ប្រធាន​គណៈ​កម្មការ​ទទួល​បន្ទុក​សុខាភិបាល សង្គមកិច្ច អតីត​យុទ្ធជន យុវនីតិ​សម្បទា ការងារ​បណ្ដុះ​បណ្ដាល​វិជ្ជា​ជីវៈ និង​កិច្ចការ​នារី (គណៈ​កម្មការ​ទី​៨) នៃ​រដ្ឋសភា លោក​ស្រី កែ សុវណ្ណរតន៍ គ្រោង​នឹង​កោះ​ហៅ លោក ម៉ម ប៊ុនហេង រដ្ឋមន្ត្រី​ក្រសួង​សុខាភិបាល មក​បំភ្លឺ​ពាក់​ព័ន្ធ​នឹង​ការ​រីក​រាល​ដាល​ជំងឺ​អេដស៍​នៅ​ឃុំ​រកា ស្រុក​សង្កែ ខេត្ត​បាត់ដំបង នៅអំឡុង​ពេល​យ៉ាង​យូរ ​ក្នុង​សប្តាហ៍​ទី​ពីរ​ដើម​ខែមករា ឆ្នាំ​២០១៥​ខាង​មុខ។ គម្រោង​កោះ​ហៅ​មក​សាក​សួរ​នេះ បាន​ទម្លាយ​ឲ្យ​ដឹង បន្ទាប់​ពី​សេចក្ដី​ណែនាំ​ជា​ច្រើន បាន​ធ្លាក់​ចេញ​មក ក្នុង​ចេតនា​លាក់​កំបាំង​ព័ត៌មាន​«ពិត» ទៅ​នឹង​ការ​ឆ្លង និង​ចំនួន​កើន​ឡើង​នៃ​អ្នក​ផ្ទុក​មេរោគ​អេដស៍ ក្នុង​ឃុំ​រការ ពី​សំណាក់​រដ្ឋមន្ត្រី​ក្រសួង​សុខាភិបាល​រូប​នេះ។

បញ្ជាក់ក្នុងបណ្តាញ​ព័ត៌មាន​សង្គម បន្ទាប់​ពី​វត្តមាន​នៃ​ការ​ចុះ​សួរ​សុខ​ទុក្ខ​ប្រជា​ពលរដ្ឋ ដែល​ផ្ទុក​មេរោគ​អេដស៍​ក្នុង​ឃុំ​រកា​នោះ លោក​ស្រី កែ សុវណ្ណរតន៍ បាន​បញ្ជាក់​ថា អ្នក​ផ្ទុក​មេរោគ​អេដស៍​ក្នុង​ឃុំ​រកា​នោះ​ កើន​ឡើង​ជិត​២០០​នាក់​ហើយ។ លោក​ស្រី​បន្ថែម​ថា អ្វី​ដែល​ជា​ចំណុច​សំខាន់ គឺ​ការ​លើក​ទឹក​ចិត្ត​ដល់​អ្នក​ផ្ទុក​មេរោគ អេដស៍​ទាំង​នោះ។ ពិសេស​ក្មេង​តូចៗ ព្រះ​សង្ឃ និង​លោក​តា លោក​យាយ​ជាដើម ដែល​ពួក​គាត់​មាន​វ័យ​កាន់​តែ​ចាស់​ទៅ​ហើយ​។

ប្រធានគណៈកម្មការទី៨ នៃរដ្ឋសភា បានលើកឡើងថា មូលហេតុដែលបង្កឲ្យមានហេតុភេទដ៏អាក្រក់នេះ កើត​មានចំពោះប្រជាពលរដ្ឋស្លូតត្រង់ ដែលហាក់ដូចជាមិនមានការទទួលខុសត្រូវ របស់អាជ្ញាធរពាក់ព័ន្ធ​នោះ ក៏ជាហេតុបង្ហាញឲ្យឃើញថាក្រសួងសុខាភិបាល កំពុងតែ«អសមត្ថភាព» ក្នុងការគ្រប់គ្រង។ លោកស្រី​បន្ត​ថា ដូច្នេះក្រសួងមួយនេះតោង«កែ»លំអរខ្លួនឡើងវិញ មិនថាក្នុងតំបន់ទេ គឺត្រូវធ្វើឡើងនៅទូទាំង​ប្រទេស។

មកដល់រសៀលថ្ងៃទី២៩ ខែធ្នូនេះ ទស្សនាវដ្តីមនោរម្យ.អាំងហ្វូ មិនអាចសុំប្រតិកម្មតប ពីអ្នកនាំពាក្យ​ក្រសួង​សុខាភិបាលបានឡើយ ចំពោះបញ្ហាឆ្លើយនៅចំពោះមុខរដ្ឋសភា និងចំនួនកើនឡើងនៃប្រជាពលរដ្ឋ​ដែល​មាន​ផ្ទុកមេរោគអេដស៍នោះ។

អ្នកឆ្លងជម្ងឺអេដស៍កើនឡើងជាង១៩០នាក់

តែបុគ្គលិកម្នាក់នៃមណ្ឌលសុខភាពរកា ដែលសុំមិនបង្ហាញឈ្មោះ បានប្រាប់ទស្សនាវដ្តីមនោរម្យ.អាំងហ្វូ​ក្នុង​ថ្ងៃទី២៩ ខែធ្នូនេះថា មកទល់ពេលនេះ នៅមានប្រជាពលរដ្ឋឃុំរកា មកពិនិត្យឈាមរក​មេរោគអេដស៍ជា​បន្ត​បន្ទាប់ ហើយដែលសរុបទៅមានចំនួនច្រើនជាង១៦០នាក់។ តែបើតាមព័ត៌មានពីផ្នែកគ្រប់គ្រងទិន្ន័យ នៃអ្នក​ផ្ទុក​មេរោគអេដន៍នេះ បានប្រាប់លោកថា បានរកឃើញមានអ្នកផ្ទុកមេរោគអេដស៍កើនឡើង ជាង១៩០នាក់​ហើយ។

បុគ្គលិកសុខភាពរូបនោះ បានបន្តថា នារសៀល ថ្ងៃទី២៩ ខែធ្នូ ឆ្នាំ២០១៤នេះ ប្រជាពលរដ្ឋដែលផ្ទុក​មេរោគ​អេដស៍នោះ ក្រោយពីទទួលថ្នាំប្រឆាំងមេរោគអេដស៍ពីក្រសួងសុខាភិបាល បានធ្វើឲ្យពួកគាត់មាន​អាការៈ​ខុសពីធម្មតាដូចជាវិលមុខ អស់កម្លាំង និងក្អួតចង្អោរជាដើម ។ តែអាការៈទាំងនេះវាមិនមានអ្វីចម្លែកទេ បើ​ធៀបទៅនឹងអ្នកផ្ទុកមេរោគអេដស៍មុនៗមួយចំនួន បន្ទាប់ពីចាប់ផ្តើមប្រើប្រាស់ថ្នាំ«ពន្យាជីវិត»នេះមក គឺមាន​សភាពដូច្នេះឯង។ លោកបាននិយាយបញ្ជាក់ថា៖ «នេះជាការធម្មតាទេ សម្រាប់អ្នកទទួលទានថ្នាំប្រឆាំង​មេ​រោគអេដស៍ នៅដំណាក់កាលដំបូងនោះ។ (…) យូរៗទៅ ថ្នាំវានឹងស៊ាំ ហើយពួកគាត់ក៏នឹងអាការៈ វិលមករក​ភាពប្រក្រតីវិញហើយ។»៕