រដ្ឋាភិបាលកម្ពុជា បើជ្រុលជាបានគិតគូដល់បញ្ហា នៃការដាក់ឲ្យមានការអនុវត្តឡើងវិញ នូវច្បាប់អន្តោប្រវេសន៍ ដែល​ខក​ខានអនុវត្ត ជាច្រើនឆ្នាំមកហើយនោះ ត្រូវធ្វើការគិតគូឡើងវិញទាំងអស់ នៃជនអន្តោប្រវេសន៍ទាំងឡាយ ដែល​រស់​នៅ​ដោយ«ខុសច្បាប់»នៅកម្ពុជា។ នេះជាការថ្លែងអះអាង របស់អគ្គលេខាធិការ គណបក្សសង្គ្រោះជាតិ លោក អេង ឆៃអៀង ក្នុងកិច្ចសម្ភាសជាមួយទស្សនាវដ្តីមនោរម្យ.អាំងហ្វូ ដោយបានភ្ជាប់ករណី នៃការរនុវត្តច្បាប់អន្តោប្រវេសន៍ របស់​រដ្ឋាភិបាលទៅលើ សកម្មជនបរិស្ថានជាតិអេស្បាញ លោក អាឡិចហ្សង់ដ្រូ ហ្គន់សាឡេស ដេវិតសិន (Alejandro Gonzalez Davidson) ដោយបានបណ្តេញជនបរទេសម្នាក់នេះ ចេញពីកម្ពុជា ព្រោះតែ ក្រោមហេតុផលទិដ្ឋាការ​ផុត​សុពលភាព និងមិនត្រូវបានបន្តសុពលភាពនេះ ដោយអាជ្ញាធរកម្ពុជា។

អគ្គលេខាធិការគណបក្សសង្គ្រោះជាតិ បានអះអាងថា នេះ មិនមែនជារឿង របស់គណបក្សនយោបាយណាមួយឡើយ តែជារឿងរបស់ប្រទេសជាតិខ្មែរទាំងមូល។ លោកបានថ្លែងឡើងថា៖ «មិនចំពោះជនជាតិយួន ឬថៃនោះឡើយ។ ជន​ជាតិណាក៏ដោយ ដែលមករស់នៅស្រុកខ្មែរ ដោយខុសច្បាប់ យើងត្រូវតែពិនិត្យ និងធ្វើនឹងអនុវត្តជាទូទៅ លើគ្រប់​ជន​អន្តោប្រវេសន៍ទាំងអស់ តាមច្បាប់ជាតិ និងសញ្ជាតិ។ (...) ការបណ្តែតបណ្តោយ ឲ្យអន្តោរប្រវេសន៍ ចេះតែមករស់នៅ មិនច្បាស់លាស់ និងត្រឹមត្រូវ មិនគោរពច្បាប់នោះ អ្នកខាតជាខ្មែរ។ តើអ្នកនយោបាយសម័យនេះ ចង់ឲ្យខ្មែរលាយ​ដល់​ពេលណាទៀត ព្រោះឥឡូវ ទឹកដីខ្មែរទាំងពីធំ មកនៅសល់តូចទៅហើយនោះ។ យើងត្រូវគិតគូរឿងនេះ ទាំងអស់គ្នា។»

ទស្សនាវដ្តីមនោរម្យ.អាំងហ្វូ បានសុំប្រតិកម្មពីលោក ឈាង វុន មន្ត្រីជាន់ខ្ពស់របស់គណបក្សប្រជាជនកម្ពុជា ទាក់ទង​នឹង​ករណីនេះ។ ទស្សនាវដ្ដីនឹងធ្វើការចុះផ្សាយ​ ប្រតិកម្ម​របស់​លោក នៅក្នុងអត្ថបទលើកក្រោយ។

