បន្ទាប់ពីភ្លើងស្តុបនៅ ភូមិសុភី ឃុំកំពង់ស្វាយ ក្រុងសិរីសោភ័ណ្ឌ ខេត្តបន្ទាយមានជ័យនេះ បានដាច់អស់ជាងពីរខែរួច អ្នកបើកបរទាំងអស់ នៅលើទ្រូងផ្លូវ មិនបានប្រយ័ត្ន ឲ្យបានគ្រប់ជ្រុងជ្រោយ នៅពេលធ្វើចរាចរណ៍ បង្កឲ្យគ្រោះ​ថ្នាក់​នៅ​ទីនោះ មានការកើនឡើងជាងមុន។ កើនឡើង រហូតដល់អ្នកភូមិខ្លះ គិតថា មានជើង«កប» ហើយមិនសូវ ហ៊ាន​ចេញ​ទៅ​ណាមកណាទេ ជាពិសេសនៅពេលយប់ បើទោះជមានការចាំបាច់ ក៏ដោយ។

ចំពោះរឿងរ៉ាវទាំងអស់នេះ លោក អាត់ ខែម អគ្គស្នងការនគរបាល ខេត្តបន្ទាយមានជ័យ បានឲ្យដឹងថា លោកទទួល​ស្គាល់ថា មានគ្រោះថ្នាក់ច្រើនជាងមុន ព្រោះបើផ្លូវមានភ្លើងស្តុបធម្មតា នៅតែអ្នកធ្វើដំណើ មិនចង់គោរពផង ចុះទំរាំ​ដាច់ភ្លើងសញ្ញាចររចរណ៍ទៀត កាន់តែមិនស្តាប់ទៀត។ លោកបានបញ្ជាក់ ចំពោះករណីនេះ ថាមិនអាចបន្ទោស​អ្នកណា​បានទេ តែវាជាតួនាទីរបស់ថ្នាក់ខេត្ត ដែលជាអ្នករៀបចំ ហេដ្ឋារចនាសម្ព័ន្ធ នៅក្នុងខេត្តទាំងនេះ។

លោក អាត់ ខែម បានឲ្យដឹងថា កាលពីពេលភ្លើងនេះដាច់ថ្មីៗមានអ្នកជំនាញ មកធ្វើការជូសជុល ក៏ប៉ុន្តែមិន​ទាន់រួច​រាល់ ព្រោះសម្ភារទាំងនោះ ខុសម៉ាកគ្នា ដូច្នេះត្រូវការទិញថ្មី។ តែលោកមិនបានដឹងថា ត្រូវចំណាយពេលប៉ុន្មានទៀត ដើម្បីតភ្ជាប់នោះទេ។

ទាក់ទង និងបញ្ហាហេដ្ឋារចនាសម្ព័ន្ធក្នុងខេត្តនេះ ទស្សនាវដ្តីព្យាយាមទាក់ទង ទៅលោក គោ ស៊ុំសារឿន អភិខេត្ត ដើម្បី​បំភ្លឺ ពីបញ្ហារបស់អ្នកភូមិខាងលើ  តែទូរស័ព្ទរបស់លោក មិនអាចទាក់ទងបាន៕