ចៅក្រមកាត់សេចក្ដី អ្នកស្រី មីនឌី គ្លាស៊័រ (Mindy Glazer) ត្រូវប្រកាសសាលក្រមមួយ ដើម្បីសម្រេចទោស ទៅលើបទល្មើស គាស់ផ្ទះលួចទ្រព្យសម្បត្តិមួយ នៅក្រុងមីអាមី (រដ្ឋផ្លរីដា សហរដ្ឋអាមេរិក)។ ផ្ទុយទៅវិញ ជនជាប់ចោទ បែរ​ជា​ទទួលបាន នូវការសាកសួរមួយ ដែលខ្លួនមិនដែល​នឹកស្មានដល់ ពីសំណាក់ចៅក្រមខាងលើទៅវិញ។

អ្នកស្រី គ្លាស៊័រ បានសម្លឹងជនជាប់ចោទ ដោយក្រសែរមុត ហើយលើកជាសំនួរឡើងថា៖ «តើយើងដូចជាធ្លាប់ ជាមិត្តភ័ក្រជិតដិត កាលនៅសាលារៀនឬ?» សំនួរដែលធ្វើឲ្យ អាតៀ ប៊ូធ (Arthur Booth) បានរមៀលទឹកភ្នែកចុះ ជាមួយ​នឹង​សំដី​ឧទានឡើងតិចៗថា៖ «ឱ ព្រះជាម្ចាស់... ឱ ព្រះអើយ...»។

បើទោះជាអ្នកស្រី មីនឌី គ្លាស៊័រ មិនទទួលបានចម្លើយ ពីជនជាប់ចោទមកវិញ តែអ្នកស្រីខ្លួនឯងយល់ច្បាស់​ណាស់ ពីអ្វីដែលកំពុងកើតឡើង នៅចំពោះមុខ។ អ្នកស្រីបានថ្លែងឡើងទៀត ទាំងក្រៀមក្រំថា៖ «ខ្ញុំតែងតែ​សួរខ្លួនឯងថា តើអ្នកឯងធ្វើអ្វីហើយពេលនេះ។ អ្នកឯងជាពួកម៉ាកម្នាក់ មានចិត្តថ្លើមល្អណាស់ នៅសាលា។ ឥឡូវនេះ រឿងវាធ្វើឲ្យខ្ញុំសោកសង្រេងណាស់ ដែលឃើញអ្នកឯង នៅចំពោះមុខខ្ញុំ។»។

បើមើលឯកសារស៊ើបអង្កេត និងប្រវត្តិបទល្មើស របស់ជនជាប់ចោទ បានឲ្យដឹងថា លោក អាតៀ ប៊ូធ បាន​ធ្លាក់ខ្លួនញៀនថ្នាំ នៅក្រោយបន្តការសិក្សា នៅថ្នាក់អនុវិទ្យាល័យបានបន្ដិច។ សម្រាប់អ្នកស្រីចៅក្រមវិញ មិនអាចធ្វើអ្វីផ្សេងបាន ក្រៅតែពីផ្ដន្ទាទោសតាមច្បាប់ អតីតមិត្តសម្លាញ់របស់ខ្លួន ឲ្យជាប់ពន្ធនាគារប៉ុន្មាន​ខែ ប៉ុន្តែ​អាច​បង់ប្រាក់តំកល់ ដើម្បីអាចមានសេរីភាព ដែលស្ថិតក្រោមល័ក្ខខ័ណ្ឌ មានចំនួនប្រមាណជា ៤៤ ០០០ ដុល្លា​អាមេរិក៕