«ភ្លាមៗ បន្ទាប់ពីបានងើបខ្លួន ចេញពីព្រលានយន្ដហោះ មេបញ្ជាការបើកបរយន្ដហោះ នៃអាកាសចរណ៍ អាឡាស្កា អ៊ែរឡាញ ដែលមានលេខហោះហើរ 448 ចេញពីក្រុង សៀត ថល (ទិសពាយ័ព្យ នៃសហរដ្ឋអាមេរិក) ដើម្បីហោះ​ឆ្ពោះ​ទៅកាន់ក្រុង ឡូស អេនជឺឡេស (Los Angeles) បានឲ្យដឹងថា ខ្លួនបានស្ដាប់ឮ សម្លេងដ៏ចម្លែកៗ នៅខាងក្រោម​យន្ដហោះ» នេះ នេះជាការពន្យល់របស់ក្រុមហ៊ុនអាកាសចរណ៍ នៅក្នុងសេចក្ដីប្រកាសព័ត៌មានមួយ ដែលបានផ្សាយ នៅលើគេហទំព័រផ្លូវការរបស់ខ្លួន កាលពីថ្ងៃចន្ទម្សិលម៉ិញ។

សេចក្ដីប្រកាសដដែលនោះ បានសរសេរទៀតថា មេបញ្ជាការរូបនេះ បានបង្ហោះយន្ដហោះរបស់ខ្លួន ត្រឡប់មកក្រុង សៀតថល វិញ ហើយបានស្នើសុំ នូវការចុះចតជាអាទិភាព និងជាបន្ទាន់។ យន្ដហោះ បានហោះងើបខ្លួនពីដី និងបាន​ចុះ​មកដីវិញ គិតជារយៈពេលទាំងអស់ ប្រមាណជា១៤នាទី។

បន្ទាប់ពីបានចុះចត ដោយសុវត្ថិភាព នៅព្រលានយន្ដហោះ ក្រុង សៀតថល ដដែល គេបានរកឃើញបុគ្គលិកម្នាក់ ដែល​មានលក្ខណៈធម្មតា នៅក្នុងកន្លែងផ្ទុកឥវ៉ាន់ ផ្នែកខាងក្រោមរបស់យន្ដហោះ។ បុគ្គលិករូបនោះ បាននិយាយប្រាប់​អាជ្ញាធរ​ថា ខ្លួនបានងោកងុយ ហើយក៏ភ្លឹកខ្លួន ដេកលក់នៅទីនោះ។ គេបានបញ្ជូន បុគ្គលិកម្នាក់នេះ ទៅកាន់មន្ទីរពេទ្យ ដើម្បី​ពិនិត្យ​មើល ពីសុខភាព ដោយសារតែនៅក្នុង បន្ទប់ដាក់ឥវ៉ាន់នោះ គ្មានខ្យល់អាកាស និងគ្មានសីតុណ្ហភាព ដូច​ធម្មតា។

ចំណែកឯអ្នកដំណើរវិញ បានថ្លែងថា ខ្លួនមិនបានដឹងពីករណីមានមនុស្ស នៅជាប់ខាងក្រោមយន្ដហោះនោះទេ។ ពួក​គេ​គ្រាន់តែដឹងថា យន្ដហោះបានហោះ ត្រឡប់មកចុះចតវិញ ហើយបានឃើញរថយន្ដសង្គ្រោះ ជាច្រើនបានបើក​សំដៅ​មក​រក​យន្ដហោះ។

យ៉ាងណាក៏ដោយ ក្រុមហ៊ុនអាកាសចរណ៍ បានសរសេរឲ្យដឹងទៀតថា ខ្លួងនឹងធ្វើការស៊ើបអង្កេត ពីករណីនេះ។ យន្ដហោះ​បាន​ងើប​ខ្លួនជាថ្មី ហោះឆ្ពោះទៅកាន់ទិសដៅ នៅរសៀល វេលាម៉ោង ៣និង៥២នាទី ម៉ោងក្នុងស្រុក ដោយ​គ្មាន​ហេតុ​ភេទ​អ្វីផ្សេង កើតឡើងឡើយ៕