តារាភាពយន្ដ ដ៏ល្បីខាងក្បាច់គុណ លោតហត់ស្ដែងៗ ជេកឃី ឆាន់ (Jackie Chan) ឬឈិនឡុង បានទទួលការរិះគន់ កាលពីថ្ងៃ​ព្រហស្បត្តិ៍ទី១៣ធ្នូ អាទិត្យមុន ដោយពួកអ្នកការពារលិទ្ធិប្រជាធិបតេយ្យ នៅហុងកុង ទីក្រុងកំណើតរបស់លោក  ខណៈតារា​ភាពយន្ដ​រូបនេះ បានធ្វើសេចក្ដីប្រកាសមួយ ទៅអោយទស្សនាវដ្ដីចិន ពីការគាំទ្ររបស់លោក ទៅលើការរឹតបន្តឹង សិទ្ធិក្នុងការធ្វើ​បាតុកម្ម។

តារាភាពយន្ដ ជេកឃី ឆាន់ ឬឈិនឡុង ពេលសម្ដែងក្នុងសាច់រឿង។

ការបំបិតសិទ្ធនៃការបញ្ចេញមតិ បានបង្កអោយមានប្រតិកម្មយ៉ាងខ្លាំងសម្បើមមួយ នៅហុងកុង អតីតទឺកដីគ្រប់គ្រង​ដោយប្រទេស​អង់គ្លេស តែបានប្រគល់ត្រឡប់ទៅអោយប្រទេសចិនវិញ នៅឆ្នាំ១៩៩៧ ក្នុងលក្ខខ័ណ្ឌទុកស្វ័យភាពអោយតំបន់នេះ នូវសិទ្ធិ និង​លទ្ធិប្រជាធិបតេយ្យ ដែលប្រទេសចិនកុម្មុយនីស មិនដែលធ្លាប់ស្គាល់នោះ។

«...គេធ្វើបាតុកម្មប្រឆាំងនឹងអ្វីគ្រប់យ៉ាង...»

នៅក្នុងសេចក្ដីប្រកាស ធ្វើទៅកាន់ទស្សនាវដ្ដីប្រចាំសប្ដាហ៍ ស៊ូធើនភីផលវេឃ្លី  (Southern People Weekly) នោះ ជេកឃី ឆាន់ ឬ​ឈិនឡុង បានលើកឡើងថា «ហុងកុង បានក្លាយជាទីក្រុងនៃបាតុកម្ម។ ពិភពលោកទាំងមូលធា្លប់និយាយថា ជាប្រទេសកូរ៉េ​ខាងត្បូង។ តែឥឡូវនេះ វាជាទីក្រុងហុងកុង។» ពាក្យសម្ដីទាំងនេះត្រូវបាន ដកស្រង់យកទៅចុះផ្សាយបន្ត ដោយកាសែតប្រចាំថ្ងៃ ជាភាសា​អង់គ្លេស​នៅហុងកុង ឈ្មោះស៊ោធឆាណាម័រនីងប៉ុស្ដ៍ (South China Morning Post)។

តារាភាពយន្ដចិន ដែលមានចំណាត់ថ្នាក់ពិភពលោកនេះ បានពន្យល់ថា «មនុស្សនាំគ្នាតវ៉ា ប្រឆាំងនឹងមេដឹកនាំចិន ឬប្រឆាំង​នឹង​រឿងអ្វីផ្សេងទៀត ... គេធ្វើបាតុកម្មប្រឆាំងនឹងអ្វីៗគ្រប់យ៉ាង។ អាជ្ញាធរត្រូវបញ្ជាក់អោយបានច្បាស់ ថាប្រធានបទ​ ឬរឿងអ្វីខ្លះ ដែលគេមានសិទ្ធិធ្វើបាតុកម្ម។»

សកម្មជនអ្នកប្រជាធិបតេយ្យម្នាក់ លោកសីដ ហូ (Cyd Ho) បានសម្ដែងការខ្មាសអៀនថា«ជាសម្ដីដ៏គ្រោះថ្នាក់»មួយ ដោយ​លោក​បានបញ្ជាក់ថា ជេកឃី ឆាន់ បានសាងកេរ្តិ៍ឈ្មោះ ជា«តារាភាពយន្ដល្បីឈ្មោះ» គឺដោយសារមកពីសិទ្ធិសេរីភាព យ៉ាងធំសម្បើម ដែលទឹកដីហុងកុងធ្លាប់មានកន្លងមក។ លោកបានប្រាប់ ភ្នាក់ងារសារពត៌មានបារាំងអាអេហ្វប៉េ (AFP) ថា «ជេកឃី បានក្លាយ​ជាអ្នកមាន និងល្បី ទាំងអស់នេះ ដោយសារតែហុងកុង ជាទីក្រុងសេរីមួយ ផ្ដល់អោយ ជេកឃី នូវគ្រប់ភព្វ សំណាង ដែលអាច​ឈោងចាប់ ចំណាត់ថ្នាក់សង្គមយ៉ាងខ្ពស់បែបនេះបាន។ ភព្វសំណាងនេះ គួរអ្នកផ្សេងទៀតទទួល​បាន​ដូចគ្នា។»

សិទ្ធិខ្លាំងពេក ... អាណាធិបតេយ្យ !

ពីឆ្នាំ២០០៩ តារាក្បាច់គុនដ៏ល្បីមកពីហុងកុង លោកជេកឃី ឆាន់ ឬឈិនឡុងនេះ ធ្លាប់ត្រូវបានគេលើកយកមកជជែកវែកញែក ម្ដងរួចហើយ ពីអ្វីដែលតារាភាពយន្ដនេះ និយាយថា សិទ្ធិនយោបាយមានខ្លាំងពេក នឹងអាចនាំមកនូវភាពអាណាធិបតេយ្យ «ដូច​នៅតៃវ៉ាន់»។

សូមបញ្ជាក់ថា តៃវ៉ាន់ ជាកោះមួយដែលពួកអ្នកជាតិនិយមចិន បានរត់ភៀសខ្លួន ខណៈពេលសង្គ្រាមក្នុងប្រទេសចិន កំពុងផ្ទុះ​យ៉ាង​ខ្លាំង​នោះ។ សព្វថ្ងៃកោះតៃវ៉ាន ជាប្រទេសមួយ ដែលមានរចនាសម្ព័ន្ធរដ្ឋបាលច្បាស់លាស់​ ស្ថិតនៅមិនឆ្ងាយប៉ុន្មាន​ពីទីក្រុង​ហុងកុង​នោះ។ តែប្រទេសចិននៅតែចាត់ទុកថា តៃវ៉ាន់ជាខេត្តបះបោរមួយរបស់ខ្លួន ហើយគម្រាមមិនអោយប្រកាសឯករាជ្យឡើយ៕

--------------------------------------------------
ដោយ ឈូករ័ត្ន - ប៉ារីស​ ថ្ងៃទី១៦ ខែធ្នូ ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