នាយករដ្ឋមន្ត្រីក្នុងតំណែង៣០ឆ្នាំរបស់កម្ពុជា លោក ហ៊ុន សែន ធ្លាប់បានអះអាងនាពេលកន្លងមកថា ជនជាតិវៀតណាម​នៅកម្ពុជា មានប្រមាណជា១០ម៉ឺននាក់។ ហើយកាលពីថ្ងៃទី០១ ខែមេសា ឆ្នាំ២០១៤ លោក  ហ៊ុន សែន បានចេញ​អនុក្រឹត្យ​មួយ ស្តីពីការបង្កើតអគ្គនាយកដ្ឋាន អន្តោប្រវេសន៍ ចំណុះឲ្យក្រសួងមហាផ្ទៃ ដើម្បីគ្រប់គ្រងជន​អន្តោប្រវេសន៍​នៅ​កម្ពុជា ដែលមានកំណើនជាបន្តបន្ទាប់នេះ។ នាយកដ្ឋានអន្តោប្រវេសន៍ ដែលពីមុន ស្ថិតក្រោមអគ្គស្នងការ​ដ្ឋាន​នគរបាល​ជាតិ ត្រូវបានផ្ទេរមកស្ថិតក្រោមចំណុះ អគ្គនាយកដ្ឋានអន្តោប្រវេសន៍ ដែលជាសេនាធិការ របស់ក្រសួង​មហាផ្ទៃ​ដែរ។ តួនាទីរបស់អគ្គនាយកដ្ឋានអន្តោប្រវេសន៍នេះ គឺត្រូវគ្រប់គ្រងជនបរទេសទាំងអស់ ដែលចូលមក​ទឹកដី​កម្ពុជា រួមមាន ទាំងជនបរទេសមិនមែនអន្តោប្រវេសន៍ ជនបរទេសអន្តោប្រវេសន៍ និងជនបរទេសអន្តោប្រវេសន៍ ជាអ្នក​វិនិយោគ​ឯកជន (លក្ខខណ្ឌនៃច្បាប់កំណត់) និងការងារជនភៀសខ្លួនជាដើម។

សម្រាប់ការលើកឡើង របស់ប្រជាពលរដ្ឋវិញ បានបង្ហាញនូវការយល់ឃើញរបស់ពួកគេថា បញ្ហាជនអន្តោរ​ប្រវេសន៍​ខុសច្បាប់ ជាពិសេសជនជាតិវៀតណាម នៅកម្ពុជា មានចំនួនច្រើនជាង ការលើកឡើងរបស់លោក ហ៊ុន សែន ឆ្ងាយ​ណាស់។ ជនអន្តោរប្រវេសន៍ខុសច្បាប់ទាំងនោះ បានរស់នៅក្នុងប្រទេសកម្ពុជា ដោយគ្មានការគ្រប់គ្រង ឲ្យបានត្រឹមត្រូវ ពីមន្រ្តីជំនាញ។ ហើយខ្លះទៀត បានធ្វើការ«សូកប៉ាន់» ឬប្រព្រឹត្តិនូវ«អំពើពុករលួយ» ដើម្បីបានកាន់អត្ត​សញ្ញាណ​បណ្ណ​សញ្ជាតិខ្មែរ នោះទៀត។

ចាប់ពីថ្ងៃទី២៨ខែតុលា ដល់ថ្ងៃទី១០ ខែវិច្ឆិកា ឆ្នាំ២០១៣ កន្លងមក វិទ្យាស្ថានសាធារណរដ្ឋអន្តរជាតិ(IRI) ក៏បានធ្វើការ​ស្ទង់មតិមួយ ក្នុងចំណោមមនុស្ស២០០០នាក់ ដែលមកពី២៤ខេត្តរាជធានីទូទាំងប្រទេសកម្ពុជា និងមានអាយុចាប់ពី​១៨ឆ្នាំ​ឡើងទៅ ឲ្យដឹងថាអន្តោប្រវេសន៍ខុសច្បាប់ របស់ជនជាតិវៀតណាម ជាចំណុចសំខាន់ទី៥ ដែលធ្វើឲ្យ​ពលរដ្ឋ​យល់​ថា រដ្ឋាភិបាលដើរលើផ្លូវខុស។ នេះបើតាមយោង តាមការចុះផ្សាយ របស់សារព័តត៌មានក្នុងស្រុកមួយ ជា​ខេមរៈ​ភាសា។

រីឯច្បាប់ស្តីពីអន្តោប្រវេសន៍ ដែលរដ្ឋសភាកម្ពុជាបានអនុម័ត កាលបីថ្ងៃទី២៦ ខែសីហា ឆ្នាំ១៩៩៤ នាសម័យប្រជុំ​វិសាមញ្ញ​​នីតិកាលទី១ ត្រង់មាត្រា ៣៧ បានចែងថា «រដ្ឋមន្រ្តីក្រសួងមហាផ្ទៃ ត្រូវបណ្ដេញចេញពីព្រះរាជាណាចក្រកម្ពុជា រាល់​ជន​បរទេស​ណា ដែលចូលក្នុងព្រះរាជាណាចក្រកម្ពុជាដោយខុសច្បាប់។» មាត្រា ៣៨ បានចែងទៀតថា «សេចក្ដី​សំរេចបណ្ដេញចេញ ត្រូវអនុវត្តភ្លាម ចាប់ពីថ្ងៃចុះហត្ថលេខា របស់រដ្ឋមន្រ្តីក្រសួងមហាផ្ទៃ។ សាម៉ីខ្លួន មានសិទិ្ធប្ដឹង​ទៅ​តុលាការ ក្នុងរយៈពេល ២ខែ។»៕