គ្រីស្ចីយ៉ង់ ឡឺប្លង់ (Christian Leblanc) និស្សិតជាតិកាណាដាមួយរូប ដែលកំពុងស្នាក់នៅ ក្នុងប្រទេសថៃ ដើម្បីការផ្លាស់ប្ដូរ​ការសិក្សា របស់ខ្លួននោះ មានបំណង់ចង់ ទៅលេងវត្តមួយ ដែលមានចិញ្ចឹមសត្វដំរីជាច្រើន។ នៅទីនោះ គ្រីស្ទីយ៉ង់ និង​មិត្ត​ស្រី​របស់យុវនិសិ្សត បានទិញចេកមួយស្និត និងបានយកទៅឲ្យដំរីមួយក្បាល ស៊ីជាចំណី។

បន្ទាប់ពីអាហារចេករបស់ខ្លួន ដំរីដូចជានៅមិនទាន់ឆ្អែតនៅឡើយ។ វាក៏បានប្រើប្រមោយ មកកញ្ឆក់ម៉ាស៊ីនថតរូប GoPro តូចមួយ ពីដៃរបស់គ្រីស្ទីយ៉ង់ និងយកទៅពន្លាដាក់ពីចំងាយ។ ខណៈនោះ ម៉ាស៊ីនថតក៏បានថតរូបភ្លាម ដោយស្វ័យប្រវត្តិ និងបានបន្សល់ទុក នូវរូបភាពដូចខាងលើ។ គួរឲ្យស្រឡាញ់ដំរីនេះណាស់... មែនឬទេ?

យុវនិស្សិត បានថ្លែងឲ្យដឹងទៀតថា៖ «ជាសំណាងណាស់ ដែលដំរីទាំងនោះ បានប្រគល់ម៉ាស៊ីនថតនេះ មកខ្ញុំវិញ និង​ថែម​ទាំងបានថតរូបឲ្យខ្ញុំ មួយសន្លឹកយ៉ាងល្អពិសេស ដែលខ្ញុំមិនធ្លាប់បានធ្វើពីមុនមក»។ រូបថតត្រូវបាន គ្រីស្ទីយ៉ង់ យកមក​បង្ហោះ នៅលើបណ្ដាញសង្គម អ៊ិនស្តាហ្គ្រាម និងបានទាក់ទាញ ឲ្យមនុស្សចូលចិត្ត ធ្វើការចែករំលែក និងដាក់យោបល់​វាចា មិនតិចឡើយ។

តាមពិតទៅ បើនិយាយពីរឿងរូបថតវិញ រូបភាពលើកនេះ មិនមែនជារូបថតលើកទីមួយទេ ព្រោះកាលពីលើកមុន គ្រីស្ទីយ៉ង់ ធ្លាប់​បានថតរូប ជាមួយនឹងត្រីបាឡែន ម្ដងអញ្ចឹងហើយ។ ទាស់តែលើកនោះ មិនមែនត្រីបាឡែនទេ ដែលបាន​មក​ចាប់​ម៉ាស៊ីន​ថត ដើម្បីថតដូចដំរី ក្នុងប្រទេសថៃទេ តែគឺយុវជនខ្លួន ជាអ្នកកាន់ម៉ាស៊ីនថត!!!