មេធាវី៖ តុលាការ​នៅ​តែ​សម្រេច​«ឃុំ​ខ្លួន»​ មាជ សុវណ្ណារ៉ា ទោះ​គ្មាន​ភស្តុតាង​និង​សាក្សី (vdo)

«គ្មានសាក្សី គ្មានភស្តុតាងណាមួយ ក្នុងការចោទប្រកាន់ ឬដាក់បន្ទុកលើលោក មាជ សុវណ្ណារ៉ា ទេ។ (...) នេះជារឿងអយុត្តិធម៌មួយ សម្រាប់គាត់ នៅតុលាការកម្ពុជា។» នេះជាការផ្តល់បទសម្ភាស ជាមួយអ្នកសារព័ត៌មាន នៅមុខសាលាឧទ្ធរណ៍ដោយលោកមេធាវី ជួង ជូងី។
Loading...
  • ដោយ: អ៊ុម វ៉ារី អត្ថបទ៖ អ៊ុម វ៉ារី ([email protected]) - យកការណ៍ ៖ ស្រ៊ុន ទិត្យ ភ្នំពេញ ថ្ងៃទី១២ ធ្នូ ២០១៤
  • កែប្រែចុងក្រោយ: December 12, 2014
  • ប្រធានបទ: យុត្តិធម៌
  • អត្ថបទ: មានបញ្ហា?
  • មតិ-យោបល់

បន្ទាប់ពីប្រធាន​ក្រុម​ប្រឹក្សា​ជំនុំ​ជម្រះ​សាលា​ឧទ្ទរណ៍ លោក ឃុន លាងម៉េង បាន​ប្រកាស​ការ​បិទ​ផ្លូវ​តវ៉ា ដោយ​អះអាង​ថា​សំណុំ​រឿង​នេះ ស្ថិត​ក្នុង​សមត្ថកិច្ច​របស់​សាលា​ដំបូង​រាជធានី​ភ្នំពេញ កំពុង​តែ​ត្រៀម​ខ្លួន​ធ្វើការ​ជំនុំ​ជម្រះ​នោះ​រួច លោក ជួង ជូងី សហ​មេធាវី​ការពារ​ក្ដី​ឲ្យ​លោក មាជ សុវណ្ណរ៉ា បាន​ថ្លែង​ថា​កូន​ក្ដី​របស់​លោក កំពុង​រង​នូវ​ភាព​អយុត្តិធម៌ កាន់​តែ​ខ្លាំង​ឡើង​ហើយ។ លោក​មេធាវី បាន​ថ្លែង​ប្រាប់​អ្នក​សារព័ត៌មាន បន្ទាប់​ពី​សវនាការ​ព្រឹក​ថ្ងៃ​ទី១២ ខែ​ធ្នូ ឆ្នាំ​២០១៤​នេះ​ថា លោក មាជ សុវណ្ណារ៉ា មិន​ត្រឹម​តែ​មិន​បាន​ធ្វើ​អ្វី​ដូច​ការ​ចោទ​ប្រកាន់​ប៉ុណ្ណោះ​ទេ តែ​លោក​គឺ​ជា​អ្នក​ប្រកាស មិន​ឲ្យ​ប្រើ​ប្រាស់​អំពើ​ហិង្សា​នោះ​ផង​ទៀត។

ក្នុងនាមជាមេធាវីនៃសវនាការ លោកមេធាវី ជូង ជូងី បាន​បន្ថែម​ទៀតថា តុលាការគ្មានទាំងភស្តុតាង គ្មាន​ទាំង​សាក្សី និងគ្មានអ្វីទាំងអស់សម្រាប់ធ្វើការដាក់បន្ទុក មក​លើ​កូន​ក្តី​លោក​ឡើយ។ យ៉ាងណាក៏ដោយ លោកថា សាលាឧទ្ធណ៍ក៏បានផ្តល់សិទ្ធិ ក្នុងការប្តឹងសាទុក្ខទៅ​តុលាការ​កំពូល​ដែរ។ លោកបញ្ជាក់ថា៖ «យើងនឹង​ពិភាក្សា​ជាមួយគាត់ (មាជ សុវណ្ណារ៉ា) ដើម្បីធ្វើបណ្តឹងសារ​ទុក្ខ​ទៅ​តុលាការ​កំពូល ក្នុងរយៈពេលពីរសប្តាហ៍»។

