ក្នុង​វត្តមាន​លើក​ទី១១ នៅ​កម្ពុជា​របស់​លោក សុរិយា ប្រាសាទ ស៊ូប៊ែឌី (Surya P. Subedi) នៅ​មិន​ទាន់​មាន​លទ្ធផល​ជា​ផ្លូវ​ការ​នៅ​ឡើយ ចំពោះ​បញ្ហា​សិទ្ធិ​មនុស្ស​នៅ​កម្ពុជា​នា​ពេល​នេះ។ តែ​លោក​ស្នើ​ឲ្យ​គណបក្ស​ធំៗ​ទាំង​ពីរ បន្ត​ធ្វើការ​ជា​មួយ​គ្នា​ដើម្បី​ប្រជា​ពលរដ្ឋ និង​ប្រទេស​កម្ពុជា តាម​រយៈ​ការ​សន្ទនា​ទៅ​មុខ​ទៀត ដើម្បី​ពង្រឹង​លទ្ធិ​ប្រជាធិបតេយ្យ និង​សិទ្ធិ​មនុស្ស នៅ​កម្ពុជា។

នា​វិមាន​រដ្ឋសភា ថ្ងៃទី២០ ខែ​មករា​នេះ អ្នក​រាយការណ៍​ពិសេស នៃ​អង្គការ​សហ​ប្រជាជាតិ ទទួល​បន្ទុក​សិទ្ធិ​មនុស្ស​នៅ​កម្ពុជា លោក សុរិយា ប្រាសាទ ស៊ូប៊ែឌី (Surya P. Subedi) ក្នុង​ជំនួប​ជា​មួយ​ថ្នាក់​ដឹកនាំ​កំពូល​គណបក្ស​ប្រឆាំង បាន​ស្នើ​ឲ្យ​គណបក្ស​ទាំង​ពីរ បន្ត​ធ្វើការ​រួម​គ្នា​តាម​បែប​សន្ទនា ឈរ​លើ​ស្មារតី​នៃ​កិច្ច​ព្រម​ព្រៀង​នយោបាយ​របស់​ខ្លួន (កិច្ច​ព្រម​ព្រៀង​ថ្ងៃ​ទី​២២ ខែ​កក្កដា ឆ្នាំ២០១៤)។

សម្រាប់លោក សម រង្ស៊ី ប្រធានគណបក្សប្រឆាំង បានថ្លែងបញ្ជាក់ទៅលោក សុរិយា ប្រាសាទ ស៊ូប៊ែឌី ថា គណបក្សសង្គ្រោះជាតិ តែងតែគោរពតាមស្មារតីនៃកិច្ចព្រមព្រៀងថ្ងៃទី២២ ខែកក្កដា។ មេដឹកនាំគណបក្ស​ប្រឆាំង បានថ្លែងនៅចំពោះក្រុមអ្នកសារព័ត៌មានថា៖ «យើងនៅគោរពជានិច្ច គឺគោរពស្មារតីនៃកិច្ចព្រម​ព្រៀង ២២ កក្ដដា។ ខ្លឹមសារហ្នឹងអ្វី ដែលមានចែងនៅក្នុងនោះ។ (…) នឹងគោរពទៅតាមបទបញ្ជាផ្ទៃក្នុង របស់​រដ្ឋសភា។»

