លោក ជេកឃី ឆាន់ ឬ ឈិន ឡុង ជាកំពូលតារាល្បីឈ្មោះ ដំបូងគេបំផុតហើយ ដែលបានក្លាយ ជាជនរងគ្រោះ ទាក់ទង​នឹង​ដំណឹង «មរណភាព»របស់លោក។ ទល់នឹងដំណឹង ដែលមិនបានធ្វើឲ្យ ទាំងអ្នកគាំទ្រ ទាំងតារាផ្ទាល់ មិនសប្បាយ​ចិត្ត​នោះ លោក ឈិន ឡុង ចាំបាច់ត្រូវចេញមកបកស្រាយ និងបដិសេធភ្លាមៗ ថាលោកនៅរស់ និងមានសុខភាពល្អ​ជា​ធម្មតា​ទេ។

អ្នកដែលបានផ្សាយដំណឹងនេះ មុនគេ កាលពីថ្ងៃសុក្រសប្ដាហ៍មុន គឹគេហទំព័រ cnminformativo.com ដែលបាន​អះ​អាង​ថា​ លោក ឈិន ឡុង បានស្លាប់ហើយ ដោយសាររោគគាំងបេះដូង។ គេហទំព័របានយករូបថតមួយសន្លឹក បង្ហាញពី​មរណភាព​របស់​តារាល្បី មកចុះផ្សាយ ដោយបានបង្ហាញថា គឺពិធីកររបស់ស្ថានីយ៍ទូរទស្សន៍ NBC ជាអ្នកបញ្ចេញ​ដំណឹង​នេះ។ មិន​ត្រឹម​តែប៉ុណ្ណឹង ដើម្បីឲ្យដំណឹង កាន់តែមានភាពជាក់លាក់ កាន់តែខ្លាំងនោះ គេថែមទាំងបានបង្កើត ដំណឹង​មួយ​ទៀត បង្ហាញ​ថា គឺភរិយាលោក ឈិន ឡុង អ្នកស្រី លីន ហ្វេងចាវ (Lin Fengjiao) ជា អះអាងបន្ថែមទៀត ថាស្វាមីអ្នកស្រី បាន​ស្លាប់។

ប្រព័ន្ធផ្សព្វផ្សាយជាច្រើនទៀត បានសរសេរនូវឃ្លាដដែលៗថា៖ «ដំណឹងដ៏អកុសល និយាយពីមរណភាពរបស់លោក ឈិន ឡុង ត្រូវបានប្រកាស ដោយភរិយាផ្ទាល់របស់លោក នៅក្នុងសន្និសីទសារព័ត៌មានមួយ នៅប៉ុន្មានម៉ោងមុន​នេះ​បន្តិច។ អ្នកស្រីនិយាយថា "ខ្ញុំសង្ឃឹមថា អ្នកអាចយល់ពីការបាត់បង់របស់ខ្ញុំ ហើយខ្ញុំសូមអរគុណ ប្រសិនបើអ្នកទុកឲ្យខ្ញុំ បានកាន់ទុក្ខ ដោយស្ងប់ស្ងៀម"។»។

គេហទំព័រព័ត៌មានក្នុងប្រទេសកម្ពុជាមួយចំនួន ក៏បានយកដំណឹងនេះ មកផ្សាយបន្តដែរ តែមិនបានស្វែងរក​ប្រភព​ផ្សេង​ទៀត មក​បញ្ជាក់ទេ។

ប្រតិកម្ម នៅតាមបណ្ដាញសង្គម វេបូ (Weibo បណ្ដាញសង្គម នៅក្នុងប្រទេសចិន) លោក ឈិន ឡុង បានសរសេរសម្ដែង នូវការហួសចិត្តរបស់លោក បន្ទាប់ពីលោក បានមើលសេចក្ដីរាយការណ៍ បោកប្រាសទាំងនេះ ខណៈរូបលោក នៅរស់​ជ្រងោ​នៅ​ឡើយ៕