ការរុករកយន្ដហោះ បាត់ខ្លួនយ៉ាងអាថ៌កំបាំង ដែលមានទំហំផ្ទៃក្រឡា កាន់តែធំឡើងៗ នៅតែគ្មានឃើញស្រមោលអ្វី សូម្បីបន្តិច។ ប៉ុន្តែនៅពេលគេរំកិលការរុករុក មកភាគខាងលិច ឆ្ងាយបន្តិចពីផ្ទៃក្រឡារុករកកន្លងមក ក្រុមអ្នកស្រាវជ្រាវ បានប្រទះឃើញ តួនាវាដ៏ចំណាស់មួយ ដែលមានអាយុកាល តាំងពីសតវត្សន៍ទី១៩។

លោក ភីធើរ ហ្វូឡី (Peter Foley) អ្នករៀបចំដឹកនាំការរុករុក បានពន្យល់ពីការរកឃើញ​ របស់ក្រុមលោកថា៖ «គួឲ្យ​អស្ចារ្យ... តែវាមិនមែនជាអ្វី ដែលយើងកំពុងស្វែងរកនោះទេ។ យើងពិតជាខកចិត្ត ដែលវាមិនមែនជាតួយន្ដហោះ។»

នៅចំកណ្ដាល នៃផ្ទៃក្រឡារុករក ជាង៦០០០០គីឡូម៉ែត្រការ៉េ ឧបករណ៍បាញ់រលកសម្លេង sonar បានឲ្យសញ្ញាពីវត្តមាន នៃបំណែករាយប៉ាយ យ៉ាងច្រើនគួរឲ្យចាប់អារម្មណ៍។ បំណែកទាំងនោះ ស្ថិតនៅបាតសមុទ្រ ដែលមានជម្រៅ ប្រមាណ​ជា៤គីឡូម៉ែត្រ ពីផ្ទៃទឹកខាងលើ ហើយវាពិតជា បានធ្វើឲ្យអ្នករុករកយន្ដហោះ មានក្ដីសង្ឃឹមយ៉ាងច្រើន ថាវត្ថុបំណង​របស់​ពួកគេ នឹងបានសម្រេច។

នាវាដឹកទំនិញ ដែលមិនដឹងអត្តសញ្ញាណ

កូននាវាជ្រមុជទឹក ដែលបំពាក់ដោយម៉ាស៊ីនថតវីដេអូ ត្រូវបានបញ្ជូនចុះទៅជាបន្ទាន់។ រូបភាព នៃបំណែកជាច្រើន ដែល​ម៉ាស៊ីនថតចាប់បាននោះ ត្រូវបានក្រុមអ្នកបូរាណវិទូ ជំនាញខាងសមុទ្រសាស្ត្រ ស្គាល់ថា នេះគឺជាផ្នែកជាច្រើន នៃនាវា​ដឹក​ទំនិញមួយ នៅក្នុងសតវត្សន៍ទី១៩។

ប៉ុន្តែនៅពេលដែលចង់ដឹងឲ្យច្បាស់ថា តើជាអ្វីឲ្យប្រាកដនោះ វាហាក់ដូចជាស្រមោលមួយ ដែលងងឹតសូន្យឈឹង ប្រៀប​បាននឹងការរុករក យន្ដហោះ MH370 យ៉ាងដូច្នេះដែរ។ ក្រុមបូរាណវិទូ បានពន្យល់ថា នៅម្ដុំនោះ មាននាវាច្រើនណាស់ ដែលលិច នៅក្នុងប្រវត្តិដ៏យូរលង់ នៃមហាសមុទ្រឥណ្ឌា។ ដូច្នេះ នាវាមួយនេះ ពិបាកនឹងឲ្យគេស្គាល់ថា តើវាជានាវា​របស់​នរណា និងថា តើមានហេតុភេទអ្វី បានជាធ្វើឲ្យនាវាលិច នោះណាស់៕