ដោយឡែក លោក ចាន់ ចេន សហមេធាវីការពារក្ដីមួយរូបទៀត របស់លោក មាជ សុវណ្ណារ៉ា បានបង្ហាញ​ការ​«ខកចិត្ត» ទាំងសាលាដំបូងរាជធានីភ្នំពេញ ទាំងសភាស៊ើបសួរនៃសាលាឧទ្ធណ៍ ដែលធ្វើការបដិសេធ មិន​ឲ្យ​កូនក្តីនៅក្រៅឃុំនោះ។ លោកបន្ថែមទៀតថា ករណីនេះវាបានបង្ហាញនូវភាពអយុត្តិធម៌ និងហាក់បីដូចជាគ្មាន​ការអនុវត្តតាមនីតិវិធី ឬច្បាប់ដោយចៅក្រមទាំងនោះឡើយ ព្រោះកូនក្តីលោកជាមនុស្សចេះដឹង និងទៀង​ត្រង់​ម្នាក់ មានទីលំនៅ និងការងារច្បាស់លាស់ ហើយតែងតែសហការជាមួយតុលាការជានិច្ច។ លោកបានថ្លែង​ដាក់កំហិតទៅប្រព័ន្ទតុលាការវិញថា៖ «តុលាការត្រូវគិត និងពិចារណាឡើងវិញ ត្រូវធ្វើអ្វីៗទៅតាម​សុឆន្ទៈ​ពិត​ប្រាកដ ទៅតាមបេះដូងពិតប្រាកដ ទៅតាមនីតិច្បាប់ពិតប្រាកដ។ កុំធ្វើទៅតាមការយល់ឃើញ ឬសម្ពាធ​អ្វី​នោះ។»

ពាក់ព័ន្ធនឹងការភ្ជាប់រឿងនេះ ទៅនឹងរឿងនយោបាយ លោកមេធាវី ចាន់ ចេន បានបន្តថា ក្នុងនាមជាអ្នកច្បាប់ លោកមិននិយាយពីរឿងនេះឡើយ។ តែលោកគ្រាន់តែសង្កត់ធ្ងន់ថា កូនក្តីរបស់លោកជាអ្នកនយោបាយ ដូច្នេះវត្តមានរបស់គាត់ ក៏មាននៅកម្លែងកើតហេតុថ្ងៃទី១៥ ខែកក្កដានោះដែរ។ លោកបន្តថា «ហេតុអ្វីបាន​ជា​ករណីតែមួយ រឿងហេតុតែមួយ ពេលវេលាតែមួយ សកម្មជនគណបក្សជាច្រើនបានរួចខ្លួន បែរជាជាប់តែកូន​ក្តីខ្ញុំម្នាក់»។

លោកមេធាវី ចាន់ ចេន ក៏បានបង្ហាញនូវចម្ងល់មួយចំនួន ចំពោះលោកចៅក្រមយ៉ាងដូច្នេះថា «អ្នកច្បាប់ដូច​គ្នា ខ្ញុំមិនដឹងថាលោកចៅក្រមបានច្បាប់មកពីណាមកទេ ព្រោះទាំងនីតិព្រហ្មទណ្ឌ ទាំងនីតិវិធីព្រហ្មទណ្ឌ មិន​បានចែងថា ដោយសារសាលាដំបូងបិទការស៊ើបសួរ ហើយសាលាឧទ្ធណ៍ (សភាស៊ើបសួរ) សម្រេចមិន​បាន​នោះទេ នេះគ្រាន់តែជាលេសប៉ុណ្ណោះ។»

ទស្សនាវដ្ដីមនោរម្យ.អាំងហ្វូ មិនអាចសុំប្រតិកម្ម ពីប្រធានក្រុមប្រឹក្សាជំនុំជម្រះសាលាឧទ្ទរណ៍ លោក ឃុន លាងម៉េង បានទេក្នុងពេលនេះ។

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...