ផ្ទុយទៅនឹងការលើកឡើងរបស់លោកសម រង្ស៊ី ខាងលើនេះ កាលពីថ្ងៃទី១៩ ខែមករា ម្សិលម៉ិញ នាយករដ្ឋមន្រ្តី​កម្ពុជាលោក ហ៊ុន សែន បានបង្ហាញថា លោក សម រង្ស៊ី មិនតាមគោរពស្មារតីនៃកិច្ចព្រមព្រៀងនោះឡើយ និង​បានព្យាយាមធ្វើអ្វីៗផ្ទុយទាំងអស់ ដែលជាហេតុមិនអាចបន្តវប្បធម៌ នៃការសន្ទនាទៀតបាន។ ទំនងជាចង់​សំដៅ​ទៅលោក ស៊ូប៊ែឌី ដែលកំពុងបំពេញទសន្សកិច្ចនៅកម្ពុជានោះ លោកនាយករដ្ឋមន្រ្តីបានស្នើឲ្យ​បរទេស​ទាំងអស់ កុំលូកដៃក្នុងរឿងកម្ពុជា ត្រូវគោរពច្បាប់ និងតុលាការកម្ពុជា។ លោក ហ៊ុន សែន បានថ្លែងឡើងថា៖ «សុំបរទេសនានាកុំលូកដៃ កុំលូកលាន់ចូលកិច្ចការរបស់តុលាការកម្ពុជា។ អ្នកឯងធ្លាប់តែនិយាយពីបញ្ហា ទុក​ឲ្យ​តុលាការឯករាជ្យ។ (…) ខ្ញុំគោរពតុលាការ។»

ក្នុងដំណើរទស្សកិច្ចនៅកម្ពុជាលើកនេះ លោក ស៊ូប៊ែរឌី ចង់ធ្វើការវាយតម្លៃនូវស្ថានភាពទូទៅនៃសិទ្ធិមនុស្ស ការបង្កើតស្ថាប័នរដ្ឋឯករាជ្យ ការកែទម្រង់ប្រព័ន្ធច្បាប់ និងតុលាការកម្ពុជា។ ជាមួយគ្នានេះ លោកបន្តតាម​ដាន​ការអនុវត្ត នូវរបាយការណ៍សិទ្ធិមនុស្ស ដែលលោកបានលើកឡើង ចំនួន៧ដងរួចមក។ របាយការណ៍លើក​ទី៧ របស់លោក ស្តីពីស្ថានភាពសិទ្ធិមនុស្សទីទៅនៅកម្ពុជា ត្រូវបានធ្វើឡើងទៅកាន់ក្រុមប្រឹក្សាសិទ្ធិមនុស្ស នៃអង្គការសហប្រជាជាតិកាលពីខែកញ្ញា ឆ្នាំ២០១៤កន្លងមក។

ក្រៅពីជំនួបជាមួយមេបក្សប្រឆាំង ក្នុងថ្ងៃទី២០ ខែមករានេះ លោក សុរិយា ប្រាសាទ សូប៊ែរឌី ក៏បានចុះជួប​ជាមួយប្រជាពលរដ្ឋរងគ្រោះដោយបញ្ហាដីធ្លី នៅតំបន់បុរីកីឡាជាបន្ត។ លើស្ថានភាពជាក់ស្តែង នៃការបន្ត​រស់​នៅជាមួយនឹងគំនរសម្រាម របស់ពលរដ្ឋទាំងនោះ លោក ស៊ូប៊ែរឌី បានវាយតម្លៃថា រយៈពេលលោកចាក​ចេញ​ពីកម្ពុជាមកទល់ពេលនេះ សម្រាប់អ្នករស់នៅបុរីកីឡា ហាក់ដូចជាគ្មានការរីកចម្រើនអ្វីសោះ ហើយក៏​ដូច​ជា​គ្មានដំណោះស្រាយជាក់លាក់ណាមួយ ពីរដ្ឋាភិបាលនោះដែរ។

សូមបញ្ជាក់ថា លោក សុរិយា ប្រាសាទ ស៊ូប៊ែឌី (Surya P. Subedi) បានមកដល់កម្ពុជាកាលពីយប់ថ្ងៃទី១៧ ខែ​មករានេះ ដើម្បីទស្សនកិច្ចផ្នែកសិទ្ធិមនុស្សលើកទី១១ របស់លោក។ លោកនឹងបញ្ចប់ដំណើរទស្សនកិច្ចនេះ ជាមួយនឹងការថ្លែងនូវលទ្ធផលការងាររបស់លោក ក្នុងសន្និសីទកាសែតមួយ នៅរសៀលថ្ងៃទី២៣ ខែមករា នៅ​ការិយាល័យឧត្ដមស្នងការ អង្គការសហប្រជាជាតិទទួលបន្ទុកសិទ្ធិមនុស្សប្រចាំកម្ពុជា៕