អតីត​រដ្ឋមន្ត្រី​មហាផ្ទៃ​បារាំង ជាប់​ចោទ​ពី​បទ​«លាង​ប្រាក់​»

អតីតរដ្ឋមន្ត្រីមហាផ្ទៃបារាំង និងជាអតីតដៃស្ដាំ របស់អតីតប្រធានាធិបតីបារាំងលោក នីកូឡា សាកូហ្សី (Nicolas Sarkozy) ត្រូវបានចោទប្រកាន់ ក្នុងជំហានដំបូងមួយ ពីបទ«កុហក» និង«លាងសម្អាត»ប្រាក់ជាប់មន្ទិល ប្រមាណជា៥សែនអ៊ឺរ៉ូ។
Loading...
  • ដោយ: សេក មនោរកុមារ អត្ថបទ ៖ សេក មនោរកុមារ ([email protected]) - ភ្នំពេញ ថ្ងៃទី ០៧ មិនា ២០១៥
  • កែប្រែចុងក្រោយ: March 08, 2015
  • ប្រធានបទ: យុត្តិធម៌
  • អត្ថបទ: មានបញ្ហា?
  • មតិ-យោបល់

លោក ក្លូដ ហ្គេអង់ (Claude Guéant) ត្រូវបានចៅក្រមស៊ើបអង្កេតបារាំង ចោទប្រកាន់ក្នុងជំហានដំបូង កាលពី​យប់​ថ្ងៃ​សៅរ៍នេះ ដើម្បីសាកសួរចម្លើយ ពីបទ«កុហក លាងសម្អាតការលួចបន្លំប្រាក់បង់ពន្ធ និងបន្លំប្រាក់បង់ពន្ធ»។ នេះបើ​តាមសម្ដីផ្ទាល់ របស់លោក ហ្វីលីព ប៊ូឆេ អែល-ហ្គូហ្សី (Philippe Bouchez el-Ghozi) មេធាវីការពារក្ដីឲ្យលោក ក្លូដ ហ្គេអង់។ អតីតរដ្ឋមន្ត្រីក្រសួងមហាផ្ទៃ និងជាអតីតដៃស្ដាំ របស់អតីតប្រធានាធិបតីបារាំង លោក នីកូឡា សាកូហ្សី ត្រូវ​បាន​ចៅក្រមសាកសួរ នៅក្នុងថ្ងៃដដែល និងត្រូវបានឃាត់ខ្លួន កាលពីថ្ងៃម្សិលម៉ិញ ដោយនគរបាលយុត្តិធម៌បារាំង។

នគរបាលបារាំង កំពុងធ្វើការអង្កេត ទៅលើសំនុំរឿងសង្ស័យមួយ ទាក់ទងនឹងការផ្ដល់ថវិការ ពីសំណាក់អតីតមេដឹកនាំ​របបផ្ដាច់ការ លោក មូអាម៉ា ហ្គាដាហ្វី (Mouammar Kadhafi) នៅប្រទេសលីប៊ី មកផ្គត់ផ្គង់យុទ្ធនាការបោះឆ្នោត ជ្រើស​រើស​ប្រធានាធិបតី របស់បេក្ខជនលោក នីកូឡា សាកូហ្សី ក្នុងឆ្នាំ២០០៧។ បុរសអ្នកជំនួញដ៏ធំម្នាក់ទៀត ជាតិអារ៉ាប៊ី សាអ៊ូឌីត ក៏ត្រូវបានចៅក្រមស៊ើបអង្កេតបារាំង ចោទប្រកាន់ក្នុងជំហានដំបូង នៅក្នុងសំនុំរឿងដដែលនេះដែរ។

ចៅក្រមស៊ើបអង្កេតផ្នែកហិរញ្ញវត្ថុ នៃរដ្ឋធានីបារីស បានសង្ស័យជាពិសេស ទៅលើការរកឃើញថា មានការផ្ទេរ​ប្រាក់​ចូល មកក្នុងគណនីធនាគារបស់លោក ក្លូដ ហ្គេអង់ នូវចំនួនទឹកប្រាក់ដ៏សម្បើមមួយ ប្រមាណជា ៥ សែនអ៊ឺរ៉ូ។ ទឹក​ប្រាក់​នេះ ត្រូវបានអតីតរដ្ឋមន្ត្រីមហាផ្ទៃ អះអាងថា ជាទឹកប្រាក់ដែលលោកបានលក់ ផ្ទាំងគំនូរចំនួនពីរ ទៅឲ្យ​មេធាវី​ជាតិ​ម៉ាឡេស៊ី​មួយរូប។ ប៉ុន្តែតម្លៃនៃផ្ទាំងគំនូរទាំងពីរនេះ ត្រូវបានអ្នកជំនាញបដិសេធថា មានតម្លៃយ៉ាងច្រើនបំផុតត្រឹម​តែ ១៤០ ពាន់អ៊ឺរ៉ូប៉ុណ្ណោះ។

សំនុំរឿងផ្គត់ផ្គង់ថវិកា ដើម្បីធ្វើយុទ្ធនាការបោះឆ្នោតប្រធានាធិបតី កាលពីឆ្នាំ២០០៧ ត្រូវបានបែកធ្លាយឡើង នៅឆ្នាំ​២០១២ នៅក្នុងពេលដែលលោក នីកូឡា សាកូហ្សី ប្រធានាធិបតីផុតអាណត្តិ កំពុងតទល់ជាមួយនឹងលោក ហ្វ្រង់ស៊័រ ហូឡង់ បេក្ខជនជាប្រធានាធិបតីមកពីគណបក្សសង្គមនិយម។ នៅពេលនោះ សារព័ត៌មានតាមបណ្ដាញអ៊ិនធើណែត Mediapart បានយកឯកសារ ជាកិច្ចព្រមព្រៀងមួយ របស់ប្រទេសលីប៊ី ដើម្បីផ្ដល់ថវិកានេះ មកចុះផ្សាយ បង្កឲ្យ​រឿង​អាស្រូវបានផ្ទុះឡើង។

បន្ទាបពីបានដើរចេញ ពីឆាកនយោបាយហើយ លោក ក្លូដ ហ្គេអង់ ក្នុងវ័យ៧០ឆ្នាំ ត្រូវបានជាប់ឃុំបណ្ដោះអាសន្ន ចំនួន​បីដងហើយ បើគិតមកទល់នឹងពេលនេះ។ ការជាប់ឃុំលើកទីមួយ នៅឆ្នាំ២០១៣ ក្នុងសំនុំរឿងប្រហាក់ប្រហែល និងលើកទីពីរ ដោយសារមានជាប់ទាក់ទង នឹងការលូកដៃចូល ក្នុងបញ្ហារវាងធនាគារមួយ នឹងអ្នកជំនួញ​បារាំង​ដ៏ល្បី​មួយរូប លោក ប៊ែណា តាពី (bernard tapie)៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...