បេក្ខនារីជាច្រើន បានរៀបរាប់ថា ខ្លួនត្រូវរងនូវការត្រួតពិនិត្យ ដ៏អាក្រក់ ដើម្បីឲ្យដឹងថា ខ្លួននៅក្រមុំឬយ៉ាងណា ខណៈការត្រួតពិនិត្យនេះ បានបង្ក​ឲ្យ​មាន​ស្លាកស្នាម នៃការឈឺចាប់ និងការខ្មាសអៀន បានដក់ជាប់ក្នុងចិត្ត រហូតមកដល់បច្ចុប្បន្ន។ ពួកនាងៗ ចាំបាច់​ត្រូវ​ស្រាត ដោះខោអាវចេញទាំងអស់ពីខ្លួន ហើយឈរនៅមុខគ្រូពេទ្យស្ត្រី ដែលបន្ទាប់មក បានលូកម្រាមដៃ​«ចំនួន​ពីរ» ទៅក្នុងទ្វាមាសរបស់ពួកនាង។

បើតាមអាជ្ញាធរនៃប្រទេសឥណ្ឌូនេស៊ី បានឲ្យដឹងថា ការបង្កើតឲ្យមាន នូវការត្រួតពិនិត្យដូច្នេះ ដោយមានតម្រូវការ ចង់​ដឹងឲ្យច្បាស់ថា ពួកនាងនឹងគ្មានជំងឺ«សង្គម»ប្រចាំកាយទេ មុនពេលចូលមកធ្វើជាភ្នាក់ងារនគរបាល។

រហូតមកទល់​នឹងថ្ងៃនេះ ភ្នាក់ងារនគរបាលជាស្ត្រី នៅក្នុងប្រទេសឥណ្ឌូនេស៊ី មានចំនួនតែ៣%​ប៉ុណ្ណោះ។ ចំនួននេះ អាចបញ្ជាក់បានថា ការ​ត្រួតពិនិត្យ«ព្រហ្មចារីយ៍» ជាមូលហេតុមួយ ដែលធ្វើឲ្យស្ត្រីៗ នៅឥណ្ឌូនេស៊ី មិនហ៊ានចុះឈ្មោះ។

ទង្វើខាងលើ ត្រូវបានអង្គការអន្តរជាតិ ដែលធ្វើការផ្នែកគាំពារសិទ្ធិមនុស្ស ចាត់ទុកជាការបំពារបំពានធ្ងន់ធ្ងរមួយ ទៅ​លើ​រូបរាងកាយ របស់ស្ត្រីៗទាំងនោះ។ អ្នកស្រី នីស្សា វ៉ារីយ៉ា (Nisha Varia) នាយិកាផ្នែកសិទ្ធិស្ត្រី ប្រចាំនៅ​អង្គការ​ឃ្លាំ​មើលសិទ្ធិមនុស្ស (HRW) បានថ្លែងឡើងថា៖ «ការអនុវត្តន៍តាមបែបរើសអើងទាំងនេះ បានធ្វើឲ្យស្ត្រីទាំងនោះ រងការឈឺចាប់ និងបង្កឲ្យពួកនាង មានភាពខ្មាសអៀន។»

បើតាមអង្គការឃ្លាំមើលសិទ្ធិមនុស្សមួយនេះ ដែលមានទីតាំងនៅទីក្រុងញ៉ូយក សហរដ្ឋអាមេរិក បានសរសេរបញ្ជាក់​ថា៖ «អ្នក​ទទួលខុសត្រូវ នៃនគរបាល ឥណ្ឌូនេស៊ី ត្រូវចាត់វិធានការបញ្ឈប់ជាបន្ទាន់ នូវការត្រួតពិនិត្យបែបនេះ ហើយ​ធានា​ឲ្យ​បាន​ថា ការហាមឃាត់ត្រូវបានគោរព នៅពេញផ្ទៃប្រទេស»។

អង្គការនេះ បានពន្យល់ទៀតថា បើគេមិនទាន់​និយាយ​ដល់ សិទ្ធិមនុស្ស និងការរើសអើង ចូលទៅក្នុងជីវិតឯកជនរបស់ពួកនាងនោះ តែការត្រួតពិនិត្យបែបនេះ បាន​ធ្វើ​​ឲ្យ​អត្ថន័យ​​នៃ​ការ​រើសបុគ្គលិក ឬភ្នាក់ងារ ឲ្យចូលមកបម្រើការក្នុងនគរបាល បាត់បង់នូវខ្លឹមសារដើមរបស់វា៕