយបានឆ្លងជំងឺ​«សង្គម»​មក​នោះ បានស្រែកដាក់នាង អាណា ថា៖ «នាងនេះ មិនគួរនឹងត្រូវដោះលែងវិញទេ។ នាងជាការគម្រាម ដល់ក្មេងៗ​ទាំង​នេះ។ នាងនឹងមិនបោះបង់ចោលឡើយ។»

នៅចំពោះការចោទប្រកាន់ និងភស្ដុតាងនានា បង្ហាញឡើង ដោយម្ដាយជនរងគ្រោះ ក្នុងសវនាកាលពីអាទិត្យមុន នាង អាណា បានសម្រក់ទឹកភ្នែក និង​បានសម្ដែងក្ដី«អភ័យទោស» ចំពោះកំហុសរបស់ខ្លួន។ នាងបានពន្យល់ក្នុងសវនាការថា នាងចង់បន្តការសិក្សា និងគ្រោង​សាងអំពើល្អ ដើម្បីលុបលាងកំហុសរបស់នាងឡើងវិញ។ យ៉ាងណាក៏ដោយ យុវតីវ័យ​ក្មេងរូបនេះ បានជាប់ឈ្មោះ​ក្នុង​បញ្ជី​ខ្មៅ របស់សហរដ្ឋអាមេរិក នៃជនប្រព្រឹត្តិបទល្មើសខាងផ្លូវភេទ អស់មួយជីវិតរួច​ទៅ​ហើយ។ មេធាវីការពារក្ដីឲ្យនាង បាន​រៀបរាប់ថា នាង អាណា មានអតីតកាល គួឲ្យអាណិត និងកំពុងរងគ្រោះ ក្នុងពេល​បច្ចុប្បន្ន នូវជំងឺងខាងផ្លូវចិត្តដ៏ធ្ងន់ធ្ងរ៕