ឆ្លើយតប ទៅនឹងការចោទសួរ របស់អ្នកសារព័ត៌មាន នៅតុលាការកំពូល លោក មាជ សុវណ្ណារ៉ា បានលើកឡើងថា លោក​កំពុងជាប់«ជុង» ក្នុងរឿងនយោបាយ និងជា«នុយ» នៃគណបក្សនយោបាយទាំងពីរ ដែលកំពុងប្រទាញប្រទង់គ្នា។

លោកបាននិយាយ ដោយសំដៅរកឈ្មោះ នៃប្រមុខដឹកនាំគណបក្សទាំងពីយ៉ាងដូច្នេះថា «លោក ហ៊ុន សែន និងលោក សម រង្ស៊ី គុណធម៌នៃអ្នកដឹកនាំ។ អ្នកទោសឧក្រិដ្ឋ គេដោះលែងបាន... ចុះយើង ជាអ្នកទោសនយោបាយ?។ (...) អ្នក​ទោស​គ្រឿងញៀន អ្នកទោសសម្លាប់មនុស្ស គេឲ្យនៅក្រៅឃុំបាន យើងអ្នកនយោបាយ ជាបញ្ញាវ័ន្ត ស្អប់អំពើហិង្សា បើ​គេ​ឲ្យបន្តនៅជាប់ឃុំ... គិតមើលទៅ។»

ដោយបង្ហាញ នូវមោទនភាពរបស់ខ្លួន ពាក់ព័ន្ធនឹងការដោះលែង ថាវាអាស្រ័យនឹងការចចារ នៃអ្នកនយោបាយ ពិសេស​ប្រមុខដឹកនាំបក្សធំៗទាំងពីរ ក្នុងរដ្ឋសភានោះ លោក មាជ សុវណ្ណារ៉ា បានពន្យល់ទៀតថា៖ «ការដោះលែង ឬមិនដោះ​លែងខ្ញុំ វាអាស្រ័យលើ គណបក្សនយោបាយទាំងពីរ ធ្វើការចរចាគ្នា ព្រោះនេះជារឿងនយោបាយ។ ឯតុលាការ ក៏មាន​គេ​ចោទថា នៅក្នុងសម្ពាធនៃអ្នកនយោបាយ។»

ក្នុងកិច្ចសម្ភាស ជាមួយអ្នកសារព័ត៌មាន លោកមេធាវី ជួង ជូងី ដែលការពារក្ដីឲ្យលោក មាជ សុវណ្ណារ៉ា បានបង្ហាញនូវភាព​គ្មានជំនឿ ទាក់ទងនឹងការដោះលែង លោក មាជ សុវណ្ណារ៉ា ឲ្យនៅក្រៅឃុំបណ្តោះអាសន្ន ដោយតុលាការកំពូលទេ បើសិន​ជាតុលាការ មិនផ្អែកលើ​អង្គហេតុពិត​ប្រាកដ មិនអនុវត្តតាមខ្លឹមសារនៃច្បាប់ត្រឹមត្រូវ។ លោកមេធាវី បាន​បញ្ជាក់​ទៀតថា៖ «សម្រាប់បរិបទស្រុកខ្មែរ ខ្ញុំមិន​អាច​ព្យាករណ៍បានទេ។ (...) តែខ្ញុំព្យាយាមបង្ហាញ ឲ្យអងស់ពីកម្លាំងកាយ និង​ចិត្ត ក្នុងការស្វែងរក តតាំង និងផ្តល់​ភស្តុតាង​នានា សម្រាប់ការពារកូនក្តីខ្ញុំ។»

លោកក៏បានបង្ហាញ នូវការសោកស្តាយ ចំពោះការងាររបស់មន្រ្តីតុលាការកម្ពុជាមួយចំនួន ដែលធ្វើការស្វែងរកភស្តុតាង និងការសម្រេចក្តីឲ្យតែរួចពីដៃ ព្រោះអាងថា បើភាគីមិនពេញចិត្ត អាចប្តឹងទៅលើបន្ត។ លោកថា ការគិតដូច្នេះ បាន​បង្ហាញ​ថា ជាការរំលោភសិទ្ធិមនុស្ស និងច្បាប់ដែលកំពុងនៅជាធរមាន នៅកម្ពុជានោះ។ លោក ជូងី បានបន្ថែម​ឲ្យដឹង​ថា៖ «គំនិតអ្នកច្បាប់មួយចំនួន ហាក់គិតថា សម្រេចសិនឲ្យតែរួចបីដៃ ម៉េចៗ(ប្តឹង)ទៅលើកំពូល។ នេះជាចំណុចអវិជ្ជមាន សម្រាប់អ្នកអនុវត្តច្បាប់នៅស្រុកខ្មែរ។»

អំពើហិង្សា ដែលកើតឡើងរវាងបាតុករ និងក្រុមសន្តិសុខ នាទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤ ត្រូវបានអង្គការសង្កមស៊ីវិលមួយចំនួន បានចាត់ទុកថា ជារឿងដែលស្តែងឡើង ក្រោមរូបភាពនៃនយោបាយ។ លោក អំ សំអាត មន្ត្រីស៊ើបអង្កេត នៃអង្គការការពារសិទ្ធិមនុស្សលីកាដូ ធ្លាប់បានលើកឡើងថា ការបដិសេធរបស់តុលាការម្តង ជា​ពីរដង ទៅនឹងការសុំនៅក្រៅឃុំ របស់មេធាវីនៃសកម្មជន គណបក្សសង្គ្រោះជាតិនោះ ព្រោះមានការលូកដៃពី​រដ្ឋាភិបាល ដើម្បីជ្រៀតជ្រែកចូលក្នុងកិច្ចការរបស់តុលាការ។

ថ្មីៗនេះ សង្គមស៊ីវិលទាំងនោះ ថែមទាំងអះអាងខ្លាំងៗទៀតថា លោក ហ៊ុន សែន ពិតជាលូកដៃទន្ទ្រានលើតុលាការ។ ការ​លើកឡើងនេះ បានធ្វើឡើង បន្ទាប់ពីមានការដកប្រធានសាលាដំបូងរាជធានីភ្នំពេញ នៅក្រោយការថ្លែង របស់​លោក​នាយករដ្ឋមន្រ្តី លោក ហ៊ុន សែន ជុំវិញករណីដោះលែងឪពុកម្តាយលោក ថោង សារ៉ាត់។

សូមរំលឹកថា សកម្មជនគណបក្សប្រឆាំង ដែលជាមានសញ្ជតិខ្មែរ-អាមេរិកាំង និងជាប្រធាននាយកដ្ឋាន ប្រព័ន្ឋ​ផ្សព្វ​ផ្សាយ​​ព័ត៌មាន របស់គណបក្សសង្គ្រោះជាតិ លោក មាជ សុវណ្ណារ៉ា ត្រូវបានលោក កែវ មុនី ចៅក្រមស៊ើបសួរ សាលា​ដំបូង​រាជធានីភ្នំពេញ បង្គាប់ឲ្យនាំ (ចាប់) ខ្លួនកាលពីថ្ងៃទី១១ ខែវិច្ឆិកា ឆ្នាំ២០១៤ តាមដីកាដីកាបង្គាប់ឱ្យនាំខ្លួន។

ក្រៅពីលោក មាជ សុវណ្ណារ៉ា នៅមានសកម្មជនចំនួន៤នាក់ផ្សេងទៀត ក៏ត្រូវបានបន្តឃុំខ្លួនដែរ។ អ្នកទាំងនោះរួម​មាន​លោក អ៊ុក ពេជ្រ សំណាង, លោក ទេព ណារិន, លោក កែ ឃីម និងលោក ស៊ុំ ពុទ្ធី។ អ្នកទាំងនោះ ត្រូវបានចោទ​ប្រកាន់​ពីបទ ផ្ដើមគំនិតហិង្សាដោយចេតនា មានស្ថានទម្ងន់ទោស បទញុះញង់ឲ្យប្រព្រឹត្តបទឧក្រិដ្ឋ និងដឹកនាំចលនាកុបកម្ម នៅទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤៕